Swahili Bible2

15

Azariya umuyiinga wa Yuda

(2 Bye Kimiboolo 26.1-23)

1Azariya umusoleeli uwa Amaziya ekyela umuyiinga uwa Yuda, nga Yerobowamu waamalile kimiiko kamakhumi kabili na musaafu nga ali umuyiinga uwa Isiraeli. 2Ekyela umuyiinga nga ali ni kye buukhulu likhumi na kisesaba. Nga ekhala mu Yerusalemu, wawula khuumala kimiiko karaano na kibili. Maayi weewe abe bamulaanga bari Yeholaya, nga aama i Yerusalemu. 3Naye waaba busa nga paapawe Amaziya, wakhola ibyo bibikhoyesa Umukasya. 4Ne shitweela busa naye waalekha khutikulula kamesaayilo ke ba wele babaandi ta. Babaandu baarama nga bashiitsyayo ne bawaanayo biwaanwa ni khukhwoosha bubaane nga besaaya. 5Shaakila Umukasya waamusiindikhila buulwaale bwe bikeenge, waaba nabwo khukhwoolisa mu khufwa khweewe; naluundi waamenyatsaka yenyene muntsu iya buraawa. Umwaana weewe Yosamu waaba niye umenya mu lubili, aryo waaba umuyiinga mu shifwo sheewe.

6Bibiindu bibiramire byoosi byeesi Azariya aakhola nga ali umuyiinga, byaronebwa mu Shiitabo shishiilimo Bibyakholikha khaale bye Bayiinga ba Yuda. 715.7: Isay 6.1Nga Azariya waafwiile, baamusiikha mu Yerusalemu, khu biliindwa bye bakuuka beewe. Umwaana weewe Yosamu waamwiilila mu bikele nga umuyiinga.

Zekariya ekyela umuyiinga wa Isiraeli

8Zekariya umwaana wa Yerobowamu II, ekyela umuyiinga uwa Isiraeli nga Azariya waawulile Yuda khuumala kimiiko kataru na shinaane. Zekariya waawula Isiraeli nga ekhala i Samariya, khuumala kimyeesi kisesaba. 9Zekariya naye waaba busa nga bakuuka beewe, waakhola bibiindu bibikhali biilayi ta mu moni tsy’Omukasya. Waaloondelela khukhwisaaya ba wele babaandi, nga Yerobowamu umwaana uwa Nebati n’aleekela ba Isiraeli khuukhola.

10Ne lwanyuma Shalumu umwaana uwa Yabeshi waakhola luwomelo lwe khukhwiira Zekariya. Waamwiirira abulafu busa kila niye umweene ekyela umuyiinga. 11Bibiindu bibiramire byoosi byeesi Zekariya aakhola nga ali umuwuli, byaronebwa mu Shiitabo shishiilimo Bibyakholikha biikhale bye Bayiinga ba Isiraeli. 1215.12: 2 Bay 10.30Nashiryo shino shakholikha nga abe Umukasya ni aasuubisa Yehu ari, “Lisaaye lyoowo liliikela bayiinga ba Isiraeli, khuumalakho kumuboolo kwe khaane.”

Shalumu awula Isiraeli

13Nga Uziya waamalile kimiiko kataru na syeenda nga umuwuli uwa Yuda, Shalumu wekela umuyiinga uwa Isiraeli. Shalumu waamala kumweesi mutweela kwonyene mu buwuli, nga ekhala i Samariya. 14Lwanyuma Menahemu umusoleeli uwa Gasi waama i Tiruza waatsya i Samariya waakhoonya Shalumu. Menahemu wekela umuyiinga. 15Bibiindu bibiramire byeesi Shalumu aakhola, nga mulimo ni luwomelo lweewe, byoosi byaronebwa mu Shiitabo shishiilimo Bibyakholekha biikhale bye Bayinga ba Isiraeli.

16Mu mbuka iyo, Menahemu woonakisa shiriimba she Tapuwa, ni babaandu babaashibamo boosi, ni khuutsya khukhwoolisa i Tiruza, khulwekhuuba babaandu baamwo baaloba khukhwiwaanayo mu makhono keewe, weeraka babaandu boosi babaabamo, ni bakhasi be bisoombo waakhalakaka bisoombo ibyo.

Menahemu ekyela umuyiinga wa Isiraeli

17Menahemu umwaana uwa Gadi ekyela umuyiinga uwa Isiraeli, nga Azariya waawulile Yuda khuumala kimiiko kataru na syeenda. Aryo waawula khuumala kimiiko likhumi, nga ekhala i Samariya. 18Ne naye waaloonda khu saambo tsiimbi weloosela khukhwisaaya ba wele babaandi, nga Yerobowamu umwaana wa Nebati n’aleekela ba Isiraeli khu khola. Aryo waakhola bibyoonako mu moni tsy’Omukasya. 19Lwanyuma Tigilasi Pilesa, umuyiinga uwa Asiriya webwakala Isiraeli. Ne Menahemu waamuwa buyiindifu bwe feetsa bubwoola bikana ni bikana, ari amuyeete anyalise khuumenyawo nga umuyiinga. 20Buyiindifu buno Menahemu aabukhoonola khukhwaama khu bayiindifu be mu Isiraeli, nga aloma ari buli mutweela ali ni khuuwayo kumusolo mu feetsa iyoola aambi ikilo ndweela. Nashiryo umuyiinga wa Asiriya waakaanila bibiindu bino waalekha khuwaamba shibala isho ta. 21Bibiiramire byoosi byeesi Menahemu aakhola nga ali umuyiinga, byaronebwa mu Shiitabo she Bibyakholikha Biikhale bye Bayiinga ba Isiraeli. 22Nga Menahemu wafwiile, umwaana weewe Pekahiya wekyela umuyiinga.

Pekahiya ekyela umuyiinga wa Isiraeli

23Pekahiya ekyela umuyiinga uwa Isiraeli nga Azariya waamalile kimiiko kamakhumi karaano, nga uwula Yuda. Pekahiya wawula khuumala kimiiko kibili, nga ekhala i Samariya. 24Ne Pekahiya naye waloonda khu saambo tsiimbi weloosela khukhwisaaya ba wele babaandi, nga Yerobowamu umwaana wa Nebati ni aleekela ba Isiraeli khu khola. Aryo wakhola bibyoonako mu moni tsy’Omukasya.

25Mutweela khu baaraangilisi be liiye lya Pekahiya, abe bamulaanga bari Peka, umwaana wa Remaliya. Peka yuno wakhola luwomelo waatsya ni basilikhale karaano khukhwaama i Gileyadi, bakhoonya Pekahiya, atweela ni Arugoba ni Ariye, nga bali mu lubili lw’omuyiinga i Samariya. Peka wekyela umuyiinga wa Isiraeli. 26Bibiiramire byeesi Pekahiya akhola nga ali umuyiinga, byaronebwa mu Shiitabo she Bibyakholikha Biikhale bye Bayinga ba Isiraeli.

Peka umuyiinga uwa Isiraeli

27Peka ekyela umuyiinga uwa Isiraeli nga Azariya waawulile Yuda khuumala kimiiko karaano na kibili. Peka waawula nga ekhala i Samariya, khuumala kimiiko kamakhumi kabili. 28Ne Peka naye waaloonda khu saambo tsiimbi weloosela khukhwisaaya ba wele babaandi, nga Yerobowamu umwaana wa Nebati ni aaleekela ba Isiraeli khuukhola. Aryo waakhola bibyoonako mu moni tsy’Omukasya.

29Nga Peka ali umuyiinga, Tigilasi Pilesa uwa Asiriya webwakala Isiraeli luundi, wawaamba biriimba bino: Iyoni, Abeli-Besi-Maaka, Yanowa, Kedeshi ni Hazori. Wawaamba ni bisiintsa bino: Gileyadi, Galilaaya, Nafutali; waasuta babaandu baamwo waabayila mu bubowe i Asiriya. 30Nio lwanyuma Hosheya umusoleeli uwa Ela waakhola luwomelo weera Peka. Hosheya wekyela umuyiinga wa Isiraeli nga Yosamu umwaana uwa Uziya waawulile khuumala kimiiko kamakhumi kabili. 31Bibiiramire byeesi Peka aakhola nga ali umuyiinga, byaronebwa mu Shiitabo she Bibyakholikha Biikhale bye Bayiinga ba Isiraeli.

Yosamu umuyiinga wa Yuda

(2 Bye Kimiboolo 27.1-9)

32Yosamu umusoleeli wa Azariya ekyela umuyiinga wa Yuda nga Peka waawulile Isiraeli khuumala kimiiko kibili. 33Yosamu ekyela umuyiinga nga ali ni kye buukhulu kabili na kiraano. Waawula khuumala kimiiko likhumi na kisesaba nga ekhala mu Yerusalemu. Maayi weewe abe bari Yerusha, umukhaana uwa Sadooki.

34Yosamu waaloonda khu bikholwa biilayi bya paapa weewe Azariya, naye waakhola bibiindu biilayi mu moni tsy’Omukasya. 35Ne she khabi imbi, waalekha khutikulula kamesaayilo ke ba wele babaandi, abe isi babaandu batsya khukhwisaaya ni khukhwookhela bubaane ta. Naluundi niye uweesamo wombakhisa shilibwa she luwaande lwe ngaaki lwe Lisaayilo ly’Omukasya. 36Bibiiramire byeesi Yosamu aakhola nga ali umuyiinga, byaronebwa mu Shiitabo she Bibyakholikha Biikhale bye Bayiinga ba Yuda. 37Mu biifukhu ibyo, Umukasya waasiindikha Rezini, umuyiinga wa Siriya ni Peka umuyiinga wa Isiraeli khuutsya khwibwakala Yuda. 38Nga Yosamu wafwiile, baamusiikha mu biliindwa bye bakuuka beewe, mu Yerusalemu. Lwanyuma umusoleeli weewe Ahazi, wekyela umuyiinga.