Swahili Bible2

14

Amaziya umuyiinga uwa Yuda

(2 Bye Kimiboolo 25.1-24)

1Amaziya umwaana uwa Yowasi ekyela umuyiinga wa Yuda nga Yehoashi waamalile kimiiko kibili nga ali umuyiinga uwa Isiraeli. 2Isi ekyelela umuyiinga, abe Amaziya ali ni kye buukhulu kabili na kiraano; waaba umuyiinga khuumala kabili na syeenda, nga awula khukhwaama i Yerusalemu. Maayi weewe abe bari Yehoadini, nga aama i Yerusalemu. 3Amaziya waakhola bibiindu biilayi mu moni tsy’Omukasya, ne waalekha khukhwoolelela byeesi kuuka weewe Dawudi aakhola ta. Niye aloondelela isaambo iya paapawe, Yowasi. 4Ne Amaziya waalekha khusambulaka kamesaayilo ke ba wele babaandi ta, isi babaandu baatsya ni bawaanayo biwaanwa naluundi booshelayo bubaani.

5Amaziya ni abona ari niye waamalile khukhwikhwiikhila ilala mu buyiinga, wawaamba luundi waakhoonya abo babeera paapawe. 614.6: Maka 24.16Ne waalekha khukhwiira babaana baabwe ta, khulwe khuuloondelela likaambila ly’Omukasya lyeesi aarona mu Shiitabo she Kamakaambila sha Musa, lililoma liri, “Mbaawo khukhwiira basaali khulwe bibyoonako bye babaana baabwe ta; namwe khukhwiira babaana khulwe bibyoonako bye basaali baabwe ta. Buli mutweela ali ni khuufwa khulwe bibyoonako byeewe umweene.”

7Amaziya niye uweera baselikhale ba Edomu kumukaanda mutweela (10,000) mu Litila lye Kumuunyu. Webwakala naluundi wawaamba shiriimba Sela waashuusa lisiina lyasho khuuba Yokiselo, khukhwoolisa ni shaleelo.

8Lutweela Amaziya waasiindikha buurume isi Yehoashi umuyiinga uwa Isiraeli nga buloma buri, “Yiitsa khwakaanane khukhakanemo kamaani mu busoolo.”

9Ne Yehoashi waamwiilamo ari, “Lutweela lubeembe lwaalomela kumuruumba luri, ‘Ingana umukhaana woowo akhwaalikhe khu musoleeli wase’. Ne mu mbuka ifwiiti iri, kuusolo kwe kamaani kwakhaandakilila lubeembe kwaluminiangulaka. 10Ilala iwe waminiangulaka Edomu, kila ari ulikho winiinisa angaaki. Ni wikhoyele mu shiriifwa isho, urame is’uli. Shiina kila wireerera wamweene ni babaandu be mu Yuda bihangafu?”

11Ne Amaziya waalekha khuwulila ta. Kila umuyiinga Yehoashi atsya ni liiye lyeewe baatsya mu shiriimba Besishemeshi shishiili mu Yuda, bebwakala Amaziya ni liiye lyeewe. 12Nga bali mu busoolo, liiye lya Isiraeli lyaawula liiye lya Yuda, isho shaakila buli muselikhale yeesi uwa Yuda waatitukha weelayo ingo weewe. 13I Besishemeshi weene iyo, umuyiinga Yehoashi waawaambilayo Amaziya. Lwanyuma baakhuumba baatsya bawaamba ni shiriimba Yerusalemu. Yehoashi waalakila liiye lyeewe khuuwuumbulaka liitikiiyi lya Yerusalemu tsifuuti bitoondo bisesaba (600), khukhwaamila khu Shilibwa she Efurayimu, khukhwoola khu Shilibwa she Koona. 14Waasuta izaabu n’ifeetsa, ni bikoombe byoosi abe bibiili mu Lisaayilo ly’Omukasya, ni buyiindifu abe bubuuli mu libiikhilo ly’omuyiinga, byoosi waatsya ni nabyo. Waabawo ni babaandu beesi aawaamba, weelayo ni nabo i Samariya.

15Bibiramire byoosi byeesi Yehoashi aakhola, ni kamaani keewe mu busoolo, ni busoolo akari eewe ni Amaziya uwa Yuda, bino byoosi byaronebwa mu Shiitabo shishiilimo Biikhale bye Bayiinga ba Isiraeli. 16Nga Yehoashi wafwiile, baamusiikha khu biliindwa bye bakuuka beewe mu Samariya. Lwanyuma umwaana weewe Yerobowamu ukhola khabili, wekyela umuyiinga.

Khuufwa khwa Amaziya umuyiinga wa Yuda

(2 Bye Kimiboolo 25.25-28)

17Nga umuyiinga Yehoashi waamalile khuufwa, umuyiinga Amaziya uwa Yuda waamenyawo kimiiko kikiindi likhumi na kiraano. 18Bibiiramire byoosi bibiwaamba khu buyiinga bwa Amaziya, byaronebwa mu Shiitabo she Bibyakholekha Biikhale bye Bayiinga ba Yuda. 19Lwanyuma aabawo luwomelo mu Yerusalemu lwe khukhwiira Amaziya, kila elukhila mu shiriimba Lakisi. Ne shitweela busa baasiindikhayo babaandu baatsya baamwirira ibweene iyo. 20Baakobosa kumulaambo kweewe nga baakusutiile khu ŋwaaŋwa, baamusiikha khu biliindwa bye bakuuka beewe, mu Yerusalemu.

21Lwanyuma babaandu be mu Yuda baabukula Azariya, umwaana uwa Amaziya, uwaba olesa kye buukhulu likhumi na kisesaba, baamwikhasa khu shitsoloŋo khuuba umuyiinga. 22Azariya yuno niye uwombekha shiriimba Elati bushaakha, waashikoboselayo Yuda.

Yerobowamu II nga umuyiinga mu Isiraeli

23Yerobowamu II ekyela umuyiinga uwa Isiraeli, nga Amaziya waamalile kimiiko likhumi na kiraano nga ali umuyiinga uwa Yuda. Yerobowamu wawula khuumala kimiiko kamakhumi kane na mutweela, nga ekhala mu Samariya. 24Woneka mu moni tsy’Omukasya; waaba busa nga Yerobowamu umusoleeli uwa Nebati n’akhola, nga n’akila babaandu ba Isiraeli bonaka mu moni tsy’Omukasya. 2514.25: Yona 1.1Yerobowamu II wabalaayisakho lulwaakha lwa Isiraeli, akari a Lebo-Hamati khu lubeka lwe ngaaki, ni khukhwoola khu nyaantsa Dedi Si khu lubeka lwe mwaalo. Shino shakholekha khuuloondekhana ni sheesi Umukasya Wele uwa Isiraeli aloma khubirira mu Yona umwaana wa Amitayi, uwaba umuŋoosi khukhwaama i Gasihepa. 26Khulwekhuuba Umukasya abona khutaambisibwa khwe ba Isiraeli khwe kamaani naabi, nga baweelewo, naluundi nga mbaawo ubayeeta ta. 27Ne khulwekhuuba abe Umukasya siwaaloma ari aliihesa ba Isiraeli bawewo khu shibala ta, nashiryo waabawonesa khuubirira mu Yerobowamu, umwaana uwa Yehoashi.

28Bibiramire byoosi byeesi Yerobowamu aakhola nga ali umuyiinga, ni kamaani kamakali mu busoolo, isaambo isi aasoolanamo, isaambo isi awaambamo Damasikasi ni Hamasi khukhwaama khu Isiraeli, waabiisa mu Yuda, byaronebwa mu Shiitabo she Bibyakholekha Biikhale bye Bayiinga ba Isiraeli. 29Nga Yerobowamu waafwiile, baamusiikha khu biliindwa bye bakuuka beewe, babaaba bayiinga ba Isiraeli. Umwaana weewe Zekariya waamwiilila mu bikyele nga umuyiinga.