Swahili Bible2

11

Nabakyelama Ataliya ekyela umuyiinga

(2 Bye Kimiboolo 22.10-12; 23.15)

1Khaangukho nga Ataliya maayi uw’omuyiinga Ahaziya, waawuliile bari umwaana weewe waafwiile, waakhalawo khukhwiira baalebe ba Ahaziya boosi, bari ilekhe khubawo uwikyela umuyiinga ta. 2Ne Yehosheba, umukhaana uw’omuyiinga Yolamu naluundi umukooko uwa Ahaziya, waakhalawo khuubisa Yowasi, umusoleeli uwa Ahaziya. Waamumusa khukhwaama mu baana b’omuyiinga abe babaatsya khukhwiiribwa, waatsya waamubisa atweela n’umwakaanisi weewe, mu shiseenge she mu Liisaayilo Liikhulu. Iyo abe Ataliya s’amwoolakho ta. 3Waamubisa mu Liisaayilo Liikhulu11.3 Yehosheba abe ali umukhasi uwa Yehoyada, nga bamenya mu Liisaayilo Liikhulu, kila baabisamo Yowasi khuumala kimiiko kisesaba, kyeesi Ataliya aamala nga ali niye nabakyelama uwula.

Yowasi ekyela umuyiinga uwa Isiraeli

(2 Bye Kimiboolo 23.1-21)

4Ne mu mwiiko kukuukhola musaafu, Yehoyada umusaayi, warumanisa khulaanga basilikhale babaliinda umuyiinga, ni n’abo babaaliinda mu lubili lw’omuyiinga. Nga boolile isi ali mu lisaayilo, kila akhola ni nabo ikwangwaani nga bamwitsubila mu lisiina ly’Omukasya bari kane bakiliinde. Lwanyuma waareera Yowasi waabokyesa. 5Kila abalomela ari, “Shino sheesi ingana inywe mukhole: Khu bukali bwe basilikhale babaakhaabe mu khuliinda khu Sabato, ingana lipupu litweela liliinde lubili lw’omuyiinga. 6Lipupu liliindi libe khu shilibwa she Suri, ni lipupu lilikhola khataru liliinde khu shilibwa she lubili, shikile abe babaaliindawo batsyekho ingo. 7Kamapupu kakaaramire kabili abe kakaali ni khuuraamba khu Sabato, kawolemo. Ne ise ingana koombi karame ano khu Lisaayilo khutseeta umuyiinga Yowasi. 8Muli ni khuumwibotookhelela mumutseete, nga buli mutweela wawaambile lurima lweewe mukhono. Buli uyo yeesi ubesyeenda aambi, muli ni khuumwiira.”

9Baaraangilisi be basilikhale baaloondelela kamakaambila keesi umusaayi Yehoyada aabawa. Buli mutweela walaanga basilikhale beewe abe babaakhaabe mu khuwola khu Sabato, beetsa ni nabo isi umusaayi. 10Yehoyada waarusa antsye buli lurima, ni tsingabo bibyaba by’omuyiinga Dawudi, nga bili mu Liisaayilo Liikhulu, waabiwa baaraangilisi. 11Baaraangilisi baabikabila basilikhale baabwe, baabiwaamba mukhono. Beema nga bebotookheleele Liisaayilo Liikhulu ni shisheeso, nga balikho batseeta Yowasi.

12Lwanyuma waareera Yowasi ibulafu, waamurakho ikuutwa iye buukhulu, waamuwaambisa ni kamakaambila ke khuuraambisa khuuwula linaambo. Baamutsukhakho kamafura, baamulaangilila khuuba nga niye umuyiinga. Babaandu baakhupaka mukhono nga baloma bari, “Upewo khabili, umuyiinga!”

13Nga Alitaliya waawuliile liyoombo lye basilikhale ni babaandu, wenyukha waatsya mu Liisaayilo Liikhulu. 1411.14: 2 Bay 23.3Kila abona umuyiinga weemikhile aambi khu shisiindi, nga nisho shiifwo sheesi bayiinga beemikhamo khuuloondekhana ni kimisilo kyaabwe. Baaraangilisi be basilikhale ni babafuura tsifulumbeti, ni babaandu boosi atweela abe balikho beekhoya. Shikila Alitaliya onuula bikwaaro byeewe mu mutaambo, nga akuukuula ari, “Inywe mwandililemo ise luwomelo!”

15Khaangukho umusaayi Yehoyada waalakila baaraangilisi be basilikhale ari, “Muwaambe mumureere ano, mwiire umuundu yeesi ukane abe nga amuseemba. Mwiire, ne mukhamwirira aambi ni Lisaayilo ly’Omukasya ta.” 16Nashiryo baaraangilisi baamukumila, baamukhweesa baamuyila khu shilibwa sheesi tsiŋwaaŋwa tsingililakho mu lubili, baamwirira abweene awo.

17Umusaayi Yehoyada waaloma umuyiinga ni babaandu baakhola indakaano bari kane babatsake babeyikinwa isi Wele ni isi bashaabwe. 18Lwanyuma babaandu boosi atweela baaweela khu lisaayilo lya wele bayaali, baalikubulaka lyaaweela aasi. Bibyeeso bya wele bayaali ni bifwaani byeewe, baabiminiangulaka, lwanyuma bawaamba Matani uwaba umusaayi wa bayaali baamukhoonyela khu byeeso byeene ibyo. Lwanyuma kila umusaayi Yehoyada asiindikha basilikhale khuutsya khuliinda Lisaayilo ly’Omukasya. 19Umusaayi waabusaasa babaandu, ni basilikhale, ni naabo babaliinda umuyiinga, baaroongisa umuyiinga nga bamwiikhisa khukhwaama mu Lisaayilo ly’Omukasya. Kila atsya ekhala khu shitsoloŋo she buyiinga.

20Nashiryo babaandu boosi bekhoya naabi, khulwekhuuba abe Alitaliya baamwiirire naluundi abe lukoosi lwaakoboole mu Yerusalemu. 21Yowasi ekyela umuyiinga nga ali ni kimiiko kye buukhulu musaafu kyonyene.