Swahili Bible2

10

Yehu akhoonya lisaaye lya Ahabu lyoosi

1Abe ishiiliyo be lisaaye lya Ahabu kamakhumi musaafu babaashiimenya i Samariya. Nashiryo Yehu waarona buurone waabusiindikha isi bawuli ni baaraangilisi ni basilikhale, ni isi abo boosi abe babaali khu luwaande lwa Ahabu, nga buloma buri, 2“Ise naamanyile nga shiriimba sheenywe shili she kamaani naabi, naluundi muli ni kamakaali ni tsiŋwaaŋwa, ni bye busoolo. Naluundi ise naamanyile nga lisaaye ly’omuyiinga Ahabu limenya iyo ni nanywe. Ari, nga ni mumala khusoma burone buno, 3roboramo mu baana ba Ahabu uyo ufuura buulayi ni kamaani, mumwikyelise umuyiinga, atseete lisaaye lya paapawe.”

4Ne nga baaraangilisi baasomile buurone buno, baarya naabi, kila baloma bari, “Yehu waamalile khaale khukhwiira bayiinga babili, Yolamu ni Ahaziya. Ifwe kane khumunyale?” 5Kila umuraangilisi uwe mu lubili, n’uwe mu shiriimba, ni baaraangilisi babaandi be khu luwaande lw’abo babaali atweela ni lisaaye lya Ahabu, baarumana buurume isi Yehu nga buloma buri, “Ifwe khuli babaakaanisi boowo. Kane ifwe khukhole buli shitweela sheesi iwe ukhulomela. Singene khwikyelisekho umuundu ukuundi yeesi khuuba umuyiinga ta. Iwe khola sheesi umanya uri shikhwakhila iwe.”

6Kila abasiindikhila buurone bubuundi nga buloma buri, “Noola inywe muli khu luwaande lwase, naluundi noola inywe muli berekefu khuukhola byeesi inoma, khalakho kimirwe kye babaana ba Ahabu, kumukaamba khu nyaanga yino mukireere i Yezureeli.”

Babaandu kamakhumi musaafu be lisaaye lya Ahabu, abe nibo bamenya muungo mwe baaraangilisi babaakhali batweela ta, mu shiriimba. 7Babaandu bano ni baasoma burone buno, bawaamba be lisaaye lya Ahabu, babaakhoonya, baara kimirwe kyaabwe mu bikono, baakiwa babaandu khuukiyila i Yezureeli.

8Ni baaboolela Yehu bari bareerire kimirwe tsana, waaloma ari, “Kiyile khu shilibwa she shiriimba mukifumule aasi mu biyuuyi bibili, kibe awo khukhwoolisa kumutikhinyi.”

9Ni bwasha kumutikhinyi, Yehu waatsya wemikha angaaki kila alomela babaandu ari, “Inywe simuli ni kumusaango ta. Ise samweene niye uwalyamo Yolamu luwomelo naluundi namwiira. Ne bano boosi naanu ubeerire? 10Shimanye muri buli shiindu sheesi Umukasya aamala khuuloma khuubirira mu Eliya, shishiwaamba khu lisaaye lya Ahabu shili ni khuukholikha.”

1110.11: Hos 1.4Lwanyuma Yehu waakhoonya be lisaaye lya Ahabu abe babaaramilakho mu Yezureeli, nga mulimo be biriifwa, basaale baabwe, basaayi baabwe, khukhwoolisa nga mbaawo na mutweela uwarama ta.

12-13Yehu waarura i Samariya waatsya. Nga ali khu ntsila atsya, nga wolile isi babaayi be kamasheese babusaanila, wakanana batweela khu balebe b’omuyiinga Ahaziya uwa Yuda. Waabareeba ari, “Inywe ba naanu?”

Baamwiilamo bari, “Ifwe khuli baalebe ba Ahaziya. Khulikho khutsya khukeniyila be muungo mweewe.”

14Yehu waalakila basilikhale beewe ari, “Babayile nga bali baalamu!” Kila babaakulukhila, baabayila nga bashiili baalamu, baatsya khubeerira mu lilowo liliili isi babaayi be kamasheese baakananila. Boosi beesi beera abe boola babaandu kamakhumi kane na babili. Mbaawo na mutweela uwawonakho ta.

15Nga bakyeendile belooselekho ibweeni, bakaanana Yehonadabu, umwaana uwa Rekabu, nga alikho etsa khubakaanana. Yehu waamusheesa nga aloma ari, “Ise ndi khu luwaande lwoowo. Ne nawe uli khu luwaande lwase?”

Yehonadabu welamo ari, “Nase ndi khu luwaande lwoowo.”

Yehu welamo ari, “Reera kumukhono kwoowo.” Kila Yehu amuyeeta khuuniina mu likaari. 16Yehu waamulomela ari, “Yiitsa khutsye fweesi, kane ubone nga ise n’intsiinikhila Umukasya.”

Nashiryo baatsya boombi mu likaari. 17Nga boolile i Samariya, Yehu weera baalebe ba Ahabu boosi abe babaaramawo, waabamalilawo ilala. Shino shakholekha nga Umukasya n’ashiloma khuubirira mu Eliya.

Yehu akhoonya abo babesaaya wele bayaali

18Lwanyuma Yehu waabusaasa atweela babaandu be mu Samariya, kila abalomela ari, “Ahabu s’esaaya wele bayaali naabi ta; ne ise Yehu intsya khumwisaayila ilala. 19Indi khuutsya khuwaanayo isaayilo iye kamaani kameene. Nashiryo inaangile baŋoosi ba wele bayaali, ni babaamwisaaya, ni basaayi beewe; ikhabawo na mutweela utakhawo ta. Ukane alekhe khukhwiitsa yeesi, kane eribwe.”

Ne luno lwaba luwomelo lwa Yehu ari nio ahese abo babesaaya wele bayaali. 20Yehu waalakila ari, “Rawo shifukhu she khukhwisaayilakho wele bayaali!” Nashiryo baarawo shifukhu. 21Yehu waarumanisa mu Isiraeli mwoosi, abo babesaaya wele bayaali beetsa baawayo; nga mbaawo na mutweela uwaramayo ta. Kila bengila mu lisaayilo lya wele bayaali, betsusila ilala lisaayilo lyoosi. 22Yehu waalakila abo abe babaabiikha bikwaaro bye khukhwisaayila wele bayaali ari babiruse antsye, bakabile buli mutweela. Nashiryo baabirusa ibulafu baabikabila babaandu.

23Lwanyuma Yehu ni Yehonadabu bengila mu lisaayilo mukari, baalomela babaandu bari, “Wentselesa mukari muno mubone muri mbaawo umuundu uwisaaya Umukasya uuli mukari muno ta, akhali babesaayi ba bayaali bonyene.” 24Kila Yehu engila mu lisaayilo khuuwaanayo isaayilo ni biwaanwa bibyooshe.

Ne abe Yehu waareere basilikhale kamakhumi shinaane ibulafu, abe waabaloomele ari, “Kane imbuusaase babesaayi abo boosi ano. Ne ukane alekhe ikhaba mutweela khu nibo atitukhe atsye, uyo umweene kane eribwe!”

25Nga Yehu n’amala busa ari khuuwaanayo isaayilo, waalomela baaliindi ni basilikhale ari, “Yingila mukari mubeere. Mbaawo na mutweela uwilukha waatsya ta.” Baryo nga baamalile khuubeera boosi, baatuumaka kimilaambo ibulafu. Lwanyuma bengila mu lisaayilo mukari 26baasuta shifwaani sha wele bayaali baashirusa ibulafu, baashoosha. 27Baashifuniaaka baashimalilawo ilala, naluundi boonakisa lisaayilo lya wele bayaali, baalikyelisamo biyiiko, ni khukhwoolisa imbuka yino.

28Iyo niyo isaambo isi Yehu aanyalisa khukhwakaamisamo khukhwisaaya wele bayaali mu Isiraeli. 2910.29: 1 Bay 12.28-30Ne Yehu waalekha khunyalisa khukhwakamisa khukhwisaaya bifwaani bye tsimoosi bye zaabu, byeesi abe Yerobowamu umwaana wa Nebati aabuumba mu biriimba Dani ni Beseli, ari babaandu besaaye ta.

30Lwanyuma lwayo, Umukasya waalomela Yehu ari, “Waakholile buulayi naabi khukhwoonakisa lisaaye lya Ahabu lyoosi, nga abe samweene ni nakana. Ni nashiryo kane imbone ndi bayiinga ba Isiraeli babeelakho bane boosi, baama mu lisaaye lyoowo.” 31Ne ndi Yehu waalekha khuuloondelela kamakaambila ka Wele wa Isiraeli koosi ta. Ne akhali ndi naye wakhola bibiindu biibi byeesi Yerobowamu aleekela ba Isiraeli khukhola.

Khuufwa khwa Yehu

32Mu biifukhu ibyo, Umukasya waarakikha khuukhendeesa khu bukali bwa Isiraeli. Umuyiinga Hazaeli uwa Siriya waafuura ba Isiraeli, weyawulakho, 33nga ayila bisiintsa bya Gileyadi ni Bashani bibiili ibwaamanyaanga wa Yorudaani, n’ingaaki we shiriimba sha Aroeri, aambi ni luluutsi Arinoni. Liloba lino lyamenyebwatsakamo bikuuka bya Gadi, Rewubeni ni Manase.

34Bibiindu byoosi byeesi Yehu aakhola nga ali umuyiinga, nga bibiilimo ni bunyindaalifu bweewe, byaronebwa mu shitabo shishiilimo Bibyakholekha biikhale bye Bayiinga ba Isiraeli. 35Lwanyuma Yehu waafwa, baamusiikha i Samariya. Kila umwaana weewe Yehoahazi, ekyela umuyiinga uwa Isiraeli. 36Yehu aaba umuyiinga wa Isiraeli khuumala kimiiko kamakhumi kabili na shinaane, nga shiirebe sheewe shikhulu shili i Samariya.