Swahili Bible2

1

Umukasya akhalila Ahazi kumusaango

1Lwanyuma lwe khuufwa khwa Ahabu, babaandu be mu Mowabu baaaminyaala, beyawula khukhwaama khu Isiraeli.

2Shifukhu shitweela, Ahazi wahanukha khukhwaama khu ngaaki khwe lubili lweewe mu Samariya, waafuna butsiina bukali naabi. Nashiryo waarumana babaandu khuutsya mu shiriimba she Ekuroni, khuureeba wele abe isi besaaya Baalizebubu bari, oba kane awone namwe ta. 3Ne malayika w’Omukasya waalomela Eliya umuŋoosi, uwaama i Tishibe, khuureeba baarume b’omuyiinga ari, “Mu Isiraeli mbaamwo Wele ta, kila Ahazi abarumanile inywe khuutsya khureeba khukhwaama isi wele uwe Ekuroni, bibiwaambakana ni butsiina bweewe? 4Ni nashiryo Umukasya waalomile ari, singane awone khukhwaama mu butsiina ubwo ta, ne akhali ndi anafwa.” Nashiryo Eliya waatsya waakhola nga Umukasya n’amulomela.

5Baarume ni baakobolayo waangu isi umuyiinga kila abareeba ari, “Shiina kila mukoboole waangu muryo?”

6Baamwiilamo bari, “Iliwo umusaani isi ifwe khwaakanaane khu ntsila waakhulomela ari, ‘Kobolayo isi umuyiinga ubarumaane mumureebe muri, bari mu Isiraeli mbaamwo Wele ta, kila iwe urumanile babaandu khuutsya khureeba khukhwaama isi wele uwe Ekuroni, bibiwaambakana ni butsiina bwoowo? Bari ni nashiryo singene uwone ta, ne akhali utsya khufwa.’ ”

7Ahazi waabareeba ari, “Umuundu mweene ubabooleele uyo abe afwaana aryeena?”

81.8: Mat 3.4; Mako 1.6Baamwiilamo bari, “Abe wakwaarire shikwaaro sheesi bakhola mu bwooya bwe shishaayo, naluundi abe weboyile lukhoba mu shikuute.” Kila Ahazi aloma ari, “Uyo ali ni khuuba Eliya uwaama i Tishibe.”

9Khaangukho umuyiinga waarumana mutweela khu baakhulu be mu maye keewe, khuutsya ni basilikhale kamakhumi karaano khuwaamba Eliya. Kila umusilikhale umukhulu yuno atsya isi Eliya, uwaba wekhaale khu khakiingi khu ngaaki, waamulomela ari, “Mwakaanisi wa Wele, umuyiinga alikho akhulaanga bari yiikha aasi wiitse ukanikhe ni naye.”

101.10: Luka 9.54Eliya weelamo umukhulu yuno ari, “Niiba bari ise ndi umwakaanisi uwa Wele, khali kumulilo kwaamile mwikulu kukhwoosha iwe ni basilikhale boowo kamakhumi karaano.” Khaangukho kumulilo kwaama mwikulu kwoosha umuraangilisi uyo ni basilikhale beewe beene.

11Luundi umuyiinga waasiindikha umuraangilisi ukuundi khu be kamaye ni basilikhale kamakhumi karaano. Waatsya isi Eliya kila amulomela ari, “Mwakaanisi uwa Wele, umuyiinga walakiile ari, wiitse mu bwangu isi ali!”

12Ne Eliya weelamo umukhulu yuno ari, “Niiba bari ise ndi umwakaanisi uwa Wele, khali kumulilo kwaamile mwikulu kukhwoosha iwe ni basilikhale boowo kamakhumi karaano.” Khaangukho kumulilo kwaama mwikulu kwoosha umuraangilisi uyo ni basilikhale beewe beene.

13Kumuluundi kukuukhola khataru, umuyiinga luundi waarumana umukhulu ukuundi ni basilikhale kamakhumi karaano. Umukhulu we basilikhale yuno ni oola isi Eliya, waafukhamila aasi khu meesikamo keewe, waamwikoontselela nga aloma ari, “Umwakaanisi uwa Wele, naakhwikoontseleele n’umaambile ise shiisa, atweela ni babaakaanisi boowo bano kamakhumi karaano. N’ukhulekhe khube baalamu. 14Bona kumulilo kwaamile mwikulu kwoosha baakhulu be mu maye babili ni basilikhale baabwe boosi. Iwe ukhalekha shishiindu nga isho shaakholikha khusi ise ta.”

15Kila malayika w’Omukasya alomela Eliya ari, “Ukharya ta; ni wiikhe utsye ni naye.” Nashiryo Eliya wenyukha weekha aasi, waatsya ni naye isi umuyiinga.

16Eliya ni oola waalomela umuyiinga ari, “Umukasya akana khuumanya lwashiina iwe warumanisile babaandu khuutsya i Ekuroni khukhwireeba khu wele waabwe bibiwaamba khu butsiina bwoowo. Iwe s’ufukiilisa uri mu Isiraeli mulimo Wele isi iwe unyala wereebakho ta? Ni nashiryo iwe nga n’ukholile shino, Umukasya waalomile ari iwe uli ni khuufwa.”

17Ni nashiryo Ahazi waafwa nga ilomo isi Umukasya alomela mu Eliya ni yaba. Ne khukhwaama nga Ahazi n’akhaaba n’umwaana khuuba umusikha weewe ta, wandaaye weewe Yolamu wekyela umuyiinga. Bino byabawo mu mwiiko kwe khabili nga Yeholamu umwaana uwa Yehoshafati, ali niye umuyiinga uwa Yuda. 18Bibiindu bibiramire byoosi byeesi Ahazi akhola nga ali umuyiinga, byaronebwa mu shitabo shilimo Bibyaamayo bye Bayiinga ba Isiraeli.