Swahili Bible2

8

Bibiindu biikali byeesi Solomoni aakhola

(1 Bayiinga 9.10-28)

1Khuukhola kumulimo kuno kwoosi, shayilila Solomoni kimiiko kamakhumi kabili na musaafu, khuumaliilisa Liisaayilo Liikhulu ly’Omukasya, atweela ni lubili lweewe. 2Lwanyuma lweebyo, Solomoni waarakikha khuukhola khubye khukhwoombekha buyaakha biriimba byeesi Hiramu aamuwa. Nga byaweele khukhwoombakhibwa, Solomoni waalakila babaandu ba Isiraeli khuutsya khuubimenyamwo.

3Yaba khu mbuka nyene yino, isi Solomoni aatsiila webwaakala shiriimba Hamasi-Zoba, waashiyilila khuuba shisheewe. 4Naluundi waakhola khubye khukhwoombakha buyaakha shiriimba Tadimori, shishaba mu mubiimbi, ni biriimba bibiindi bye birara byeesi ombekha mu Hamasi. 5Aryo woombekha ni tsimako tse kamatikiiyi khu Besi-Horoni she ngaaki, ni Besi-Horoni she mwaalo, waarakho ni bilibwa bye khukhwiikalawo. 6Aryo Solomoni aakhola shishiindu nisho shitweela khu shiriimba she Baalati, ni biriimba bibiindi mweesi baabiikhatsaka bibiindu bye khuuraambisa, kamakaali, ni Tsiŋwaaŋwa. Solomoni woombekhesa bibyoombekhe bibiindi byeesi aasiima mu Yerusalemu, ni mu Lebanooni, na buli mu shifwo shishiindi shoosi sheesi niye aaba nga awula.

7Khu mbuka iyo, yabawo babaandu be kamanaambo kakaandi babaaba nga bamenya mu shibala isho, beesi ba Isiraeli abe bakhaahesa ta. Nga mu nibo mwabamo ba Hiiti, ba Amori, ba Perizi, ba Hiivi, ni ba Yebusi. 8Babaandu bano baaba nibo babetsukhulu be kamanaambo keesi ba Isiraeli bakhaahesela ilala ta. Aryo kila Solomoni waabarakho khuuba nga nibo baraambi be kimilimo kimisiro, baryo baarama nga baakulwa be ba Isiraeli khukhwoolesa ni shaleelo shino. 9Ne mu baandu ba Isiraeli, mbaawo isi Solomoni aarakho kimilimo kimisiro kino ta. Ne khuurusakho aabawa nibo khuuraamba nga baselikhale, baakhulu be kamaye, ni babaakhola khu bye khukhwiiliinda khweewe babaakyeendela khu ŋwaaŋwa. 10Aryo Solomoni aaroborayo ni baakhulu babaandi baboola bitoondo bibili ni kamakhumi karaano (250), babaaba nga nibo babaalolelela baaraambi beewe babaaramile.

11Solomoni waarusa umukyelama weewe, uwaba umukhaana wa Faraawo, waamuyila khukhwaama mu shiriimba Yerusalemu, waamumenyisa mu lubili lweewe lushaakha lweesi aamwoombekhela niye. Shino shaba shiryo lwekhuuba aabona ari umukyelama weewe yuno sishamwaakhila khuumenya mu lubili lwa paapawe Dawudi ta. Lwekhuuba Isanduuku iye Kamakaambila y’Omukasya yaba nga imenya mu bweene imwo, yaashikhola shaaba nga shili shiifwo shikhosefu.

12Lwanyuma Solomoni wawaanayo tsisaayilo tsintsoshe isi Umukasya, nga araambisa shisheeso shishaba iburaangisi we Liisaayilo Liikhulu. 138.13 a Bala 28.9,10; b: Bala 28.11-15; c: Luky 23.14-17; 34.22,23; Bala 28.16—29.39; Maka 16.16Aawaanayo tsisaayilo tsino nga asiintsiila khu makaambila keesi Musa aawa, kakawaamba khu biifukhu bibikhali bitweela ta, nga shifukhu sha Sabato, she kumweesi kumushaakha, she kamayiiya ke kumukaati kukukhakuuta ta, she kamayiiya ke likyesa, ni she kamayiiya ke tsiweema.

14Khuukabananisa kimilimo, Solomoni aaloondelela bilakilo byeesi paapawe Dawudi, umwakaanisi wa Wele, aamuwa. Aryo waakabila basaayi khuuba mu mulimo kwaabwe, ba Levi nibo babaaba bayeeta khuuraangilila kimyeenya, khuuyeeta basaayi mu milimo kyaabwe. Waarawo baalala khuuba nga nibo babaaliinda khu bilibwa bye lumako lwe Liisaayilo Liikhulu. 15Mbaawo isaambo isi Solomoni aawukhanilakho khukhwaama khu bilakilo byeesi paapawe Dawudi aamuwa, bibiwaamba khu basaayi ni khu ba Levi, khuuloondekhana ni bye khuliinda kamabiikhilo ke buyiinga ta.

16Aryo Solomoni waabonela ilala ari buli shiindu shikholebwa nga ni baashiŋoonaŋoona; khukhwaamila ilala khu musiingi kwe Liisaayilo Liikhulu ly’Omukasya, khukhwoolela ilala khukhumaliilisa khwalyo. Kuryo kumulimo kwoosi kwaawa buulayi naabi.

17Lwanyuma lwayo, Solomoni wenyukha waatsya i Eziyoni-Geberi ni Elosi, nga nibyo bibyaba biriimba bibili bibyaba bye ba Edomu, khu ndulo khwa Inyaantsa Imbesemu. 18Umuyiinga Hiramu waamwakaanisa tsimeeri, atweela ni babaakyeendela khu meeri, babaamanya buulayi bye khuusuba khu meetsi. Bano baatsiila atweela ni basaani ba Solomoni khuutsya mu shibala sha Ofiri, baakobola nga bareerera Solomoni tsikilo kumukaanda mutweela ni bikana biraano (15,000) bye zaabu.