Swahili Bible2

7

Khuuwaanayo khwe Liisaayilo Liikhulu

(1 Bayiinga 8.62-66)

17.1: Lev 9.23-24Khaangukho Solomoni n’amala khuuloomba, kumulilo kweekha khukhwaama mwikulu, kwoosha biwaano bibyawaanibwayo byoosi. Shiriifwa she khuukhosa khw’Omukasya, sheetsa shetsula mu Lisaayilo Likhosefu. 2Basaayi baakhaasikha khukhwiinjila mu Liisaayilo Liikhulu ly’Omukasya, lwekhuuba shiriifwa sheewe sheetsula mwoositsana.

37.3: 1 Kim 16.34; 2 Kim 5.13; Ezira 3.11; Zab 100.5; 106.1; 107.1; 118.1; 136.1; Yer 33.11Lituuli lye babaandu ba Isiraeli boosi ni baabona kumulilo nga kwiikha mu Lisaayilo Likhosefu atweela ni shiriifwa sh’Omukasya, boosi baafukhamila aasi, besaaya Umukasya, nga bamuruuya bari,

“Umukasya ali umulayi,

ni khuukana khweewe khukhuukhakama ta,

khubawo biilo ni biilo.”

4Lwanyuma umuyiinga Solomoni atweela ni lituuli lye babaandu boosi, bawaanayo tsisaayilo isi Umukasya. 5Baryo baawaanayo tsisaayilo tse tsikhaafu kimikaanda kibili ni bikana bibili (22,000), ni kamasheese kumweeka mutweela ni kimikaanda kibili (120,000). Musaambo iyo, umuyiinga atweela ni babaandu boosi baawaanayo Lisaayilo Likhosefu isi Wele. 6Babaandu boosi beemikha khu ngaaki lwe kumukholo ukwo. Basaayi nibo baaba nga beemikhile mu bifwo byaabwe bibyareebwawo nga bafuura tsikhoombi tsaabwe. Ni Balevi nabo baaba nga beemikhile nga basakayisa bibisakaya bye kimyeenya, byeesi Dawudi abakholela khuraambisa nga bali mu khwisaaya Umukasya, lwe khuukana khweewe khukhuukhawawo ta.

7Khu shifukhu sheene isho, Solomoni wawaanayo lulwaanyi lulwaba iburaangisi we Liisaayilo Liikhulu, waluŋoonaŋoona khuuba lwe khukhwisaayilakho. Shino shaba shiryo lwekhuuba shisheeso sha buroonzi sheesi aba wamala khukhola, shaba shikyeekhe naabi. Aryo waaraambisa lulwaanyi ilwo khuwaanayo tsisaayilo khukhwikhoyesa Umukasya, ni biwaanibwayo bye bilime, ni khukhwoosha kiminaawa nio kiniinise isilikakha iwunya buulayi.

8Solomoni ni babaandu boosi ba Isiraeli beekhoyela mu mayiiya ako ke khuubuusaasa bilimwa, khuumala biifukhu musaafu bibuufu. Babaandu baaba baakali naabi, nga baamila ilala ibwinjiililo bweesi balaanga bari Lebo-Hamasi khu luwaande lwe ngaaki, khuutsya khwoolela ilala khu kheetsi khe Misiri, khu luwaande lwe mwaalo. 9Khu shifukhu shisheelakho nga nisho shifukhu she shinaane, babaandu boosi baabuusana atweela lwe khukhwiisaaya. Baryo bekhoyela kamayiiya kano khuumalila ilala biifukhu likhumi na bine, nga khu nibyo musaafu byaba bye khuuwaanayo shisheeso, ni bibyeelakho musaafu byaba bye khuulya kamayiiya kano. 10Lwanyuma khu shifukhu she kamakhumi kabili na bitaru she kumweesi kwe kumusaafu, Solomoni waasiibula babaandu khukhwiilakayo ingo waabwe.

Umukasya abonekhela Solomoni luundi

(1 Bayiinga 9.1-9)

11Aryo Solomoni waamaliilisa buulayi khukhwoombakha Liisaayilo Liikhulu ni lubili lweewe. Bibiindu byoosi byeesi Solomoni aŋoonaŋoona khukhola byaweela ilala buulayi. 12Lwanyumakho mu shilo, Umukasya waabonekhela Solomoni mu marooro; waamulomela ari, “Ise naawuliile khuuloomba khwoowo, naluundi naaroboore shiifwo shino khuuba shishase, mweesi kane mwooshatsakile tsisaayilo khukhuuntsisaayatsaka ise. 13Imbuka ikiindi ise inyala neekalawo likulu ifula yaalekha khuroonya ta, namwe naalakila tsiisike khuukwa khu shibala khukhwoonakisa biilime byoosi, namwe inyala naasiindikha buulwaale buukali khuutaambisa babaandu baase. 14Ne siinga babaandu baase babaalaangibwa lisiina lyase, beetsa beewosa, baaloomba, baakobola isi ise, baakamisa bubwoonaki bwaabwe, nase ndyo kane imbawuliilise, nga indi iyo mwikulu. Lwanyuma imbeyakhile bibyoonako byeenywe, naluundi imbonese liiswa lyeenywe. 15Kane indekeerese buulayi khuuloomba khwoosi khukhukhaakholebwele mu shifwo shino. 16Lwekhuuba shaleelo naaroboore, luundi naakhosesele Lisaayilo lino, khuuba lye khukhuuntsisaayilamo biilo ni biilo. Ise singene naakamise khuulirakho tsimoni tsase lwe buliindi ta, ni kumwoyo kwase kane kulibekho biifukhu byoosi.

17“Ne ari iwe Solomoni, waakha ukyeendatsake, ube umwiyikinwa isi ise nga paapawo Dawudi n’aba. Niye awulilatsaka kamakaambila kaase, ni biilakilo byase byoosi. 187.18: 1 Bay 2.4Ni nase ndyo kane iniinde bisuubiso byase byeesi namukholela niye, nga imulomela ndi ilibatsakayo umuundu mutweela khukhwaama muungo mwoowo, khuuba umuyiinga, biilo ni biilo.

19“Ne siinga iwe namwe mutweela khu baandu ba Isiraeli, ashuukha walekha khuwaamba kamakaambila kaase ni biilakilo byase, byeesi indi khuukhuboolela iwe, namwe waatsya khukhwiisaaya ba wele babaandi, 20nase indyo, indibakhuula imbaruse khu liswa lino lyeesi nabawa. Naluundi indirurawo khukhwaama mu Lisaayilo lino Likhulu, lyeesi samweene nakhosesele khukhuuntsisaayilamo. Isho shikile babaandu boosi buli aandu balikanikhekho busa nga shishiindu she khutsekhelela. 21Lisaayilo lino Likhulu ari libonekha nga limiliwu naabi. Ne bibiindu bino ni bilikholebwa, babaandu babaabira ano, balibona beyaange busa nga baloma bari, ‘Lwashiina Umukasya akholile shishiindu nga shino khu shibala sheewe shino, ni khu Lisaayilo lyeewe Likhulu?’ 22Ne she khukhwiilamo shikhaabe ndi, ‘Khulwekhuuba babaandu ba Isiraeli baaminyaala luundi baarura khu Mukasya Wele waabwe, baarakikha khukhwiisaaya ba wele babaandi, ate nga niye uwamusa bakuuka baabwe khukhwaama mu shibala she Misiri.’”