Swahili Bible2

5

15.1: 2 Sam 8.11; 1 Kim 18.11Aryo Solomoni waamaliilisa kumulimo kwe khukhwombekha Liisaayilo Liikhulu ly’Omukasya. Lwanyuma lwayo, waareera bibiindu byoosi, byeesi paapawe umuyiinga Dawudi aaba waamala khuuwaanayo isi Umukasya, nga mulimo izaabu, ifeetsa atweela ni bibiindu bibiindi bibiraambisibwa mu khwisaaya. Bino byoosi waabireera waabira mu mabiikhilo ke Lisaayilo lya Wele.

Bareera Isanduuku iye Kamakaambila mu Liisaayilo Liikhulu

25.2: 2 Sam 6.12-15; 1 Kim 15.25-28Lwanyuma Solomoni walaanga baaraangilisi boosi be bikuuka ni tsiingo tsoosi, be mu Isiraeli, khukhwiitsa babusanile atweela mu Yerusalemu. Shino shaba shiryo lwekhuuba baaba bali khuutsya khureera Isanduuku iye Kamakaambila y’Omukasya, khukyaamisa isi yaba mu Sayuuni, mu shiriimba sha Dawudi, nio bakiyile mu shifwo shishaakha mu Liisaayilo Liikhulu. 3Babaandu ba Isiraeli boosi babuusana nga umuyiinga n’abalaanga, khukhwikhoyela kamayiiya ke tsiweema mu mweesi kukwabatsaka kwe kumusaafu. 4Baaraangilisi boosi be mu Isiraeli ni baamala khukhwoolawo, ba Levi baasuta Isaanduuku iye Kamakaambila, 5baakireera mu Lisari lye Khubuusanilamo, atweela ni bibiindu bikwalaafu byoosi. Bino byoosi basaayi atweela ni ba Levi baabisuta, baabireera mu Liisaayilo Liikhulu. 6Umuyiinga Solomoni atweela ni babaandu boosi ba Isiraeli babuusana is’ali, beetsa ibweeni we Sanduuku iye Kamakaambila, baaba nga bawaanayo tsisaayilo tse kamasheese, ni tsikhaafu, byoosi atweela nga sibibalikha ta.

7Basaayi bareera Isanduuku iye Kamakaambila y’Omukasya, bakira mu shifwo shishifuura bukhosefu, shishaba mukari mu bweene she mu Liisaayilo Liikhulu. Baakiimisa mwisina mwe tsindaaha tse bakeruubi. 8Tsindaaha tse bakeruubi bano tsaaba nga tsaabalaayile khu ngaaki khwe Sanduuku iye Kamakaambila, ni kimirongoolo kyeesi baaraambisa khuukisuta. 9Kimirongoolo kino kyaba kimileeyi naabi, ni khuubonekha kyaaba nga kibonekhakho mu shifwo shishifuura bukhosefu, nga weemikhile ibwinjililo we Liisaayilo Liikhulu yonyene. Kimirongoolo kino kishiiliyo khukhwoolesa ni shaleelo shino. 105.10: Maka 10.5Mbaawo shishiindu shishiindi shishaba mu Sanduuku iyo ta, khuurusakho kamabaale kaabili keesi Musa aramo nga ali khu lukiingi Horebu5.10 Luno nilwo lukiingi Sinaayi, khu mbuka isi Umukasya aakholela indakaano ni babaana ba Isiraeli, nga nio balimalile khuurura mu shibala she Misiri.

115.11: 1 Kim 16.34; 2 Kim 7.3; Ezira 3.11; Zab 100.5; 106.1; 107.1; 118.1; 136.1; Yer 33.115.11: Luky 40.34,35Lwanyuma basaayi baarura khukhwaama mu Shifwo shishifuura bukhosefu. Basaayi bano boosi babaabawo, oba baama mu lituuli shiina, ne baanyoowa khukhwikhosesa babeene boosi. 12Ni ba Levi babaaba babeembi be kimyeenya nga nibo Asafu, Hemani, Yedusuni atweela ni basooleli baabwe boosi, ni babandaayabwe beene, boosi baaba nga bakwaarire tsingubo tsitsimelamela buulayi. Ba Levi bano baaba nga beemikhile khu lubeka lwe bwaamanyaanga lwe shisheeso, nga balikho basakayisa bibisakaya, kamatuungu, ni bye khukhweemba bibiindi. Basaayi babaandi shitoondo shitweela ni kamakhumi kabili (120), nabo beetsa baabetubaasakho nga bafuura tsikhoombi. 13Babaafuura tsikhoombi bano atweela ni babeembi be kimyeenya, baakholela atweela khuubona bari barusa kamakono ka atweela khuuwulikhikha buulayi, nga baruuya luundi nga basiima Umukasya. Nga bino byoosi byaatubaaniile atweela: be tsikhoombi, bibisakaya, ni bye kimyeenya bibiindi, boosi benyusila atweela kamakono kaabwe mu khuruuya Umukasya nga beemba bari,

Umukasya ali umulayi,

ni khuukana khweewe khukhuukhakama taawe, khubawo biilo ni biilo.

Khu mbuka nyene iyo, basaayi ni baaba nga barura, Liisaayilo Liikhulu ly’Omukasya lyetsulamo namufweeli. 14Basaayi bano sibaanyalisa khuramamwo nga beemba ta, lwekhuuba shiriifwa she khubawo khw’Omukasya shaba shimulikhamulikha luukali naabi, shaaba nga shetsuule mu Liisaayilo Liikhulu ly’Omukasya.