Swahili Bible2

34

Yosiya umuyiinga wa Yuda

(2 Bayiinga 22.1-2)

134.1: Yer 3.6Yosiya aba olesa kye bukhulu shinaane kyonyene khu mbuka isi ekyelelamo umuyiinga, wawula nga asiintsiila mu Yerusalemu khuumala kimiiko kamakhumi kataru. 2Niye akhola bibiindu biilayi bibikhoyesa Umukasya, waaba nga aloondelela she khuubonelakho shilayi sha kuukawe Dawudi, nga aloondelela byeesi Umukasya amulomela khukhola.

Yosiya akamisa bye khukhwisaaya ba wele be kamanaambo kakaandi

(2 Bayiinga 23.4-20)

3Mu mwiiko kweewe kuukhola shinaane nga ali umuyiinga, aaba nga ashiili umusooleli busa, warakikha khukhwisaaya Wele isi kuuka weewe Dawudi esaayatsaka. Lwanyuma mu mwiiko kukuukhola likhumi na kibili, warakikha khuupyeeluusa Yuda ni Yerusalemu, nga afuniaakaka bibyeeso bye khukhwisaayilakho, ni kimisiindi kyeesi besaayilakho Ashera, atweela ni bifwaani ni bibuumbe. 434.4: 2 Bay 21.3; 2 Kim 33.3Umweene waalakila ari bafuniaakake bibyeeso bye khukhwiisaayilakho Bayaali, ni bibyeeso bibyaba khu ngaaki khwabyo khweesi booshelakho bubaane, nabyo baabiminiaangulaka. Naluundi waabonela ilala ari, ni kimisiindi khweesi beesaayilakho wele umukhasi Ashera, nakyo bakifuniaakaka, ni bifwaani nabyo atweela ni bibuumbe byoosi baabiminiaangulaka, lwanyuma baasalanisaka bipatu byabyo byoosi khu ŋani ts’abo babaabisaayatsaka. 534.5: 1 Bay 13.2Naluundi Yosiya waalakila boosha kamakuumba ke basaayi be kamanaambo khu byeeso byaabwe. Aryo waaba nga apyeeluusa Yuda ni Yerusalemu.

6Waatsya waakhola shishiindu sheene nisho shitweela mu biriimba bya Manase, Efurayimu ni Simeoni, ni khuutsya khukhwoolela ilala khu lwaakha ni Nafutaali, ni biifwo bibyoonakisibwa bibyesaanewo. 7Buli aandu oosi isi aatsya mu buyiinga bwe ngaaki bwa Isiraeli, Yosiya aatsya nga afuniaakaka bibyeeso bye kamanaambo, ni khuukhupaka kimisiindi khweesi beesaayilakho Ashera. Waakhupaka bifwaani byoosi byekyela buufu busa, atweela ni bibyeeso khweesi booshelakho bubaane. Lwanyuma lwa bino byoosi nga byaaweele, waakobolayo i Yerusalemu.

Khuufuumbula shitabo she Kamakaambila

(2 Bayiinga 22.3-20)

8Mu mwiiko kwa Yosiya kukuukhola likhumi na shinaane nga ali umuyiinga mu Yuda, awo nga waamala khaale khuupyeeluusa shibala shoosi atweela ni Liisaayilo Liikhulu ly’Omukasya, waarumana Shafani umusooleli wa Azaliya, Maseya gafana wa Yerusalemu, ni Yowa umusooleli wa Yehoahazi uwaba umuroni, khuutsya khwoombekha bushaakha Liisaayilo Liikhulu ly’Omukasya.

9Basaani bataru bano baatsya isi Hilukiya uwaba umusaayi umukhulu, baamuwa tsinusu tseesi ba Levi babaaba baliinda khu shilibwa she Liisaayilo Liikhulu baabuusanisa. Tsinusu tsino baatsibuusanisa khukhwaama khu baandu ba Manase, ni ba Efurayimu, ni khukhwaama khu baandu babaaramile ba Isiraeli boosi, ni khuutubaasakho babaandu babaamenya mu Yuda, Benyamini ni mu Yerusalemu. 10Lwanyuma tsinusu tsino watsiwa basaani babaaba nga balolelela kumulimo kwe khukhwoombekha Liisaayilo Liikhulu ly’Omukasya bushaakha. Tsinusu tsino tsindala baatsiraambisa khuusasula kumukheemba kwe baraambi. 11Ne tsitsiindi tsitsiramile batsisasula babeetsi ni babombakhi, khuutsya khukula kamabaale kamabeetse, ni tsimbaawo tseesi baaba nga bakana khuraambisa khukhwoombekha bushaakha bibyoombekhe byoosi byeesi bayiinga ba Yuda baaba nga balekha busa byoonekha.

12Baaraambi baaraamba ni bubwiyikinwa buukali naabi, ni baakhulu baabwe babaabalolelela baaba nibo Yahasi ni Obadiya, nga baama mu shikuuka she ba Levi sha Merari, atweela ni Zekariya, ni Meshulamu nga nabo baama mu shikuuka she ba Levi sha Kohasi. Ba Levi babaandi babaaramile babaaba baamanyilifu naabi mu khweemba kimyeenya, 13nibo babaaba nga balolelela baasuti be bibiindu, ni naabo babaaraamba kimilimo kikikhali mitweela ta. Ba Levi babaaramile baaroborebwa khuuba baaroni, baalala khuuba baakhulu, ni babaandi khukhwiimikha nga bebuula khuuliinda shilibwa she Liisaayilo Liikhulu.

14Khu mbuka isi baaba nga balikho bareera tsinusu tseesi baabuusanisa mu Liisaayilo Liikhulu ly’Omukasya, umusaayi umukhulu Hilukiya wanyoola Shiitabo shishabamo Kamakaambila k’Omukasya, keesi aawa Musa. 15Kila Hilukiya alomela Shafani, uwaba umuroni ari, “Bona naanyoolile Shiitabo shishiilimo Kamakaambila mu Liisaayilo Liikhulu ly’Omukasya!” Lwanyuma waasuta shiitabo tsana waashakaanisa Shafani.

16Shafani naye waasuta shiitabo isho waashireera isi umuyiinga Yosiya, waamuboolela ari, “Babaakaanisi boowo balikho bakhola byoosi byeesi iwe wabalakila khuukhola. 17Tsinusu tsoosi tseesi baabuusanisa khukhwaama mu Liisaayilo Liikhulu ly’Omukasya, baatsiwaanayo isi abo babaalolelela baraambi, ni isi abo babaali khuuraamba. 18Ne O Umuyiinga, iliwo shishiindu shishiindi. Umusaayi umukhulu Hilukiya ambeele shiitabo shino.” Lwanyuma Shafani waashisomela umuyiinga.

19Ne umuyiinga n’awulila bilomo bibyasomebwa khukhwaama mu Shiitabo she Kamakaambila, woonuulaka bikwaaro byeewe mu mutaambo kumukali. 20Lubaluba waalaanga atweela Hilukiya, Ahikamu umusooleli wa Shafani, Abudoni umusooleli wa Mika, n’umuroni Shafani, atweela ni Asaya umwakaanisi weewe. Lwanyuma waabalomela ari, 21“Ni mutsye mu Liisaayilo Liikhulu, mwireebekho isi Umukasya khu lwase, ni khulwe babaandu babaaramawo ba Isiraeli ni Yuda. Tsya mwireebe khuumanya bilomo bino bibyaronebwa mu Shiitabo shino she Kamakaambila sheesi baanyoolile. Lirima ly’Omukasya lyakhiile khuuba nga lili lirafu naabi khu lweefwe, lwekhuuba baakuuka beefwe sibaawulila kamakaambila kakaaronebwa mu shitabo shino ta. Ifwe khwakhukhola byoosi byeesi shiitabo shino shiloma shiri khwaakha khuukhola ta.”

22Aryo Hilukiya atweela ni basaani bane beesi aaba nabo, baatsya khuukanikha isi umuŋoosi umukhasi Huluda. Niye aaba umukhasi wa Shalumu umusooleli wa Tikuva, umusooleli wa Hasira. Umuŋoosi umukhasi yuno niye uwaba nga aloolelela isanduuku ibiikha bikwaaro by’omuyiinga. Niye aba amenya mu shisiintsa she ngaaki she mu Yerusalemu. Ni baamunyoola ingo weewe baamukanikhayo, naye 23waabalomela ari, “Inywe baabarumaane, ne niimwileyo muboolele umusaani ubaruumaane byeesi Umukasya aloma muri, 24‘Sheesi Umukasya aloma nisho ndi; ali khuutsya khuureera shitaambiso khu shibala shino, atweela ni khu baandu babashilimo boosi. Bitsubo byoosi bibyaronebwa mu shitabo shino byeesi basomile, bitsya khwoolelela khu muyiinga wa Yuda. 25Lwekhuuba babaandu baase baayindurakho, baatsya baawaanayo tsisaayilo isi ba wele be kamanaambo, naluundi baayisaaya bifwaani byeesi babeene bekholela ni kamakhono kaabwe. Ni nashiryo baasyuubuluusile lirima lyase khu shifwo shino, silitsya khuuwawo ta.’ 26Ne ni mutsye muboolele umuyiinga wa Yuda ubarumaane khukhwiireeba isi Umukasya muri, ‘Umukasya Wele wa Isiraeli waamanyile kumutaambo kukukhuwaambile, nga n’uwuliile bari linaambo lino ni babaandu baamwo boosi batsya khuhela. 27Uwuliile kumutaambo, wewosa wamweene mu moni tsa Wele, nga n’umalile khuuwulila bilomo bino bye khuuhela, naluundi woonuulaka ni bikwaaro byoowo mu mutaambo, waalila nga wibiyiisa. Ilala naawuliile khuulila khwoowo. 28Nashiryo, singene isiindikhe shitaambiso she khuuhesa shino ta, indiikhulekha umale khuufwa, bakhuusiikhe mu lukoosi.’ ”

Baryo baasuta buurume buno khukhwaama isi Huluda, baabwisilayo umuyiinga Yosiya.

Yosiya asoma Shiitabo she Kamakaambila ka Wele

(2 Bayiinga 23.1-3)

29Lwanyuma umuyiinga Yosiya waarumanisa balaanga atweela baaraangilisi boosi be mu Yuda ni Yerusalemu. 30Aryo waatsya mu Liisaayilo Liikhulu ly’Omukasya, nga ali ni babaandu boosi ba Yuda ni be mu Yerusalemu, atweela ni basaayi ni ba Levi beene.

Baryo babaandu boosi nga baabuusaane, umweene waabasomela Shiitabo she Ndakaano, she Kamakaambila ka Wele, sheesi baanyoola mu Liisaayilo Liikhulu, nga bawuliilisile.

31Aryo nga waamalile khuubisoma, waaniina mu shifwo sheewe shishareebwawo nga sh’omuyiinga. Wemikha wakhola indakaano nga asuubisa khuuwulila byeesi Umukasya akana, nga aloondelela kamakaambila keewe, ni biilakilo byeesi baarona mu shitabo. 32Lwanyuma waalakila babaandu boosi be mu Yerusalemu, ni be mu Benyamini boosi khuukhola shisuubiso nisho shitweela sheene. Ni khuuwulilatsaka Wele isi baakuuka baabwe besaayatsaka.

33Yosiya waafuniaakaka bifwaani byoosi bibyaba mu shibala sha Isiraeli shoosi, waalakila babaandu boosi khukhwisaaya Umukasya Wele waabwe. Mu biifukhu bya Yosiya byoosi byeesi aabeela umuyiinga, mbaawo umuundu na mutweela uwaborokha waarura khu Mukasya, Wele we bakuuka baabwe ta.