Swahili Bible2

33

Manase awula Yuda nga umuyiinga

(2 Bayiinga 21.1-9,17,18)

1Manase aarakikha khuuwula nga umuyiinga nga ali ni kimiiko likhumi na kibili, lwanyuma waaba umuyiinga khuumala kimiiko kamakhumi karaano na kiraano. 233.2: Yer 15.4Manase waakhola bye bubwoonaki mu moni ts’Omukasya, nga akhola bye bubwoonaki bye mbikho, nga aloondelela bye tsisaambo tse kamanaambo keesi Umukasya aawoona khuurura mu shibala, nga ba Isiraeli bashiili khwiinjilamo ta. 3Elayo wombekha ndi luundi bibyeeso bye kamanaambo kakaandi byeesi paapawe Hezekiya aafuniaakaka. Ombekha bibyeeso bya Bayaali, luundi wombekha ni kimisiindi kye khukhwisaayilakho Ashera, wele umukhasi. Naluundi weenamisa kumurwe kweewe khukhwisaaya tsinienieesi tse mwikulu.

433.4: 2 Kim 6.6Manase ombekha bibyeeso bye khukhwisaayilakho ba wele babaandi mu Liisaayilo Liikhulu, lyeesi Umukasya umweene aalomakho ari bamwisaayilemo biilo ni biilo. 5Niye ombekha bibyeeso bino lwe khukhwiisaaya tsinienieesi mu ntsanyi tsibili tse Liisaayilo Liikhulu. 6Ni shishiindi, Manase woosha basooleli beewe nga tsisaayilo tsintsoshe mu Litila lya Beni Hinomu. Waatsyaatsaka khukhwiireeba khu bafumu ni balyuuli, khuumuwa kamakyesi, ni khuukhola bye bulosi. Aryo wakhola bye bubwoonaki bukali naabi mu moni ts’Omukasya, wasyubuluusa lirima lyeewe. 733.7: 1 Bay 9.3-5; 2 Kim 7.12-18Manase waareera shifwaani sheesi aabuumba, waashira mu Liisaayilo Liikhulu, mu shifwo shisheene mweesi Umukasya aalomela Dawudi n’umusooleli weewe Solomoni ari, “Mu Lisaayilo lino Likhulu, atweela ni mu Yerusalemu muno, nisho shiriimba sheesi indoboore khukhwiisaayilamo lisiina lyase mu Isiraeli mwoosi biilo ni biilo. 8Ne siinga babaandu baase ba Isiraeli baba babeyikinwa, baloondelela kamakaambila kaase, ni khuuleekela khweesi nawa umwakaanisi wase Musa, indyo nase siindibawanyiinyakho na khafwiiti khoosi ndi, barure khukhwaama mu shibala sheesi nawa bakuuka baabwe ta.” 9Ne babaandu ba Manase baatsya bakhoonjelesa babaandu be mu Yuda ni mu Yerusalemu mwoosi, nabo bakhola bibyoonako bibifuurakho bye kamanaambo keesi Umukasya ahesa, khu mbuka isi babaandu ba Isiraeli baaba nga benjilila mu shibala isho.

10Umukasya waakhakakho khuureewula Manase atweela ni babaandu boosi lwe bibyoonako byaabwe, ne nibo baalekha khwiinaanayo ta. 11Isho shaakila Umukasya waafukiilisa baakhulu be liiye lye ba Asiriya, khukhwiitsa khukhwiibwakala Yuda, beetsa bawaamba Manase. Lwanyuma baamurundula mu lyoolu, baaramo shirere, baamubowa kiminyololo, baamuyila nga umubowe paka i Babulooni. 12Ne Manase n’aba nga ali umubowe ibweene iyo mu mutaambo kumukali, wekoontselela Umukasya Wele weewe khuumwiiyakhila ni khuumuyeeta. 13Nga waaloombile aryo, Umukasya waareekeresa khuuloomba ukhwo, waabona nga ilala Manase kumutaambo kwaamuwaambile. Isho shaakila Umukasya waakobosa Manase i Yerusalemu, khuuwula nga umuyiinga. Khukhwaamila abweene awo, Manase waamanya ari ilala Umukasya niye Wele yenyene.

14Lwanyumakho, Manase wombekha luundi kuutikiiyi kwe bulafu kwe Shiriimba sha Dawudi Yerusalemu, waakukhola kwaaba kuleeyikho naabi khuuniina mu ngaaki. Kutikiiyi kuno aakwoombekha khukhwaama khu Litila Gihoni, lilyaba khu lubeka lwe bukwanyaanga, waakwoombekha kwaaniina kwe ngaaki paka khu shilibwa sheesi baalaanga bari she Nyeeni, khukhwibotokhelela khakiingi Ofeli. Aryo khu buli shiriimba she mu Yuda shoosi shishabakho Kutikiiyi, arakho baselikhale khukhwiibuulakho.

15Manase ndi luundi waarusaka bifwaani ni bibuumbe bye ba wele be kamanaambo kakaandi khukhwaama mu Liisaayilo Liikhulu, waafuniaakaka ni bibyeeso byeesi abe ombekha khu khakiingi aambi ni Liisaayilo Liikhulu mu Yerusalemu. Bino byoosi waabibuusilisa, waabituuma ibulafu we shiriimba. 16Lwanyuma woombekha bushaakha shisheeso sh’Omukasya, wookhelakho tsisaayilo lwe khuusiima ni khuuloomba tsikhabi. Waalakila buli muundu yeesi mu Yuda khukhwiisaaya Umukasya Wele wa Isiraeli. 17Baryo babaandu baawuliilisa sheesi Manase aababoolela, ne baarama nga beesaayila Umukasya Wele waabwe khu byeeso byaabwe biikhale byeene.

18Bibiindu bibiindi byoosi byeesi Manase aakhola nga ali umuyiinga, khuuloomba khweewe isi Umukasya Wele weewe, ni khuureewula khwoosi khwe baŋoosi; byoosi byaronebwa mu Shiitabo she Bibyaamayo bye Bayiinga ba Isiraeli. 19Khuuloomba khwa Manase, ni byoosi byeesi Wele aamwiilamo, ni khuutubaasakho bibyoonako byeewe, ni saambo isi aaminyaalila Umukasya; byoosi byaronebwa mu Burone bwa Hozayi. Hozayi aarona byoosi byeesi aakhola nga ashiili khushuukha khukobola isi Umukasya ta, mulimo luruungo lwe biifwo mweesi ombekha bibyeeso bye kamanaambo kakaandi, ni kimisiindi kye khukhwiisaayilakho Ashera wele umukhasi, ni bifwaani bibiindi. 20Aryo Manase waafwa, baamusiikha mu lubili lweewe. Lwanyuma umusooleli weewe Amoni waamwiilila mu bikyele byeewe nga umuyiinga.

Amoni awula Yuda nga umuyiinga

(2 Bayiinga 21.19-26)

21Amoni ekyela umuyiinga nga ali ni kye buukhulu kabili na kibili. Waawula nga umuyiinga nga asiintsiila mu Yerusalemu khuumala kimiiko kibili. 22Amoni waakhola bibyoonako biikali mu moni ts’Omukasya, nga paapawe Manase n’akholatsaka. Naye waaba nga awaanayo tsisaayilo isi bifwaani byoosi byeesi paapawe aabuumba, waaba nga abisaaya. 23Ne khuurusakho ndi paapawe Manase aashuukha waakobola isi Umukasya, ne Amoni wekaanila ilala khushuukha. Niye weeloosela busa khukhwooneka khufuurakho ni paapa weewe.

24Lwanyuma batweela khu baakhulu beewe baaboolanila, baamwiirira mu lubili lweewe. 25Ne babaandu ba Yuda nabo baakhoonya babeeri abo babeera Amoni, lwanyuma baarawo umusooleli weewe Yosiya nga umuyiinga.