Swahili Bible2

32

Umuyiinga Senakyeribu uwa Asiriya ebwaakala Yuda

(2 Bayiinga 18.13-37; 2 Bayiinga 19.14-19,35-37; Isaaya 36.1-22; 37.8-38)

1Lwanyuma nga Hezekiya waamalile khukhola kumulimo kuno ni bubwiyikinwa bukali, Senakyeribu umuyiinga wa Asiriya weetsa khukhwibwaakala Yuda. Aryo waatsya webwaakala biriimba bibilikho tsimako, nga ambaasa ari kane awaambe buli muundu yeesi ubilimwo.

2Ne Hezekiya n’ashimanyakho ari Senakyeribu ali khukhwiŋoonaŋoona khukhwibwaakala Yerusalemu, 3niye atweela ni baakhulu be liiye, ni basaani babaandi babaaba be kamaani, baatsya khuukhaliilisa kameetsi kakaaba keekha ibulafu we shiriimba. 4Baŋoonaŋoona baraambi baakali naabi, khuutsya khukhaliilisa kameetsi nio kalekhe khukhwiikha ta. Lwekhuuba belomela mu myoyo kyaabwe bari, “Lwashiina bayiinga ba Asiriya beetsa ano, bekhoyela khu meetsi keefwe?”

5Lwanyuma kila baraambi ba Hezekiya baaraamba ni kamaani keene, khuukhwiisawo litikiiyi lye shiriimba lilyafuniaakikha. Baryo boombekha ni kiminaala kye khukhwiliinda, naluundi boombekhayo ni liitikiiyi liliindi lye bulafu lwe khuukhiinga liitikiiyi lye mukari. Baryo baaŋoonaŋoona ni kamalowo kakaaba nga kaayitsusibwamo ni liloba, kakaaba ibwaamanyaanga we shiriimba sha Dawudi. Waalakila baakholayo bye busoolo bibiindi biikali nga nibyo kamafumo ni tsingabo. 6Waaroborayo baakhulu be kamaye khuuraangilila baselikhale. Lwanyuma waababuusanisa boosi atweela khu lwaanyi lubalaayi lulwaba iburaangisi we shilibwa she shiriimba. Kila abaloma ari, 7“Ni mwiilemo kamaani, mukume kimyoyo. Mbaawo shishikila mwaarya, namwe mweyembelela lw’omuyiinga Senakyeribu uwe ba Asiriya, atweela ni liiye lyeewe lye kamaani ilyo ta. Lwekhuuba khu lubeka lweefwe, ifwe khuli ni nooyo ufuura boosi kamaani! 8Umuyiinga uyo niye ali ni liiye lye kamaani lyeesi eyikina, ne nibo bali babaandu busa. Ne ifwe khuli n’Umukasya Wele weefwe, ukane akhuyeete, akhusoolanile busoolo bweefwe buno!”

Biryo bilomo bya Hezekiya bino byesamo naabi babaandu ba Yuda kamaani.

9Aryo nga umuyiinga yuno Senakyeribu, ni liiye lyeewe ni baaba nga bebuusiile mu shiriimba she Lakishi, waarumanisa buurume isi umuyiinga Hezekiya, atweela ni babaandu boosi be mu Yerusalemu nga buloma buri, 10“Ise ndi Senakyeribu, umuyiinga wa Asiriya, neetsile khukhwibwaakala Yerusalemu. Ari shiina shisheene sheesi inywe muli khukhwiyikina shinyala shabaramisawo? 11Hezekiya umuyiinga, ali khuubaboolela inywe ari, Umukasya Wele weenywe kane abawonese isi ise umuyiinga wa Asiriya. Ne muŋali mu bweene Hezekiya alikho abawombesa busa, atsya khukila inywe mufwe intsala ni bulesa! 12Inywe simushebulila muri Hezekiya niye mutweela mweene, uwoonakisa buuyu ni bibyeeso byoosi bye khukhwisaayilakho Umukasya? Naluundi s’ali niye uwalakila babaandu ba Yuda ni mu Yerusalemu mwoosi, khukhwisaayila khu sheeso shitweela shonyene, ni khukhwookhelakho bubaane? 13Ilala mwaakha khuuba nga mwaamanya buulayi ibyo byeesi bakuuka baase, ni nase khwakhola khu manaambo kakaandi ke mu shibala! Manya ba wele be kamanaambo ako, baanyalisa khuukhiinga liiswa lyaabwe isi buunyala bweefwe? 14Mbaawo na mutweela khu ba wele be kamanaambo ako, uwanyalisa khuukhiinga babaandu isi bayiinga ba Asiriya ta. Nashiryo, inywe mwaambaasa muri Wele weenywe kane abekho ni sheesi akhola shishifuurakho buulayi nga abakhiinga? 15Inywe mukhafukiilila Hezekiya wabawombesa musaambo yino ta! Lwekhuuba mbaawo wele na mutweela uwe linaambo lyoosi, namwe buyiinga, uwanyalisa khukhwiimikha wawonesa babaandu beewe isi ise, namwe isi bakuuka baase ta. Ni lwe lomo iyo, mbaawo sheesi Wele weenywe anyala khukhola khuubawonesa inywe khukhwaama mu bunyala bwase ta!”

16Baryo babaakaanisi ba Senakyeribu nabo baakanikha bibiindu biikali naabi bye khutyaabila Umukasya Wele, ni khuyiililamo umwakaanisi weewe Hezekiya. 17Umuyiinga Senakyeribu waarumanisaka ni tsibaluwa nga tsifwootsola Umukasya Wele wa Isiraeli. Tsibaluwa tsino tsaloma tsiri, “Nga ba wele be kamanaambo kakaandi ni baakhanyala khuuwonesa babaandu baabwe, khukhwaama isi bubwibwakali bwe liiye lye ba Asiriya, Wele wa Hezekiya isi esaaya naye kane akhaasikhane musaambo niyo ndweela nyene.” 18Babaakaanisi babaareera tsibaluwa tsino, baalookhela bilomo bino mu lulomo lu Heburaniya, nga bakana bari babaandu boosi babaaba bali mu matikiiyi ke shiriimba bawulile, luundi barye naabi, nio lwanyuma bewaaneyo. 19Babaakaanisi bano baakanikha khu Mukasya Wele, baamufwaanisa busa nga shishiindu shishikhalimo ta, khufwaananakho nga ba wele be kamanaambo kakaandi, babaabuumbibwa busa ni kamakhono ke babaandu.

Khuufwa khw’omuyiinga Senakyeribu

(2 Bayiinga 19.14-19,35-37; Isaaya 37.14-20; 37.36-38)

20Lwanyuma umuyiinga Hezekiya atweela n’umuŋoosi Isaaya umusooleli wa Amozi, kila baloomba nga bekoontselela Umukasya we mwikulu lwe buyeeti. 21Kila Umukasya arumana malayika uweetsa mu kaambi, wakhoonyaka baselikhale ba Asiriya boosi, atweela ni baaraangilisi baabwe beene.

22Musaambo iyo, Umukasya waawonesa Hezekiya, atweela ni babaandu be mu Yerusalemu boosi, khukhwaama isi bubwibwakali bwa Senakyeribu, umuyiinga wa Asiriya. Naluundi waabakhiinga khukhwaama isi baasiku baabwe babaandi boosi. Aryo waabawa lukoosi mu shibala isho shoosi. 23Khukhwaamila abweene awo, babaandu baarakikhaka khuureeraka biwaanwa mu Yerusalemu khulw’Omukasya, naluundi baareerera Hezekiya naye biwaanwa bye buukusi bwe angaaki naabi. Ni kamanaambo kakaandi ke khu shibala koosi, keesamwo Hezekiya lukoosi luukali naabi.

Bulwaale bwa Hezekiya ni khuuwonesebwa khweewe

(2 Bayiinga 20.1-3,12-19; Isaaya 38.1-3; 39.1-8)

24Mu biifukhu ibyo, Hezekiya waalwaala naabi, aambi afwe. Ne waaloomba, Umukasya waamwiilamo nga amuwa khaabonelo khe khuuwona. 25Ne Hezekiya waaba ni khukhwiiniinisa khuukali, waalekha khusiima Umukasya lwe shiisa sheesi aamwokyesanisa ta. Shino shaakila Umukasya waakhalala naabi, waawa Hezekiya atweela ni babaandu be mu Yuda ni mu Yerusalemu mwoosi shitaambiso. 26Ne Hezekiya atweela ni babaandu boosi beebiyisa lwe shishoonako she khukhwiiyiinga, baaloomba Umukasya abeyakhile. Aryo Umukasya naye waabeyakhila, waalekha khuubawa shitaambiso ta, mu mbuka iye buyiinga bwa Hezekiya yoosi.

Buyiindifu ni shiriifwa sha Hezekiya

27Hezekiya aaba umuyiindifu naabi, na buli muundu amwiisamo lukoosi. Ombekha bibyoombekhe bya buraawa naabi bye khuubiikhamwo ifeetsa, ni zaabu, ni kamabaale ke buukusi bwe angaaki ni bibiwunya buulayi, ni tsingabo, ni khutubakho bibiindu bibiindi bye kumukaso. 28Ombekhayo ni birara mwe khuubiikha bilime bibyoomu, ni iviini, ni kamafura ke kuusaala ku olivu, wombekha ni kamataala ke tsikhaafu tseewe tsoosi, ni ke kamakheese. 29Eyombekhela ni biriimba bibiindi biikali, waakulaka ni bibyaayo biikali nga nibyo kamakheese ni tsikhaafu, lwekhuuba Wele niye uwamunyalisa khuufuna buyiindifu buukali buno bwoosi.

30Hezekiya mweene yuno, niye uwombekha kumutaro kwe kameetsi, kwakareera khukhwaama mu kheetsi Gihoni khukhwiitsa mu shiriimba sha Dawudi Yerusalemu. Buli shiindu shoosi sheesi Hezekiya akhola shamutsiila buulayi. 31Yabawo ni baarume babeetsa khukhwaama i Babulooni, khukhwiitsa khureeba Hezekiya nio bamanye khaabonelo kheesi Wele amuwa, Wele walekha Hezekiya khuubawa she khukhwiilamwo shisheewe umweene, khumukhakilisa abone oba nga ilala ashiili umwiyiikinwa mu mwoyo kweewe.

Khuufwa khwa Hezekiya

(2 Bayiinga 20.20,21)

32Bibiindu byoosi byeesi Hezekiya aakhola, ni buraambi bweewe bwe bubwiyikinwa isi Umukasya, byaronebwa mu Khubonekhelwa khw’omuŋoosi Isaaya, umusooleli wa Amozi. Ne bino byoosi byaronebwa mu Shiitabo she Bayiinga ba Yuda ni Isiraeli. 33Hezekiya n’amala waafwa, baamusiikha khu lubeka lwe murwe mu ŋani tse bayiinga, lulwaba lwaalekhebwawo khusiikhatsakamo babetsukhulu ba Dawudi. Na buli mutweela mu Yuda ni mu Yerusalemu aamuwa shiriifwa isho. Lwanyuma umusooleli weewe Manase waamwiilila mu bikyele bweewe nga umuyiinga.