Swahili Bible2

28

Ahazi umuyiinga wa Yuda

(2 Bayiinga 16.1-4)

1Ahazi aaba nga olesa kye bukhulu kamakhumi kabili, khu mbuka isi ekyelela umuyiinga wa Yuda. Aryo waawula nga asiintsiila mu Yerusalemu khuumala kimiiko likhumi na kisesaba. Ne niye waalekha khukhola biilayi bibikhoyesa Umukasya nga kuukawe Dawudi ta. Aryo waaba nga akhola bye bumiinyi. 2Niye waaba nga aloondelela she khubonelakho she bubwoonaki she bayiinga ba Isiraeli. Wakhola bifwaani bye khukhwisaaya wele Bayaali. 3Buli mbuka waaba nga awaanayo tsisaayilo mu litila lya Hinomu. Ne shishifuurira ilala khuuba she mbikho shisheene, wawaanayo basooleli beewe khuuba nga tsisaayilo tsintsoshe mu mulilo. Mu bino byoosi, aba nga alikho aloondelela isaambo iye kamanaambo kamakafiili keesi Wele aawoonamwo nga ba Isiraeli bashiili khukhwiinjilamwo ta. 4Ahazi waawaanayo tsisaayilo naluundi wokhela bubaane khu byeeso bye buukafiili, ni khu ngoongo, waatsya ni khukhwisaayila aasi e shishiniini sha buli kuusaala kukwaba kuboofu kwoosi.

Ba Siriya ni ba Isiraeli bebwaakala Yuda

(2 Bayiinga 16.5,6)

528.5: 2 Bay 16.5; Isay 7.1Lweebyo byoosi, Umukasya Wele waafukiilisa umuyiinga wa Siriya khukhwibwaakala ni khuuwula Ahazi, lwanyuma baasuta babaandu ba Yuda baakali busa baabayila nga baabowe mu Damasiko. Umukasya waafukiilisa umuyiinga wa Isiraeli atweela ni baselikhale beewe khuutsya bebwaakala Yuda, baakhoonya baselikhale baayo baakali naabi. 6Khu shifukhu shitweela shonyene, Peka, umusooleli wa Remaliya, umuyiinga wa Isiraeli, waakhoonya baselikhale ba Yuda, babaafuura buurafu, baboola kumweeka mutweela ni kimikaanda kibili (120,000). Umukasya Wele we bakuuka baabwe aashifukiilisa shino shaakholikha shiryo, lwekhuuba babaandu be mu Yuda baaba baamwaantsukhile. 7Nga bali mu busoolo ubwo, Zikuri, nga niye mutweela khu basoolani ba Isiraeli, aakhoonya basaani bataru khukhwaama mu Yuda. Bano baaba nibo; Maaseya, uwaba umusooleli w’omuyiinga; Azikuramu, nga niye umukhulu we lubili lw’omuyiinga; ni Elukaana, nga niye umuro w’omuyiinga.

8Baryo baselikhale ba Isiraeli baayoola bakhasi baboola kimyeeka kibili (200,000), ni khuuyililamo ni babaana beene, lwanyuma baabayila mu shiriimba shaabwe shikhulu she Samariya. Nga bayila babaandu bano baayililakho ni bibiindu bye buyiindifu biikali byeesi baayaaya, abe yakhaba nga babaandu ba Yuda baaba bandayaabwe.

Umuŋoosi Odedi ekiitsa Isiraeli

9Aabawo umuŋoosi isi baalaanga bari Odedi, uwaba mutweela khu baŋoosi b’Omukasya nga abe amenya mu Samariya. Umweene yuno waatsya khukhwaakaanana ni liiye lya Isiraeli nga bakobola khukhwaama mu Yuda. Waabalomela ari, “Umukasya Wele we bakuuka beenywe abanyalisile inywe khuuwula liiye lya Yuda, lwekhuuba abeele waabakhalaliile nibo naabi. Ne bona inywe mwaabakhoonyeele mu lirima lye kamaani naabi, akhali khuusaasila khwoosi ta. 10Ari bona inywe mulikho mwirekekha khuuyila babaandu bano, babaama mu Yuda ni Yerusalemu khuuba nga baabowe beenywe. Shiryo nanywe kane mube ni buubi bwe khukhwoneka isi Umukasya. 11Ngana ari mundekeerese buulayi, ni mulekhuule baabowe bano beeleyo ingo waabwe, lwekhuuba bali babaandayeenywe. Siinga mulekha khukhola muryo ta, Umukasya naye atsya khuubawa inywe shitaambiso she kamaani naabi!”

12Khu mbuka nyene iyo, aabawo baaraangilisi bane be ba Isiraeli baboolawo. Bano baaba nga nibo Azariya, umusooleli wa Yohanani, Berekiya umusooleli wa Meshilemoti, Yehizikiya umusooleli wa Shalumu, ni Amasa umusooleli wa Hadilayi. Basaani bano baafukiilisana ni Odedi, nabo nga bakhaandisa sheesi liiye lya Isiraeli lilyaba nga likobola khukhwaama mu busoolo lyakhola. 13Kila baloma bari, “Inywe simunyala khureera ano mu Samariya baabowe bano ta. Ifwe sikhunyala khwalooselakho khu shoonako sheefwe sheesi khuli nasho isi Umukasya ta. Lwekhuuba niye lirima lyeesi ali nalyo isi khuli lili liikali naabi, likhumala.”

14Baryo baselikhale babeetsa ni baabowe abo, baabalekha awo mu moni tse baaraangilisi ni babaandu, atweela ni bye buyiindifu byeesi beetsa nabyo khukhwaama mu Yuda. 15Baraangilisi tsana babaaba bane abo, benyukhilamo baabukula bikwaaro bibyaba mu biindu byeesi beetsa nabyo, baabikabananisa isi baabowe babaaba nga bali bukhuna bari bakwaare. Lwanyuma baabawa bikwaaro ni tsisapata khuukwaara, baabawa ni biilyo, ni bye khuunywa bibibamala. Baryo baabasiinga ni kamakoontsyo keesi baaba ni nako, baakaramo kamafura ke kuusaala ku olivu. Lwanyuma bekhasa abo babaaba nga bali batoro khu sikilya, baabaraangilila baabeesayo i Yeriko, shiriimba shishaba shaamanyikhana lwe kamasheendu. Lwanyuma lwayo baaraangilisi bano baakobolayo i Samariya.

Ahazi aloomba buyeeti khukhwaama isi umuyiinga wa Asiriya

(2 Bayiinga 16.7-9)

16Khu mbuka iyo, Ahazi umuyiinga wa Yuda waarumanisa isi umuyiinga wa Asiriya ari amuyeete. 17Lwekhuuba khu mbuka yino ndi baselikhale ba Edomu bebwaakala luundi baawula Yuda, baasoombayo babaandu baabayila nga baabowe. 18Khu mbuka nyene niyo ndweela, ba Filisitiya nabo beetsa baanuula biriimba bibyaba bye mu ngoongo ibukwanyaanga, nga nibyo Shefela ni Negevu. Baryo baaba nga bawaambakile biriimba bya Besi Shemeshi, Ayijaloni, Gederosi, Soko, ni khuyililamo bibyaalo bibyebotokhelelawo. Baayila ni Timuna, atweela ni bibyaalo bibyebotokhelelawo, ni khutubakho Gimuzo atweela ni bibyaalo bibyebotokhelelawo. 19Bitaambiso byaba biikali naabi biryo lwekhuuba Ahazi aba nga waaminyaalila naabi Umukasya, naluundi s’akhakakho khukhaangabisa babaandu khulekha khwoneka ta. 20Aryo umuyiinga Tigulasi Pilesa uwa Asiriya, weetsa ni kamaani kamakali, mu shifwo she khumuyeeta, waloosela busa khukhwoonakisa bibiindu. 21Ahazi waamuwaka bibiindu biikali nga biwaanwa, nga abyaamisaka mu Liisaayilo Liikhulu ly’Omukasya, ni bibiindi khukhwaama mu lubili lw’omuyiinga, ni bibiindi waabyaamisaka mu tsiingo tse baaraangilisi ba Isiraeli babaandi. Ne byakhaba biryo, umuyiinga wa Asiriya s’ayeeta Ahazi ta.

Shishoonako sha Ahazi shishakamayo ni khuufwa khweewe

22Abe yakhaba nga bibiindu bikosi bino byakholekha, umuyiinga Ahazi eloosela busa mu moni khukhwoonakisa isi Umukasya, ni khufuurakho makiboole. 23Lwekhuuba awaanayo tsisaayilo isi ba wele be Damasiko, babaamureerera khuwulibwa, nga elomela mu mwoyo kweewe ari, “Bona ba wele bano baayeetile umuyiinga wa Siriya khukhufuura ise mu busoolo, siinga imbawaanayo tsisaayilo, nase kane banjeete.” Ne shalekha khuba nga n’ambaasa ta, shamureerera busa niye umweene khuhela atweela ni babaandu ba Yuda boosi.

24Aryo umuyiinga Ahazi waabukula bibiindu khukhwaama mu Liisaayilo Liikhulu lya Wele, wabiminiaangulaka mu bupatu. Lwanyuma wekalakawo kimilyaango kye Liisaayilo Liikhulu, nio ilekhe khuubawo umuundu utsyamo khukhwisaaya ta. Lwanyuma warawo bibyeeso mu Yuda mwoosi ni mu Yerusalemu mweene, bye khukhwisaayilamo ba wele babaandi bibikhali bitweela ta. 25Aryo wombekhaka bibyeeso mu buli shiriimba shiboofu ni shifwiiti mu Yuda, bye khukhwisaayilakho ba wele babaandi. Bino byoosi byasyubulukusa lirima ly’Omukasya, Wele we bakuuka beewe.

26Bibiindu byoosi byeesi Ahazi aakhola mu mbuka isi abeela nga umuyiinga, khukhwaamila ilala makiboole khukhwoola khu ntsakamo, byaronebwa mu Shiitabo she Bibyaamayo bye Bayiinga ba Yuda ni Isiraeli. 2728.27: Isay 14.28Lwanyuma nga wafwiile, baamusiikha mu Yerusalemu, ne nga sibaamusiikha mu ŋani tse bayiinga ta. Umusooleli weewe Hezekiya waamwiilila mu bikyele nga umuyiinga.