Swahili Bible2

25

Amaziya umuyiinga wa Yuda

(2 Bayiinga 14.1-6)

1Amaziya aaba waayolesa kye bukhulu kamakhumi kabili na kiraano, mu mbuka isi aarakikhila khuuwula nga umuyiinga. Lwanyuma waawula khuumala kimiiko kamakhumi kabili na syeenda, nga asiintsiila mu Yerusalemu. Maayi weewe aaba bari Yehoyadani, uwe mu Yerusalemu mweene. 2Abe yakhaba nga Amaziya aakhola bibiindu bibikhoyesa Umukasya, ne s’ewaanilayo ilala ni kumwoyo kweewe kwoosi ta.

3Aryo Amaziya n’amala khuuba nga waamalile khukhwiyilila buyiinga bwoosi, awaambaka luundi wakhoonyaka baaraangilisi babaakhoonya paapa weewe. 425.4: Maka 24.16Ne shonyene ndi, s’akhoonyaka babaana be babeeri abo ta, lwekhuuba aba nga aloondelela likaambila ly’Omukasya lilyaronebwa ni Musa mu Shiitabo she Kamakaambila, nga liloma liri, “Basaali sibaakha beeribwa lwe bubwoonaki bwe babaana baabwe ta, namwe babaana beeribwa lwe bubwoonaki bwe basaali baabwe ta.”

Khuuwulibwa khwa Edomu

(2 Bayiinga 14.7)

5Lwanyuma Amaziya waarumanisa buurume mu bikuuka bya Yuda ni mu bya Benyamini, walaanga khuubuusanisa atweela babaaba boolesa kimiiko kamakhumi kabili kye bukhulu ni khuutuumakho awo. Ne n’amala waabalililamo babaandu baaba nga boolele kimyeeka kitaru kimibuufu (300,000), khukhwaama mu Yerusalemu, nga bali ni bumanyilifu bwe khuusoolanisa ni kamafumo, atweela ni tsingabo. Amaziya waakabananisamo baselikhale bano khuusiintsiila khu bikuuka byaabwe, nga buli lituuli lili aasi e baakhulu babaanyala baabaraangilila. 6Amaziya ndi waapaangisayo baselikhale babaandi baboola kumweeka mutweela (100,000), nga araambisa tsikilo bikana bitaru ni bitoondo bine (3,400) tse feetsa khuubakulilila.

7Ne mutweela khu baŋoosi ba Wele weetsa waalomela Amaziya ari, “O umuyiinga, ukharaambisa baselikhale beesi upaangisile bano baatsya ni nawe mu busoolo ta. Lwekhuuba Umukasya waakhufukiilisakho khuuyeeta na mutweela khu baandu ba Efurayimu bano ta. 8Iwe siinga ubafukiilisa khuutsya ni nawe, kane baasiku boowo bakhuwule, abe waakhabasoolanisa urye! Wele umweene niye uuli ni bunyala khuukhalawo umuundu khuuwula mu busoolo namwe khuuwulibwa.”

9Amaziya weelamo isi umuŋoosi ari, “Ne ari ise inakhola ndyeena khulwe feetsa isi ise isasuule baselikhale bano boosi?”

Umuŋoosi naye waamwiilamo ari, “Umukasya umweene kane akhwiisilewo ifeetsa ifuura iyo isi iwe wasasulayo.”

10Aryo Amaziya waalakila baselikhale babaama mu Efurayimu khukhwiilayo ingo waabwe. Ne khuurusakho ndi shishiindu shino she khukhwiilayo shaabakhalasa naabi, beelayo nga bali ni lirima liikali naabi.

11Lwanyuma Amaziya weelamo kamaani, waraangilila liiye lyeewe khuutsya khwoola mu Litila lye Kumuunyu, ibweene iyo wanyalisa khuukhoonya baselikhale ba Edomu baboola kumukaanda mutweela (10,000). 12Niye atweela ni liiye lyeewe bawaambakayo baselikhale babaandi baboola nabo kumukaanda mutweela (10,000), babayila baboolisa khu lumya luleeyi naabi, babaakholowayo boosi. Baryo baakwa ilumya iyo, bahelela iyo mu mabaale.

13Bino byoosi biba biryo, baselikhale tsana ba Isiraeli beesi Amaziya aasibula khukhwiilakayo ingo waabwe, baatsya bebwaakala biriimba bye mu Yuda bibyaba akari a Samariya ni Besi-Horoni. Ibweene iyo baakhoonyayo babaandu baboola bikana bitaru (3,000), bayaaya bibiindu biikali naabi.

14Ne lwanyuma Amaziya n’akobola i Yerusalemu khukhwaama mu busoolo isi aakhoonyakila babaandu ba Edomu, wetyuukhaka ba wele be ba Edomu. Aryo waabareera waabeemisawo khuuba ba wele beewe, waarakikha khuubesaaya, nga awaanayo tsisaayilo tsintsoshe. 15Shino sheesi aakhola shaakhalasa naabi Umukasya. Aryo waarumana umuŋoosi, waatsya waareeba Amaziya ari, “Iwe lwashiina ukhalilewo khukhwiisaaya ba wele bano be kamanaambo, babaakhaanyalisa khuuwonesa babaandu beesi iwe wamweene watsiile webwaakala?”

16Ne umuŋoosi n’aba nga ashikanikha aryo, Amaziya waamwiilakamo khaangu ari, “Iwe wekyelile liina khuuba umuwi wase uwe kamakyesi? Yaakamisila awo khaangu. Ukhalomayo ilomo ikiindi ta. Inyala naakhwiira nakhukhwiira!”

Aryo umuŋoosi uyo waakamisila abweene awo. Ne waalooselakho khaangu ari, “Ise naamanyiile ilala ndi, Wele waakhalilewo khuukhuhesa iwe, lwekhuuba bona iwe woonakisile nga ukhola shishiindu shishifwaana shiri, naluundi waalobile khuwuliilisa kamakyesi keesi ise ikhuwa.”

Ba Isiraeli bawula ba Yuda

(2 Bayiinga 14.8-14)

17Lwanyumakho nga umuyiinga Amaziya waamalile khuufuna kamakyesi khukhwaama isi baawi beewe be kamakyesi, waarumanisa buurume isi umuyiinga Yehoashi, umusooleli wa Yehoahazi, umwitsukhulu wa Yehu, nga buloma buri, “Yiitsa untsakanane mu busoolo.”

18Yehoashi umuyiinga wa Isiraeli naye waamwiilamo nga aloma ari, “Aabawo lutweela, kamarakalu ke mu Lebanooni kaŋoonaŋoona bukhwaale akari o umusooleli wako, n’umukhaana we kumuruumba kumuboofu. Ne lwanyuma isolo ye mwirome yeetsa yaakhaandakilila kamarakalu! 19Ari Amaziya iwe ulikho waambaasa uri uli uwe kamaani naabi lwekhuuba wawulile liiye lya Edomu, ni kumwoyo kwoowo kwaaba nga kwetsuule khusangaala nga wiyiingayiinga. Ne kamakyesi kaase keesi ise ikhuwa inoma ndi n’urame ingo woowo. Ari lwashiina ulikho usokosana busoolo, bubunyala bwakhureerera iwe atweela ni babaandu be mu buyiinga bwoowo bwe mu Yuda khuhela?”

20Ne Amaziya waalekha khuuwuliilisa ta, lwekhuuba Wele umweene niye uwakhola kumwoyo kweewe khuuba kumumiinyi. Shaba shiryo lwekhuuba Wele aaba akana khuumuwaanayo mu mikhono kye baasiku beewe bamuhese, lweesho sheesi aakhola she khukhwisaaya ba wele be ba Edomu. 21Aryo Yehoashi umuyiinga wa Isiraeli waaraangilila liiye lyeewe, baakhuumba khuutsya khwaakaanana ni Amaziya umuyiinga wa Yuda. Kamaye kano koombi kaakaananila mu shiriimba Besi Shemeshi, shishaba she mu Yuda. 22Mu busoolo buno, liiye lya Yuda lyaawulibwa buubi naabi ni liiye lya Isiraeli. Buli muselikhale wa Yuda yeesi waatima weelayo ingo weewe. 23Aryo Yehoashi umuyiinga wa Isiraeli waawaambila Amaziya, umusooleli wa Yowashi, umwitsukhulu wa Ahaziya, i Besi Shemeshi. Lwanyuma waatsya ni naye, waatsya webwaakala Yerusalemu, waafuniaaka kuutikiiyi kwakhwo, khukhwaamila ilala khu shilibwa shishilolelela i Efurayimu, khukhwoola khu shilibwa sheesi baalaanga bari Koona, nga buubalaayi bwawo abe bwoola tsimita bitoondo bibili (200). 24Lwanyuma waasutaka i zaabu yoosi atweela ni feetsa nyene, ni bibiindu bibiindi byoosi bibyaba bye buukusi bwe angaaki khukhwaama mu Liisaayilo Liikhulu lya Wele, lilyaba liliindibwa ni babetsukhulu ba Obedi-Edomu. Aryo waatsya waanuula ni bye buyiindifu khukhwaama mu lubili lw’omuyiinga, wawaambaka ni babaandu babaandi waabayila nga baabowe, lwanyuma weelayo i Samariya.

Khukhwiiribwa kwa Amaziya

(2 Bayiinga 14.15-20)

25Amaziya umuyiinga wa Yuda aamenyawo khukhwoolesa kimiiko likhumi na kiraano, lwanyuma lwe khuufwa khwa Yehoashi, umuyiinga wa Isiraeli. 26Bibiindu byoosi byeesi Amaziya aakhola nga ali umuyiinga, khukhwaamila ilala makiboole khukhwoolela ibumaliiliso, byaronebwa mu Shiitabo she Bibyaamayo bye Bayiinga ba Yuda ni Isiraeli.

27Mu mbuka isi Amaziya aarakikhila khuuminyaalila Umukasya, babaandu nabo baarakikha khuumukhalila luwomelo mu Yerusalemu. Isho shaakila waatitukha waatsya i Lakishi. Ne ni bweene iyo, babaandu babaandi baamuwaamba, baamwiirirayo. 28Baasuta kumulaambo kweewe, baakuyila i Yerusalemu nga bakusutila khu mukoongo kwe ŋwaaŋwa, baatsya baakusiikha aambi ni bakuuka beewe mu shiriimba sha Dawudi.