Swahili Bible2

24

Yowashi umuyiinga wa Yuda

(2 Bayiinga 12.1-16)

1Yowashi aba olesa kye buukhulu musaafu kyonyene khu mbuka isi ekyelela umuyiinga wa Yuda. Aryo wawulila mu Yerusalemu khuumala kimiiko kamakhumi kane kimibuufu. Lisiina lya maayi weewe aba bari Zibiya uwaba aama i Berisheba. 2Yowashi wakhola bibiindu bibikhoyesa Umukasya, nga awulila kamakaambila keewe, imbuka isi Yehoyada abeela nga ashiili mulamu. 3Aryo Yehoyada waamuroborerayo bakhasi babili, beesi aayila khuuba baakyelama beewe, waasaala ni nabo babaana basooleli ni bakhaana.

4Lwanyuma nga imbuka yaabirirewo, Yowashi waakhalawo khuuŋoona ni khukhwiisa buyaakha Liisaayilo Liikhulu ly’Omukasya. 5Kila alaanga atweela basaayi ni ba Levi, waabalomela ari, “Ni mutsye buli aandu oosi mu Yuda, mubuusanise kumusolo khukhwaama mu baandu. Ingana shino shikholekhe mu bwaangu naabi, lwekhuuba khulikho khukanayo kamapeesa ke khukhwiyeetisa khuuŋoona khwiise buyaakha Liisaayilo Liikhulu lya Wele.”

Ne ba Levi baalekha khukhwinyukhilamo ta.

624.6: Luky 30.11-16Kila umuyiinga arumanisa Yehoyada umusaayi umukhulu khukhwiitsa waamureeba ari, “Lwashiina iwe ukharumanisile ba Levi khuutsya baabuusanisa kumusolo khukhwaama mu biriimba bya Yuda ni mu Yerusalemu mweene? Umwakaanisi wa Wele Musa aarawo kumusolo kuno khu baandu ba Isiraeli, nio kunyalise khuuyeeta mu khwiimisawo intsu ya Wele iye Ndakaano.”

7Shaba shiryo lwekhuuba baloondeleli ba Ataliya, umukhasi umumoyaani uyo, baaba baayonakisa Liisaayilo Liikhulu lya Wele, baatsya baasuta bibiindu byamwo bikhosefu, baabiyila mu khwisaaya ba Bayaali.

8Aryo Yowashi waalakila baakholayo lisaanduuku, baalireera, baalira i buraangisi aambi ni shilibwa shishinjila mu Liisaayilo Liikhulu ly’Omukasya. 9Baarumanisa buurume bwaatsya buli aandu oosi mu Yuda, ni mu Yerusalemu mwoosi, nga bukhupilisa babaandu khuureera kumusolo isi Umukasya, nga Musa, umwakaanisi wa Wele n’alakila ba Isiraeli boosi khuukhola nga bashiili mu mubiimbi. 10Shino shekhoyesa naabi baaraangilisi atweela ni babaandu boosi, shaakila baareera kamapeesa kaabwe, baakara mu lisanduuku, khukhwoolesa ni lyeetsulamo kamapeesa.

11Abe buli lweesi lisanduuku lino liitsulilamo kamapeesa, ba Levi balisuta baaliyila mu Liisaayilo Liikhulu isi baakhulu b’omuyiinga. Lwanyuma umuroni w’omuyiinga, n’umuro w’omusaayi ufuura buukhulu, baayila kamapeesa ako baakabala. Lwanyuma nga baakarusilemo, beesayo lisanduuku mu shifwo shalyo ibulafu luundi. Shino shakholekha shiryo buli shifukhu, shaakila baabuusa kamapeesa kamakali luukali. 12Baryo umuyiinga ni Yehoyada baasuta kamapeesa tsana ako, baakawa babaakhulila kumulimo kwe Liisaayilo Liikhulu. Nabo baaraambisa kamapeesa kano baapaangisa babaarema kamabaale, ni baabeetsi be tsimbaawo, ni naabo babaaba ni bumanyilifu mu bye bibyuuma bya ayoni ni buroonzi.

13Baryo babaandu babaaba mu mulimo kuno baaraamba ni kamaani keene, kumulimo kwaatsya mu moni buulayi. Baaŋoona Liisaayilo Liikhulu baalikobosayo khuuba mu shifwaani shalyo shisheene, balihangasa buulayi. 14Kumulimo kuno ni kwawa buulayi, baasuta kamapeesa kakaaramakho, baakareera isi umuyiinga Yowashi ni Yehoyada. Karyo karaambisibwa khuukakholamo bibiindu bibiindi bibyaraambisibwa mu khwisaaya mu Liisaayilo Liikhulu ly’Omukasya. Ni bibiindi byaba bye khukhwookhelakho biwaanwa, ni bye bubaane, ni bibiindi bibyaama mu zaabu ni feetsa. Biryo biwaanwa bibyooshe byaawaanibwayo buli mbuka mu Liisaayilo Liikhulu ly’Omukasya, imbuka yoosi isi Yehoyada aabeela nga ali mulamu.

15Aryo Yehoyada wahangaala naabi mu miiko, waafwa nga waayolesa kye buukhulu shitoondo shitweela ni kamakhumi kataru (130). 16Baamusiikha atweela ni bayiinga mu shiriimba sha Dawudi mu Yerusalemu, lwekhuuba aakhola kumulimo kumulayi naabi khulwe babaandu ba Isiraeli, khulwa Wele ni lwe Liisaayilo Liikhulu.

Yowashi arura khu Mukasya

17Lwanyuma lwe khuufwa khw’omusaayi Yehoyada, baaraangilisi be mu Yuda beetsa baakanikhanamwo n’umuyiinga Yowashi, baamukhoongelesa khuuwuliilisa kamakyesi kaabwe. 18Baryo baakhalawo khukhwaakamisa khukhwisaayila mu Liisaayilo Liikhulu ly’Omukasya, Wele isi bakuuka baabwe besaayatsaka, baarakikha khukhwisaaya bifwaani ni kimisiindi kya wele umukhasi Ashera. Lwe shishoonako shino shiikali, shaakila Wele waakhalalila naabi babaandu beewe be mu Yuda ni Yerusalemu. 19Ne Wele niye waarama nga abasiindikhila baŋoosi khuubakobosa isi ali. Baŋoosi bano baatsya bareewula babaandu, ne nibo baalekha khufukiilila khuubarekeeresa ta.

2024.20: Mat 23.35; Luka 11.51Lwanyuma Umwoyo wa Wele weekha khu musaayi Zekariya umusooleli wa Yehoyada. Kila emikha iburaangisi we babaandu waabalomela ari, “Wele ali khuuloma ari: Lwashiina mulikho mumiinyaala, mwaalekha khuwuliilisa kamakaambila keewe? Sheesi mukholile kane shibareerere busa shitaambiso. Ari nga ni mumwantsukhile niye, naye aryo kane abaantsukhe inywe.”

21Baaraangilisi baamukhalila kamakyesi ke khuumwiira, n’umuyiinga Yowashi nga waalakiile, baamukhupa kamabaale, baamwiirira khu lwaanyi lwe Liisaayilo Liikhulu ly’Omukasya. 22Musaambo iyo, umuyiinga Yowashi waalekha khushebulila shiisa sha Yehoyada paapawe wa Zekariya, sheesi aamwokyesanisa ta, ne waakhalawo khukhwiira umusooleli weewe. Ne Zekariya n’aba nga ali khuufwa, waaloma ari, “Inoomba ndi khali Umukasya aboone sheesi bali khuukhola, abeliyaasa khuufwa khwase.”

Intsakamo ye buwuli bwa Yowashi

23Kumwiiko ni kwaba nga kutsya khuwakho, liiye lye ba Siriya lyeetsa khukhwibwaakala Yowashi. Liiye lino lyeetsa lyebwaakala Yuda, beeraka baaraangilisi be linaambo boosi. Baabuusaka bibiindu bye buyiindifu byoosi khukhwaama mu Yuda, babyakaanisayo isi umuyiinga waabwe mu Damasiko. 24Liiye lye ba Siriya lino lyakhaba nga lyaba likyeekhe liri, ne Umukasya aabanyalisisa khuuwula liiye lya Yuda liboofu lilyeene. Lwekhuuba aaba nga alikhuwa Yowashi shitaambiso atweela ni babaandu ba Yuda boosi, lwe khushuukha baarura khu Mukasya, Wele isi bakuuka baabwe besaayatsaka. Khuryo khuutaambisibwa khuno khwaaba khwoolile khu Yowashi.

25Baryo baselikhale ba Siriya ni baamala khuutsiinisa Yowashi naabi, baarurawo baatsya. Ne baakhulu beewe babamwaakaanisatsaka babeene baakhalawo khuumwiira, lwekhuuba niye aakhoonya Zekariya umusooleli w’omusaayi Yehoyada. Baryo bebuula baakhoonya Yowashi nga ali mu bulili bweewe. Lwanyuma baamusiikha mu Yerusalemu, ne akhuba mu ŋani tse bayiinga ta. 26Abo babaaboolanila khukhwiira Yowashi baaba Zabadi umusooleli w’omukhasi umu Amoni bari Shimeyasi, atweela ni Yehozabadi umusooleli w’omukhasi umu Mowabu bari Shimuriti.

27Luukano lwe basooleli ba Yowashi, ni bye buŋoosi byoosi bibimuwaambakho, atweela ni saambo isi esamo Liisaayilo Liikhulu lya Wele bushaakha, byoosi byaronebwa mu Shiitabo shishisontsoola luukano lwe Bayiinga. Umusooleli weewe Amaziya niye uweelawo mu bikyele byeewe nga umuyiinga.