Swahili Bible2

23

Yehoyada ekyelisa Yowashi khuuba umuyiinga wa Yuda

(2 Bayiinga 11.4-21)

1Lwanyuma mu mwiiko kukweelakho, umusaayi Yehoyada waakhalawo khuubona ari ibawo shishikholekha. Shikila akhakakho naabi khuubona ari afuna buyeeti bwe baakhulu be kamaye. Baakhulu beene bano baaba nga nibo; Azariya umusooleli wa Yehoramu, Ishimaeli umusooleli wa Yehohanani, Azariya umusooleli wa Obedi, Maaseya umusooleli wa Adaaya, ni Elishafati umusooleli wa Zikuri. 2Baakhulu be kamaye baraano bano benyukhilamo mu shimoonyo busa, baatsya buli aandu mu biriimba bye mu Yuda, balaanga atweela ba Levi ni baakhulu babaraangilila bukuuka bukyeekhe mu Isiraeli. Bano boosi beetsa babuusana mu Yerusalemu. 323.3: 2 Sam 7.12Baabuusanila khu Liisaayilo Liikhulu, baakhola indakaano iye khuyeeta Yowasi, umusooleli w’omuyiinga.

Yehoyada waabalomela ari, “Bona ari ano khuliwo ni Yowashi umusooleli w’omuyiinga. Imbuka yoolile niye khuuba umuyiinga weefwe uwilakho. Umukasya wasuubisa khaale busa ari, umwitsukhulu wa Dawudi niye uwaakha khuuwula nga umuyiinga. 4Ari sheesi mwaakha khuukhola nisho shino. Nga basaayi ni ba Levi beetsile khuukhola kumulimo kwaabwe khu shifukhu sha Sabato, lituuli litweela libe nga liibuula khu shilibwa she Liisaayilo Liikhulu, 5lituuli liliindi liibuule khu lubili lw’omuyiinga, lituuli liliindi libuule khu Shilibwa she Kumusiingi. Ne babaandu babaaramile mweesi murame nga mwebuusile mu ntsanyi tse Liisaayilo Liikhulu. 6Mwaakha mushebulile muri basaayi ni ba Levi babaali khu luruungo lwe khuraamba khu shifukhu isho, nibo bonyene babaali ni khukhwinjila mu Liisaayilo Liikhulu, lwekhuuba nibo bonyene babaroborebwele khuuba babapyeelukhile. Ne babaaramile boosi baakha khurama ibulafu we tsintsanyi tse Liisaayilo Liikhulu, nga Umukasya n’alakila. 7Ne inywe ba Levi mwaakha khukhwiimikha nga mwaakhiingile umuyiinga Yowashi khuumwibotokhelela akhabonekhakho ta. Shino mushikhola nga mwasoolileyo tsiindima tseenywe, khukhwiira buli muundu yeesi uwiitsa mu Liisaayilo Liikhulu.”

8Baryo ba Levi atweela ni babaandu boosi be mu Yuda, baakhola buli shiindu shoosi nga umusaayi Yehoyada n’abalakila. Baryo mbaawo umuliindi na mutweela isi baafuukiilisa khuukobolayo ingo weewe, lwanyuma lwe khuumaliilisa kumulimo kwe shifukhu ta. Buli mukhulu we liiye waaramawo nga ali ni baselikhale beewe boosi, abo babaaba nga baamalile kimilimo kyaabwe nga bakana khuloota, ni naabo babaaba nga balikho benjila khuuraamba. 9Lwanyuma Yehoyada wenjila mu Liisaayilo Liikhulu, waareera tsiindima, kamafumo ni tsingabo tsimboofu ni tsinjeekhe tseene tsoosi, tsitsaba ts’omuyiinga Dawudi, waatsikabakila baakhulu be kamaye. 10Nabo baatsikabila baaliindi, kila Yehoyada akhakakho khuubona ari bakhiinga umuyiinga buulayi, nga beerekekhile ni bye busoolo byaabwe. Buli mutweela weemikha mu shifwo sheewe, nga bebotokheleele Liisaayilo Liikhulu lyoosi, ni khukhwibotokhelela shisheeso shoosi, khuubona bari bakhiinga umuyiinga khu buli lubeka.

11Lwanyuma kila Yehoyada ni basooleli beewe baarusa Yowashi ibulafu, baamukwaarisa lihabi khu murwe kweewe, lwanyuma baamufuumbasa shiitabo she kamakaambila ka Wele, kakawaambakana ni khuuwula linaambo. Lwanyuma baamutsukhakho kamafura khu murwe kweewe, nga bamulaangilila niye khuuba umuyiinga, kila buli mutweela alaangilila ni likono lye angaaki ari, “Ubewo luleeyi umuyiinga!”

12Ne Ataliya n’awulila liyoombo ilyo, nga babaandu batimaka iyi ni neeyi, naluundi nga baruuya umuyiinga, wenyukhilamo waatsya khu Liisaayilo Liikhulu ly’Omukasya, khuutsya khubona shiina shishiili khuutsya mu moni. 13Nga waamalile khukhwoolayo, waabona Yowashi nga weemikhile aambi ni kutweela khu misiindi kikiili ibwinjililo we Lisaayilo, nga nisho shishabatsaka shiifwo sh’omuyiinga. Naluundi waabona baakhulu be kamaye ni babaafuura tsikhoombi, nga beemikhile aambi ni naye, nga babeembi be kimyeenya bali khuukhupa kamatuungu kaabwe, naluundi nga balikho baraangilila babaandu boosi mu khwikhoya khuno. Lwa bino byoosi, Ataliya woonuulaka bikwaaro byeewe ni kumutaambo kumukali nga alaangilila ari, “Mwaandiilemo luwomelo! Mwaandiilemo luwomelo!”

14Khaangukho umusaayi Yehoyada waalakila baakhulu be kamaye tsana ari, “Mukhamwiirira aambi ni Liisaayilo Liikhulu ly’Omukasya ta. Ni mumuruse mumuyile ibulafu iburaangisi we baselikhale, ibweene iyo mukhoonye na buli muundu yeesi uwiitsa khuumukhiinga.” 15Baryo kila bawaamba Ataliya, baamuyila ibwinjililo isi tsiŋwaaŋwa tsinjilila mu lubili, baamukhoonyela abweene awo.

Tsishuukhashuukha tsa Yehoyada

16Lwanyuma umusaayi Yehoyada umweene, atweela n’umuyiinga Yowashi ni khuutubakho babaandu boosi, betubaasa atweela baafukiilisana khuukhola indakaano iye khuuba babeyikinwa isi Umukasya. 17Lwanyuma kila bekhuula boosi atweela baatimaka baatsya khu lisaayilo lya Bayaali, baalikhupaka, baalifuniaakaka. Baryo boonakisaka ni bibyeeso byoosi, baafuniaakaka ni bifwaani byayo byoosi. Lwanyuma beera ni Matani uwaba umusaayi wa Bayaali, nga bamwiirira iburaangisi we bibyeeso byeene.

18Yehoyada waakabananisa basaayi ni ba Levi khuuba babaakhulila khuukhola kimilimo mu Liisaayilo Liikhulu ly’Omukasya, khuuloondekhana ni byeesi Dawudi umweene aakhola. Nibo baaba babaalolelela bye khuuwaanayo tsisaayilo isi Umukasya, khuusiintsiila khu makaambila ka Musa. Naluundi nibo baaba bakhulila bye khukhweemba kimyeenya khu mikholo kyoosi. 19Yehoyada ndi waarawo baaliindi babebuula khu shilibwa she Liisaayilo Liikhulu ly’Omukasya, khuubona bari bekalila ibulafu umuundu yeesi ukhali umupyeeluukhe ta.

20Lwanyuma lwa byoosi, Yehoyada walaanga atweela baakhulu be kamaye, baakhulu babaandi boosi, ni baawuli, atweela ni babaandu boosi be mu Yuda, baaroongesa umuyiinga khuumwaamisa mu Liisaayilo Liikhulu ly’Omukasya. Baakyeenda baabirira mu Shilibwa she ngaaki, baamuyila khuumwoolisa mu lubili lweewe. Ibweene iyo baamwikhasa khu shitsoloŋo sheewe she buyiinga. 21Baryo babaandu boosi be mu shibala isho bekhoya luukali, naluundi shiriimba shoosi shaaba shili mu lukoosi luukali, lwekhuuba Ataliya baaba baamalile khumwiira.