Swahili Bible2

22

Ahaziya nga niye umuyiinga wa Yuda

(2 Bayiinga 8.25-29; 9.21-28)

1Khu mbuka isi ba Arabu beetsila bebwaakala Yuda, beeraka basooleli ba Yehoramu baakhulu boosi, ne yaramayo Ahaziya yenyene, uwaba nga niye ufuuramo bukyeekhe. Isho shaakila babekhali mu Yerusalemu bamwikhasa niye khuuba nga umuyiinga waabwe. 2Ahaziya aba nga olesa kye buukhulu kamakhumi kane na kibili22.2 Burone bubuundi buloma buri aba nga ali ni kye buukhulu kamakhumi kabili na kibili (22) khu mbuka isi ekyelela umuyiinga, lwanyuma wawulila kumwiiko mutweela nga asiintsiila mu Yerusalemu. Maayi weewe aba bari Ataliya, umwitsukhulu wa Omuri, uwabakho umuyiinga wa Isiraeli. 3Ahaziya naye aloondelela she khubonelakho she bubwoonaki sha Ahabu, woonakisa naabi isi Umukasya. Lwekhuuba maayi weewe Ataliya aba nga niye umuwi weewe uwe kamakyesi mu bubwoonaki. 4Aryo Ahaziya woonakisa luukali lweene mu moni ts’Omukasya, lwekhuuba lwanyuma lwa paapa weewe khuufwa, arobora baalala khu baandu be muungo mwa Ahabu khuuba baawi beewe be kamakyesi. Shino shaaba nga nisho shishafuura khumwoonakisa. 5Ahaziya waaba nga arekeeresa kamakyesi kaabwe, waatsya ni Yehoramu umusooleli wa Ahabu, umuyiinga wa Isiraeli, khuutsya khwibwaakala Hazaeli, umuyiinga wa Siriya ni liiye lyeewe i Ramosi she mu Gileyadi. Mu busoolo ubwo, Yehoramu atsiinisibwa naabi. 6Aryo waakobola mu shiriimba she Yezureeli, khukhwikaanga kamakoontsyo keesi aafunila mu busoolo. Khu mbuka yino niyo isi Ahaziya enyukhila khuutsya khubonakho Yehoramu.

7Ne abe Wele waakhalilewo khaale ari Ahaziya akwe ibweene iyo. Nga ali i Yezureeli iyo, niye atweela ni Yehoramu baarura khuutsya khukhwakaanana ni Yehu, umusooleli wa Nimushi. Umukasya abe waamala khaale khuulakila Yehu ari ahese buli musaani yeesi khukhwaama muungo mwa Ahabu.

8Ne Yehu n’aba nga ali khuukhola kumulimo ukwo kwe khuuhesa be muungo mwa Ahabu, waakaanana ni batweela khu baraangilisi be mu Yuda ni baalebe ba Ahaziya, babaaba nga beetsile ni Ahaziya. Abweene ni abweene, Yehu waabeerirawo boosi. 9Lwanyuma Yehu waawa biilakilo ari baweentse Ahaziya naye. Lwanyuma baamunyoola nga weebisile mu Samariya. Naye baamureera isi Yehu, baamwiirira ni abweenewo. Ahaziya baamusiikha buulayi, lwekhuuba baaba nga beesamo naabi kuukawe Yehoshafati shiriifwa, lwe khuukana khweesi aaba ni nakhwo khwe khukhwakaanisa Umukasya ni kumwoyo kweewe kwoosi. Shiryo shaaba ndi, muungo mwa Ahaziya mwaalekha khubamo umuundu ukuundi yeesi uwaba anyala khuuwula nga umuyiinga mu Yuda ta.

Nabakyelama Ataliya uwa Yuda

(2 Bayiinga 11.1-3)

10Lwanyuma Ataliya n’awulila bari umusooleli weewe Ahaziya waafwiile, waakhalawo khukhwiira umulebe yeesi mu Yuda mwoosi, abe unyala khukhwiilawo nga umuyiinga. 11Ne Yehosheba, umukooko wa Ahaziya, uwakhwaalikha khu musaayi isi balaanga bari Yehoyada, waatsya waamusa Yowashi, umwaana umufwiiti uwa Ahaziya, waamurusa khukhwaama mu basooleli ba Ahaziya baalala, babaaba nga balikho batsya khukhwiiribwa. Aryo waayila Yowashi, waamubisa mu shiseenge she Liisaayilo Liikhulu ly’Omukasya, atweela n’umuliindi weewe. Baaba nga baamubisa mu bweene umwo, Ataliya waalekha khunyalisa khumwoolakho khuumwiira ta. 12Yowashi waaba nga baamubisa mu Liisaayilo Liikhulu ly’Omukasya ilyo, khuumala kimiiko kisesaba kimibuufu, kyeesi Ataliya aamala nga awula nga nabakyelama wa Yuda.