Swahili Bible2

2

Tsiŋoonaŋoona tse khukhwombekha Liisaayilo Liikhulu

(1 Bayiinga 5.1-18)

1Solomoni waakhalilawo ilala khukhwombekha Liisaayilo Liikhulu mweesi besaayila Umukasya, ni khukhwiyombekhela naye umweene lubili. 2Aryo Solomoni weroborerayo basaani baboola kimikaanda musaafu (70,000) khuuba baraambi ba busheele busa, waafunayo ndi babaandi baboola kimikaanda shinaane (80,000) khuutsya mu ngoongo khuubeetsa kamabaale. Lwanyuma waaroborayo babaandi bikana bitaru ni bitoondo bisesaba (3,600) khuuba nga nibo babaalolelela kimilimo nga ni kikholekha.

3Solomoni waarumanisa buurume isi Hiramu, umuyiinga we Tuulo, nga aloma ari: “Nga ni wakholakanatsaka ni paapa wase Dawudi, waamwakaanisa bikyeenga bye kuusaala sida, wombekha lubili lweewe, nase ingana untsakaaniseyo. 4Ise ari ingana khukhwoombekha Liisaayilo Liikhulu lye khukhwisaayilamo Umukasya Wele wase. Kane shibe shiifwo shishawaanibwayo lwe khukhwookhelamo bubaane, ni bibiindu bibiindi bibiwunya buulayi. Kane shibe shiifwo sheesi kane khuwaanatsakeyo kumukaati kumukwalaafu, naluundi khuwaanatsakeyo tsisaayilo tsintsoshe buli kumutikhinyi ni buli angoloobe, ni buli khu shifukhu sha Sabato, ni khu shifukhu shishinyoowa she kumweesi. Ni khuutubakho kamayiiya keefwe kamakwalaafu koosi nga Umukasya Wele n’alakila. Bino byoosi Umukasya waalakila ba Isiraeli khuubikhola biilo byoosi. 5Liisaayilo Liikhulu lyeesi intsya khwoombekha litsya khuba lye kamaani naabi, lwekhuuba Wele weefwe ali umukhulu naabi khuufuura ba wele boosi. 62.6: 1 Bay 8.27; 2 Kim 6.18Ne naanu unyala khukhwoombekhela Wele Liisaayilo Liikhulu? Lwekhuuba abe yakhaba ni likulu nga lyabalaaha luukali liryo, silinyala lyaamubiikha lyaamumalayo ta! Ise niye naanu unyala khumwoombekhela Liisaayilo Liikhulu, akhali nilyo khuuba busa shiifwo she khukhwookhelamo bubaane is’ali. 7Nashiryo ari, n’untsakaaniseyo umuundu uwamanyikhana naabi mu bye kimikhono khuuraambisa zaabu, ifeetsa, buroonzi ni bibyuuma bibiindi, naluundi uwamanya khuukhola tsinaanga tsitsitsuulemwo tsiraangi tsingali. Umuundu uyo isi untsakaanisa aakha khuuba umanyikhaane naabi mu bye khuukhooraka bibiindu. Umweene yuno niye ukane araambakane ni baraambi be kimikhono babaali ano mu Yuda ni mu Yerusalemu, beesi paapa wase Dawudi aarobora khaale. 8Naluundi ingana untsakaaniseyo bikyeenga bye kimisaala sida, sayipuraasi, ni alumaga, khukhwaama i Lebanooni. Lwekhuuba ise naamanya ndi babaandu boowo bali baamanyilifu naabi mu bye khuukhala tsimbaawo. Babaakaanisi baase ano kane baraambakane ni nabo. 9Shinaba shiryo lwekhuuba inganayo tsimbaawo tsingali naabi, tsitsinakanibwa khukhwoombekha Liisaayilo Liikhulu ilyo, lwekhuuba linaba lye kamaani naabi luundi limiliwu naabi. 10Lwe khukhwiimisawo baraambi boowo, ise kane ikhwakaaniseyo tsitani bikana bibili (2,000) bye ŋaano, tsitani bikana bibili (2,000) bya sayiri, ni tsi lita kimyeeka kine (400,000) kye viini, ni khutubakho tsi lita kimyeeka kine (400,000) kye kamafura kuusaala ku oliveti.”

11Lwanyuma umuyiinga Hiramu uwe Tuulo naye weelamo Solomoni ari, “Naamanya ndi Umukasya akana naabi babaandu beewe shikila aakhurobora iwe khuuba umuyiinga waabwe. 12Khayo aruuyibwe naabi, Umukasya Wele wa Isiraeli, uwakhola likulu ni shibala! Lwekhuuba waawa umuyiinga Dawudi umwaana umukyesi naabi, uweetsula kamakhula ni khuumanya khuukali, ukane anyalise khukhwoombekha Liisaayilo Liikhulu khulw’Omukasya, ni lubili lulweewe umweene.”

13Hiramu waalooselakho ari, “Ari indi khukhwakaanisa is’uli umusaani umumanyilifu naabi mu bye kimikhono, nga niye Huramu Abi. Niye ali umusaani uwe kamakhula kamakali naabi. 14Niye ali umusaani uwasaalikha mu mukhasi umu Isiraeli khukhwaama mu shikuuka sha Dani; ne nga paapa weewe aaba aama mu Tuulo. Niye ali ni kamakhula kamakali naabi mu khukhola khu biindu bye zaabu, ifeetsa, buroonzi, ni bibyuuma bibiindi. Naluundi niye waamanya khuukhola khu biindu bibiwaambakana ni kamabaale, ni bye bubeetsi, ni khuutubakho bye khuuruunga tsinaanga tse tsiraangi tsitsikhali ndweela ta, ni tsingubo tsitsiindi. Naluundi ali umuundu unyala khuukhooraka shishiindu shoosi, ate anyala waaloondelela kumusono kwoosi, siinga uba nga waamuweele she khuubonelakho. Niye kane ayeetane ni baraambi boowo babaakhola khu bye kimikhono, ni naabo babaaroborebwa n’umukoosi wase Dawudi, paapa woowo. 15Ni nashiryo ari, yaakaanisa iŋaano, ni sayiri, ni kamafura ka oliveti, atweela ni viini, byeesi wasuubisile khukhwakaanisa. 16Ni nafwe kane khukhale tsimbaawo tse tsisaambo tsoosi tseesi wakanile khukhwaama mu njiinji tsa Lebanooni. Kane khutsaakaanise nga khwatsibowile mu bikyeenga, bikyelakyelele khu meetsi, biitse byoole khu ndulo khwe nyaantsa imboofu i Yopa. Ni khukhwaama ibweene iyo, baraambi boowo babiyile i Yerusalemu.”

Khukhwombekha khwe Liisaayilo Liikhulu khurakikha

(1 Bayiinga 6.1-38)

17Lwanyuma lwayo, Solomoni warawo khubala babaandu babaaba baamuli busa, ne nga bamenya mu Isiraeli, nga ndi paapa weewe Dawudi n’akhola. Boosi atweela baaba boola kumweeka mutweela, ni kimikaanda kiraano, bikana bitaru ni bitoondo bisesaba (153,600). 18Khu bano kimikaanda musaafu (70,000) waabekyelisa baraambi baabusheele busa, kimikaanda shinaane (80,000) baaba nga nibo babaabeetsa kamabaale khukhwaama mu ngoongo, ne abo bikana bitaru ni bitoondo bisesaba (3,600), baaba nga nibo babaalolelela baraambi babaaramile nga ni baraamba, khuubona bari kumulimo kuwa buulayi.