Swahili Bible2

18

Umuŋoosi Mikaaya areewula umuyiinga Ahabu uwa Isiraeli

(1 Bayiinga 22.1-28)

1Yehoshafati waaba umuyiinda naabi, naluundi umuundu uwe lukoosi luukali. Waakyelawo waakholayo indakaano ni Ahabu, khuubona ari mutweela khu be muungo mweewe ayila umukhaana wa Ahabu. 2Lwanyumakho nga kimiiko mikyeekhe kyaabirirewo, Yehoshafati waatsya waakyeniyilakho Ahabu mu shiriimba sheewe shikhulu i Samariya. Ahabu waamukholela buukyeni buukhulu naabi, waamukhoonyela niye ni baakhulu babaandi babaatsya ni naye tsikhaafu, ni kamasheese kamakali busa lwe khuuteekha kamayiiya. Lwanyuma Ahabu waakanikhanamwo ni naye bye khuutsya khukhwibwaakala shiriimba sha Ramosi mu Gileyadi.

3Lwanyuma kila Ahabu areeba Yehoshafati ari, “Iwe unyala waafukiilila khuutsya ni nase, khwaatsya khwebwaakala Ramosi shishiili mu Gileyadi?”

Kila Yehoshafati elamo ari, “Mbaawo ilomo yoosi ta. Lwekhuuba iwe ni nase khuli shitweela, baselikhale baase bali baselikhale boowo. Ni nashiryo kane khukhwitubaasekho mu busoolo buno.” 4Ne ndi Yehoshafati waalooselakho nga aloma umuyiinga wa Isiraeli ari, “Ne khakhunyoowe khwiireebekho, khumanye shiina sheesi Umukasya aloma.”

5Lwanyuma kila umuyiinga Ahabu arumanisa khulaanga baŋoosi bitoondo bine (400). Kila abareeba ari, “Ifwe khunyala khwaatsya khwebwaakala Ramosi shishiili mu Gileyadi, namwe khukhatsya ta?”

Nabo boosi atweela baamwiilamo bari, “E e, ni mutsye. Lwekhuuba Umukasya ali khuutsya khukhuyeeta khushiwula.”

6Ne Yehoshafati ndi waamuloma ari, “Ino mbaayo umuŋoosi w’Omukasya ukuundi isi khunyala khwereebakho ta?”

7Kila Umuyiinga wa Isiraeli elamo Yehoshafati ari, “Iliyo umuundu ukuundi mutweela isi khunyala khukhwiireebakho isi Umukasya. Niye Mikaaya, umusooleli wa Imula. Ne shonyene ndi ise naamubiyiila, mbaawo buŋoosi buulayi bweesi anganikhakho khwiise ta, khurusakho buubi bwonyene.”

Yehoshafati naye welamwo ari, “Ukhaloma uryo ta.”

8Lwanyuma kila Ahabu arumanisa khaangu khulaanga Mikaaya umusooleli wa Imula.

Mikaaya akuukuula khuufwa khwa Ahabu

9Baryo umuyiinga Ahabu uwa Isiraeli, n’umuyiinga Yehoshafati uwa Yuda, bakwaara bikwaaro byaabwe bye buyiinga bekhala khu bitsoloŋo byaabwe bye buyiinga mu shifwo sheesi bawuulilamo iŋaano, aambi ni shilibwa she Samariya. Baaba nga bali khuurekeeresa byeesi baŋoosi ba Ahabu baloma. 10Mutweela khu nibo nga niye Zedekiya, umusooleli wa Kyenaana. Niye aba nga waakholile tsiintsika khukhwaama mu shibya, nga ali khuulaangilila ari, “Ahabu, Umukasya ali khuuloma ari kane utsye wibwakale Siriya ni tsiintsika tsino, ufwaane nga iwuunwa n’iraambisa tsiintsika tsayo, ubaheselewo ilala boosi.” 11Ni baŋoosi nabo babaandi babaaramilewo baaba nga balikho baloma shitweela sheene bari, “E e, ilala n’utsye wibwakale Ramosi she mu Gileyadi ubawule, lwekhuuba Umukasya kane akhunyalisise ubawule boosi.”

12Nga bili biryo, baarume babaatsya khulaanga Mikaaya bamulomela bari, “Bona ari baŋoosi boosi bali khukuukuula kamakhuuwa kamalayi konyene isi umuyiinga Ahabu. Ni nashiryo nawe nga woolileyo, waakha ukanikhe shishiindu nisho shitweela sheene.”

13Ne Mikaaya wabeelamwo ari, “Ise kane inganikhe sheesi Umukasya Umulamu, Wele wase anomela khuukanikha.”

14Aryo nga Mikaaya woolile isi umuyiinga Ahabu, Ahabu waamureeba ari, “Iwe waambaasa uri khutsye mu busoolo khwibwakale Ramosi she Gileyadi, namwe ikhatsya ta?”

Mikaaya waamwiilamwo ari, “E e, n’utsye ubawule, Umukasya kane akhuyeete khubawula boosi.”

15Shikila umuyiinga arafuyila Mikaaya ni kamaani keene ari, “Iwe ukana ise ikhwikoontselele kimiluundi kyeenga nio umboolele bwaŋali bwonyene? Mu ŋali mu bubweene, Umukasya ali khuloma ari shiina?”

1618.16: Bala 27.17; Ezek 34.5; Mat 9.36; Mako 6.34Kila Mikaaya amwiilamo ari, “Mu khubonekhelwa, ise naboone baselikhale ba Isiraeli nga balikho batiimatiima busa khu njiinji, nga bafwaanile busa nga kamasheese kakaakhalikho n’umwaayi ta. Isho shaakila Umukasya waaloma ari, ‘Kamaye kano sikalikho n’umuraangilisi ta. Ari lekha buli mutweela eleyo ingo weewe mu lukoosi.’ ”

17Kila Ahabu ashuukha waalomela Yehoshafati ari, “Ise sikhubooleele? Niye mbaawo shilayi sheesi anganikhakho khwiise ta, akhali biibi byonyene!”

18Isho shaakila Mikaaya naye waaloma ari, “Ari rekeeresa buulayi sheesi Umukasya ali khuloma! Ise naboone Umukasya nga wekhaale khu shitsoloŋo sheewe, ni liiye lyoosi lye mwikulu nga lyamwimikhile khu mukhono kweewe kumulayi ni khu munyeletsi. 19Shikila Umukasya areeba ari, ‘Naanu unyala waatsya waakhoonjelesa Ahabu, umuyiinga wa Isiraeli, khuutsya mu busoolo ni Ramosi she mu Gileyadi nio bamwiirireyo?’ Isho shaakila yabayo bye khukhwiilamo byaba biikali naabi. 20Nio lwanyuma yabayo umwoyo mutweela uweerusayo waalomela Umukasya ari ‘Ise inyala naashikhola.’ Kila Umukasya amureeba ari, ‘Isho shinanyalikha shiryeena?’ 21Kila umwoyo uyo elamwo ari, ‘Ise inatsya ninjile mu baŋoosi beewe nio bamuboolele niye bubeeyi.’ Isho shaakila Umukasya waamulomela ari, ‘Unyala khushikhola. Ari n’utsye ushikhole, shikhwaanguyile.’ 22Ni nashiryo, Ahabu, shimanye uri, shishiindu shino shili nga ni naama khuloma. Umukasya wareerere umwoyo umuwombesi mukhanwa khe baŋoosi boowo bano, naluundi niye umweene waashilaangiliile khaale ari uli khuutsya khuhela.”

23Lwanyuma kila Zedekiya umusooleli wa Kyenaana, waakyeenda waatsya isi Mikaaya aaba, waamukhwaanyula luuyi mu moni, nga amureeba ari, “Khukhwaama liina isi Umwoyo w’Omukasya aarurira khuusiise, weetsa waakanikha ni nawe?”

24Kila Mikaaya amwiilamo ari, “Isho ulishimanya khu shifukhu khweesi iwe wamweene ulititukhila khuutsya khukhwibisa mu ntsu mukari.”

25Aryo kila umuyiinga aloma ari, “Ni muwaambe Mikaaya uyo, mumuyile isi Amoni, gafana we shiriimba, ni Yowashi, umwaana wase. 26Mubaboolele muri bamure mu mapuusu, balekhe khumuwakho biilyo biindi byoosi ta, khuurusakho kumukaati ni kameetsi konyene, khukhwoolesa nindikobola khukhwaama mu busoolo ni lukoosi.”

27Ne Mikaaya welamwo ari, “Siinga mutsya ne mwaakobola mu lukoosi, shinamanyisa shiri Umukasya waakhukanikhakho ni nase ta!” Lwanyuma kila alomela lituuli lye babaandu ari, “Mukhebilila bilomo bino byeesi ise naama khuloma ta.”

Ahabu afwiila i Ramosi

(1 Bayiinga 22.29-35)

28Baryo umuyiinga Ahabu uwa Isiraeli n’umuyiinga Yehoshafati uwa Yuda baaraangilila kamaye kaabwe khuutsya i Ramosi she mu Gileyadi. 29Lwanyuma kila Ahabu alomela Yehoshafati ari, “Ise kane ingwaare nifwaanise umuundu ukuundi busa, ilekhe khubawo uwumanya ta, ne iwe ukwaare bikwaaro byoowo bye buyiinga.” Aryo umuyiinga wa Isiraeli wefwaanisa umuundu ukuundi busa, lwanyuma benjila mu busoolo.

30Biba biryo, abe umuyiinga wa Siriya waalakiile baakhulu be kamakaali keewe ari batsye bebwakale umuyiinga wa Isiraeli yenyene, balekhe khusoolanisakho umuundu ukuundi ta; oba uwe aasi namwe uwe angaaki. 31Baryo ni baselikhale ba Siriya ni baabona Yehoshafati ni bikwaaro byeewe bye buyiinga, bambaasa bari niye Ahabu, kila bamutsya khuumwiibwaakala. Ne lwashino, Yehoshafati waalookhela angaaki nga aloomba, shaakila Umukasya waamuwonesa, nga akhola baselikhale ba Siriya khuumururayo. 32Baryo baselikhale ba Siriya bano ni baabona bari s’ali niye Ahabu ta, baamulekha.

33Ne yabawo umuselikhale mutweela umu Siriya uwalasaka busa aryo khaafumo kheewe, khaatsya khaawuna Ahabu, nga khabirira akari isi bikwaaro bye bibyuuma byaakaananila. Kila Ahabu alomela uwaba atimisa likaari lyeewe, nga ali ni butsiina ari, “Baambunile khaafumo. Ari shuusa likaari lino, wunduse ano.”

34Buryo busoolo bwaaba buurafu naabi khu shifukhu isho, ne Ahabu niye waarama nga wehaambiliile mu likaari lyeewe khuulolelanila ni ba Siriya. Tsinyaanga ni tsoola tse angoloobe nga inyaanga ikwa, Ahabu waafwa.