Swahili Bible2

17

Yehoshafati ekyela umuyiinga wa Yuda

1Yehoshafati umusooleli wa Asa welawo nga umuyiinga, aryo wahangasa bye khukhwiiliinda nga ekhiinga Isiraeli. 2Aryo waarawo baselikhale mu biriimba bya Yuda byoosi bibyabakho kamatikiiyi, ni khuutubakho biriimba ibyo byoosi bibyaba mu Yuda, ni neebyo byoosi bibyaba mu Efurayimu byeesi paapa weewe Asa aawaamba.

3Umukasya aba ni Yehoshafati, lwekhuuba aakyeenda nga aloondelela she khuubonelakho sha paapa weewe Asa nga n’aba mu miiko kyeewe kikyanyoowa kye buwuli bweewe, waalekha khukhwisaaya Bayaali ta. 4Aryo waaba nga esaaya Wele isi paapa weewe esaayatsaka, waaba nga aloondelela kamakaambila ka Wele, walekha khuuloondelela tsisaambo tse bubwoonaki tse buyiinga bwa Isiraeli ta. 5Ni lwe lomo iyo, Umukasya wahangasila Yehoshafati khu shitsoloŋo she buyiinga bwa Yuda. Baryo babaandu ba Yuda boosi baareeratsakila Yehoshafati biwaanwa, shaakila niye wekyela umuyiindifu naabi, nga esibwamo lukoosi. 6Yehoshafati waarama nga uwewaanilayo ilala khukhola byeesi Umukasya akana. Aryo welooselakho ni khuumalilawo ilala bibyeeso bye ba wele babaandi, ni neebyo byeesi besaayilakho wele umukhasi Ashera, khukhwaama mu Yuda.

7Mu mwiiko kwe khataru kwe buwuli bweewe, Yehoshafati aaroborayo baakhulu mu buyiinga bweewe baraano, waabalakila khuutsya baleekele kamakaambila ka Wele mu buli shiriimba shoosi mu Yuda mwoosi. Bano baaba nibo, Benihayili, Obadiya, Zekariya, Netaneli, ni Mikaaya. 8Bano baatsya nga bayeetebwakho ni ba Levi syeenda bano, nga nibo Shemaaya, Netaniya, Zebadiya, Asaheli, Shemiramosi, Yehonasani, Adoniya, Tobiya, ni Tobadoniya. Aabarumanilakho ni basaayi Elishama ni Yehoramu. 9Baatsya nga baasutile shiitabo she Kamakaambila k’Omukasya, baatsya nga baleekela babaandu mu buli shiriimba shoosi mu Yuda mwoosi.

Luubuyi lwa Yehoshafati

10Lwanyuma kamanaambo kakaaba kamesanwa ka Yuda, kaarya naabi kamaani k’Omukasya, yalekha khubawo na litweela lilyatsya lyebwaakala Yehoshafati ta. 11Batweela khu ba Firisitiya bareerera Yehoshafati biwaanwa, ni feetsa khuuba kumusolo. Ni ba Arabu nabo baamureerera kamamiiku bikana musaafu ni bitoondo musaafu (7,700), ni tsimbusi tsindurume natso bikana musaafu ni bitoondo musaafu (7,700).

12Aryo Yehoshafati waaba eloosela busa khuuba uwe kamaani kamakali naabi, wombekha biriimba bibyabakho ni kamatikiiyi, ni biriimba bibyabamo birara mu Yuda mwoosi. 13Nashiryo Yehoshafati wabuunga bibiindu biikali mu biriimba bya Yuda, waara ni baselikhale bamanyilifu, luundi basoolani balayi naabi mu Yerusalemu. 14Baselikhale bano babaara mu bipuri khusiintsila khu bukuuka bwaabwe.

Khukhwaama mu Yuda, mwabamo baselikhale basoolani balayi kimyeeka kitaru (300,000), nga mulimo bipuri, nga buli shipuri shili she baselikhale shikana shitweela (1,000) n’umuraangilisi washo. Bano boosi, Adina niye uwaba nga abakhulila. 15Umukhulu ukuundi uwaba nga amwiilakho aba niye Yehohanani, nga niye araangilila baselikhale kimyeeka kibili ni kimikaanda shinaane (280,000). 16N’umukhulu ukuundi uweelakho aaba niye Amasiya, umusooleli wa Zikuri, uwaba nga waayiwaanayo busa khukhwakaanisa mu mulimo kw’Omukasya. Naye aaba nga akhulila baselikhale baboola kimyeeka kibili (200,000).

17Khukhwaama mu Benjamini, mwamamwo basaani basoolani balayi naabi baboola kimyeeka kibili (200,000), nga baayabalila buyiingo ni tsingabo. Bano boosi baaba aasi a Eliyada, uwaba umusoolani umumanyilifu naabi. 18N’umukhulu ukuundi uwamwiilakho aba niye Yehozabadi, uwaba nga araangilila baselikhale baboola kumweeka mutweela ni kimikaanda shinaane (180,000).

19Kamaye kano kaaba nga kaareebwa mu Yerusalemu khukhwakaanisatsaka umuyiinga, nga waakhubalilakho abo beesi Yehoshafati aaba nga waaraka mu biriimba bye kamatikiiyi bye mu Yuda mwoosi ta.