Swahili Bible2

15

Asa ahesa bifwaani mu Yuda

1Lwanyuma Umwoyo wa Wele weekha khu Azariya, umusooleli wa Odedi. 2Aryo Azariya waatsya khukhwakaanana ni Asa, waamulomela ari, “Iwe umuyiinga Asa, ni babaandu be mu Yuda ni mu Benyamini mweesi, ni mundekeerese. Umukasya kane abatsake ni nanywe, siinga nanywe mufukiilila khuuba ni naye. Buli isi mumuweentsela, kane mumunyoole. Ne siinga mumwantsukha, naye aryo kane abaantsukhe abarurekho. 3Khuumala imbuka indeeyi naabi, babaandu ba Isiraeli baaba nga sibali ni Wele uwa ŋali ta, nga sibali n’umusaayi abe unyala waabaleekela bibiwaamba khu Wele ta, naluundi nga sibali ni kamakaambila ta. 4Ne abe buli lweesi bakwiila mu bukosi, ne bashuukha bakobola isi Umukasya Wele wa Isiraeli, abe ababonekhela. 5Mu mbuka iyo iyaba imangafu naabi, abe mbaawo umuundu unyala wakyeenda mu lukoosi ta. Aabawo bukosi bukali naabi naabi aambi mu shibala shoosi. 6Abe buli linaambo lisoolanisa linaambo lyase, na buli shiriimba abe shisoolanisa shiriimba shashe, lwekhuuba Wele umweene abe niye uwaba nga areera bukosi buno ni khutumbuukha buli aandu oosi. 7Ne iwe niwikumise busa kumwoyo, wilemo kamaani, lwekhuuba Wele atsya khuukhuwa tsikhabi lwe khumuwulila niye.”

8Aryo Asa n’awulila buurume bwe buŋoosi buno khukhwaama isi Azariya, umusooleli wa Odedi, weekumisa kumwoyo, waarusa likaambila khuutsya khukhuulaka bifwaani byoosi, khukhwaama mu shibala sha Yuda shoosi, ni mu sha Benyamini shoosi, ni neebyo bibyaba mu biriimba byoosi byeesi aawaamba khukhwaama khu shibala she mu ngoongo sha Efurayimu. Aryo lwanyuma weesawo bushaakha shisheeso sh’Omukasya, shishaba nga shaayimikha iburaangisi we bubwinjililo bwe Liisaayilo Liikhulu.

9Lwanyuma Asa walaanga atweela babaandu ba Yuda ni ba Benjamini, ni babaandi babaaba baayitsa khukhwaama mu bisiintsa bya Efurayimu, ni Manase, ni Simeoni, babaaba nga nabo bamenya mu Yuda. Shino shaba shiryo lwekhuuba babaandu baakali abe baawuuyila mu Yuda, khu mbuka ya Asa lwekhuuba baabona bari abe Umukasya ali naye. 10Baryo babaandu bano boosi baabuusanila mu Yerusalemu, mu mweesi kwe khataru, kwe mu mwiiko kwe likhumi na kiraano kwe buwuli bwa Asa.

11Khu shifukhu sheene isho, bawaanayo isi Umukasya tsikhaafu tsitsoola bitoondo musaafu (700), ni kamasheese bikana musaafu (7,000), bibyeetsila mu biindu byeesi baawaambaka khukhwaama i Gera. 12Baryo bakhola indakaano iye khukhwisaayatsaka Umukasya Wele we bakuuka baabwe, ni kumwoyo kwaabwe kwoosi, ni buulamu bwaabwe bwoosi. 13Naluundi bafukiilisana bari, umuundu yeesi ulekha khukhwisaaya Umukasya Wele wa Isiraeli, aakha khukhwiiribwa, oba ali mwaana namwe umukhulu, oba ali umusaani namwe umukhasi. 14Baryo boosi atweela bakhola shishitsubo she khuliinda bubwiyikinwa bwaabwe isi Umukasya, nga bakhupa liyoombo lye kumwikhoyo, nga khufuura tsikhoombi, ni tsikhoombi. 15Baryo babaandu bano boosi babaaba mu Yuda, bekhoya naabi lwe shishitsubo she ndakaano shino, lwekhuuba abe bashikholile ni kimyoyo kyaabwe kyoosi, naluundi baaba nga balikho bamwisaaya ni buulamu bwaabwe bwoosi. N’Umukasya naye aryo waabawa tsikhabi tse lukoosi khuwola khukhwaama isi baasiku baabwe.

16Ni shishiindi sheesi umuyiinga Asa aakhola shaba ndi, abe kuukhu weewe Maaka waayoombekha kusiindi kwa Ashera, wele umukhasi, lwe khukhwiisaaya, waamurusakho buukhulu. Aryo waatsya waakuremakamwo, baatsya baakwooshela mu litila lya Kidironi. 17Mu miiko kyoosi kyeesi Asa aabeelawo nga umuyiinga, aarama nga ali umwiyikinwa isi Umukasya, abe yakhaba nga s’amala khuurusilawo ilala bibyeeso bye ba wele babaandi mu buyiinga bweewe ta. 18Aryo waareera biwaanwa bya feetsa, ni zaabu ni bibiindu bibiindi byeesi niye umweene aawaanayo, ni neebyo nabyo byeesi paapawe aawaanayo isi Umukasya, waabira mu Liisaayilo Liikhulu lya Wele.

19Mu mbuka iyo, siyabawo luundi buusoolo bwoosi mu Yuda ta, khukhwoolisa ndi mu mwiiko kwe kamakhumi kataru na kiraano kwe buyiinga bwa Asa.