Swahili Bible2

13

Buusoolo akari a Abiya ni Yerobowamu

(1 Bayiinga 15.1-8)

1Mu mwiiko kwe likhumi na shinaane kwe buyiinga bwa Yerobowamu, nimwo mweesi Abiya ekyela umuyiinga wa Yuda. 2Aryo Abiya waawula nga asiintsiila mu Yerusalemu khuumala kimiiko kitaru. Lisiina lya maayi weewe abe bari Mikaaya, umukhaana wa Uriyeli khukhwaama i Gibeya.

Lwanyumakho abalukhawo busoolo akari a Abiya ni Yerobowamu. 3Aryo waaroborayo baselikhale baasoolani baalayi baboola kimyeeka kine (400,000), waatsya mu busoolo, naye Yerobowamu waaroborayo baaselikhale baasoolani baalayi baboola kimyeeka shinaane (800,000), weetsa khuumwakaanana.

4Nga liiye lya Yuda lyoolile mu shibala she tsingoongo sha Efurayimu, Abiya waaniina khu lukiingi Zemarayimu, waakuukuula isi Yerobowamu ni ba Isiraeli boosi ari: “Rekeeresa iwe Yerobowamu, atweela ni ba Isiraeli mweesi! 5Iwe waakhushimanya uri Umukasya Wele wa Isiraeli aakhola indakaano ni Dawudi ikhanyala yaarusiwawo ta13.5 Alala unyoola baarona bari Indakaano iye kumuunyu, nga amuwa niye atweela ni babetsukhulu beewe buyiinga bwa Isiraeli biilo ni biilo? 6Ne imbuka ni yabirawo, iwe Yerobowamu, umwaana wa Nebati, uwaba busa umwakaanisi w’omuyiinga Solomoni, waamulyamo luwomelo waamumiinyaalila. 7Lwanyuma nga Rehobowamu wekyelile umuyiinga, iwe webuusila babaandu babaakhalimo ta, waamiinyaalila Rehobowamu, uwaba nga ashiili mwaana, ukhaanyala khuukhushingilila iwe ta.

8“Ari bona iwe waambaasa uri unyala waasoolanisa buyiinga bweesi Umukasya awaambisa babetsukhulu ba Dawudi. Liiye lyoowo lili liikali naabi, ne bona iwe uli ni bifwaani bye tsimoosi tseesi wakhola khukhwaama mu zaabu khukhwiisaaya. 9Iwe wawoona basaayi b’Omukasya, nga nibo babetsukhulu ba Aroni, atweela ni ba Levi beene. Lwanyuma mu shifwo shaabwe weroborera babaandu baabusheele busa khuuba basaayi, nga kamanaambo kakaandi ni kakhola. Buli umuundu yeesi uwiitsa khukhwiiwaanayo nga wareerire iwuunwa, namwe ni kamasheese musaafu khu sheeso, ekyelilawo umusaayi we ba wele boowo abo!

10“Ne ifwe Umukasya niye Wele weefwe! Ifwe khwakhumwantsukhakho ta! Babetsukhulu ba Aroni babeene nibo babaashakaanisa nga basaayi, ni ba Levi babeene nibo babaashibayeetakho kumulimo ukwo. 11Nibo bawaanayo tsisaayilo tsintsoshe, ni khukhwoosha bubaane isi Umukasya, buli kumutikhinyi ni angoloobe. Bayila kumukaati kumukhosefu, baakura khu meetsa ikhosefu iyakholebwa khukhwaama mu zaabu, bawaambisaka ni itaala ili khu ntseko iye zaabu buli angoloobe. Ifwe khwaloondelela kamakaambila k’Omukasya Wele weefwe. Ne iwe wamwaantsukha, wamulekha. 12Ari manya uri Wele umweene niye ali khu lubeka lweefwe. Umweene kane akhuraangilile ifwe mu busoolo buno, nga basaayi beewe nibo babaafuura tsikhoombi khukhwiitsa khuubasoolanisa inywe. O baandu ba Isiraeli, mukhakhakakho mwasoolanisa Umukasya Wele isi baakuuka beenywe beesaayatsaka ta, lwekhuuba simunyala mwamuwula ta.”

13Khu mbuka iyo nga Abiya ashikanikha, Yerobowamu waaba nga waamalile khaale khusiindikha batweela khu liiye lyeewe mu mbola busa, khuutsya khwiibwaakala babaandu ba Yuda nga babaamila inyuma, ne babaandi waabalekha khukhwiibwaakala nga babaamila ibweeni. 14Ne ba Yuda ni baanyukanyuka baabona nga baasiku balikho babebwaakala tsimbeka tsoombi, inyuma ni bweeni, beelootsela Umukasya. Lwanyuma basaayi baafuura tsikhoombi tsaabwe, 15ni baselikhale ba Yuda benyusa luwuungu lwe buusoolo. Baryo nga bakhupa luwuungu ulwo, Abiya waaraangilila baselikhale ba Yuda, Wele waawula Yerobowamu atweela ni liiye lye ba Isiraeli lyoosi. 16Liiye lye ba Isiraeli lyoosi lyaatitukha. Aryo Umukasya waabawaanayo mu bunyala bwe baselikhale ba Yuda baabawula. 17Abiya ni baselikhale beewe baakhoonya babaandu baakali naabi, boosi atweela beera baselikhale ba Isiraeli baboola kimyeeka kiraano (500,000) khu shifukhu sheene isho shonyene. 18Baryo musaambo iyo, ba Yuda baawula ba Isiraeli lwekhuuba beeyikina Umukasya Wele we baakuuka baabwe.

19Abiya atweela ni liiye lyeewe beeloosela khukhwiibwaakala liiye lya Yerobowamu, baatsya baawaambaka bitweela khu biriimba byeewe nga nimwo mulimo Beseli, Jeshana ni Efuroni, ni khutubaasakho bibyaalo bibibotokhelelewo.

20Yerobowamu umuyiinga wa Isiraeli s’elamo luundi khuufuna kamaani mu biifukhu byoosi byeesi Abiya abeela nga ali umuyiinga. Aryo Umukasya waabonabonisa Yerobowamu, lwanyuma waafwa.

21Ne Abiya niye weeloosela busa khuuba ni kamaani kamakali. Waayila bakhasi likhumi na bane, waasaala ni nabo babaana basooleli kamakhumi kabili na babili, ni bakhaana likhumi na basesaba. 22Bibiindu byoosi byeesi Abiya aakhola, ni neebyo byoosi byeesi aakanikha, byaronebwa mu byaamayo bya Ido umuŋoosi.