Swahili Bible2

10

Bikuuka bye ngaaki bimiinyaalila umuyiinga Rehobowamu

(1 Bayiinga 12.1-20)

1Rehobowamu waatsya i Shekemu, isi babaandu ba Isiraeli boosi baaba nga beetsile khuumukhola niye khuuba umuyiinga.

2Aryo Yerobowamu, umwaana wa Nebati n’awulila bibiili khuutsya mu moni, waakobola khukhwaama i Misiri, isi abe aatitukhila khukhwibisa khu Solomoni. 3Babaandu khukhwaama mu bisiintsa bye ngaaki bya Isiraeli baamurumanisa. Baryo niye atweela ni babaandu boosi baatsya khuubona Rehobowamu, baamulomela bari, 4“Paapa woowo Solomoni aakhuwaanyiinyatsaka ifwe, waakhuraambisa kimilimo kimisiro naabi. Ne ari khukhuloomba khuri waanguyisekho khu busiro ubwo, bweesi paapa woowo aakhurakho, ni nafwe kane khube aasi owo, naluundi khukhole buli shoosi sheesi kane ukhulakile khuukhola.”

5Rehobowamu naye waabeelamo ari, “Ari ni mumbeyo biifukhu bitaru, imbe nga nambaasa khu shiindu isho, nio lwanyuma mwiitse mukobole, imbeelemo.” Baryo babaandu tsana baarurawo baatsya.

6Lwanyuma umuyiinga Rehobowamu waatsya wakaananamwo ni baasakhalu, babaaraambakho ni paapawe Solomoni, khulwe lomo yino, waabareeba ari, “Makyesi shiina keesi muumba nio inyale khukhwiilamo babaandu bano?”

7Basakhulu bano nabo baamwiilamo bari, “Iwe siinga uba ukana babaandu bano khuukhwaakaanisa iwe, ni khuukhuwulilatsaka, bakanikheyo ni tsilomo tsindayi tse shiisa, ubasuubise khukhwaanguyisakho busiro bwaabwe.”

8Ne Rehobowamu waalekha khufukiilila bilomo bye kamakyesi byeesi baasakhalu baamuboolela ta, waatsya waakaananamwo ni basooleli beesi aatsowa nabo, nga khu mbuka yino baaba bali babaakaanisi beewe. 9Waabareeba ari, “Inywe muwa makyesi shiina, nio khubeelemo babaandu bano babeetsile isi ndi, nga baanoma bari imbaanguyisekho buusiro bwe kimilimo kyeesi paapa wase aabaraambisatsaka?”

10Basooleli tsana bano babaatsowa ni naye baamwiilamo nga bamuloma bari, “Tsya uboolele babaandu bano babaakhulomele bari, ‘Paapa woowo Solomoni akhuwaanyiinyatsaka waakhuraambisa kimilimo kimisiro naabi. Ne ari khukhuloomba khuri waanguyisekho khu busiro ubwo bweesi paapa woowo aakhurakho, ni nafwe kane khube aasi owo, naluundi khukhole buli shoosi sheesi kane ukhulakile khuukhola,’ ubalome uri, ‘Khakhaala khe khu mukhono kwase khakyeekhe, khali khaakali naabi khuufuurisa mu shikute mwa paapa wase. 11Ilala siinga nga paapa wase aabaraambisatsaka kimilimo kimisiro naabi, ise ndi khuutsya khulooselakho kifuurewo busiro. Niye aabawatsaka bitaambiso nga abakhupa ni tsikhoba, ise intsya khuraambisa tsikhoba nga tsilikho ni bibyuuma bibyooki.’ ”

12Biryo biifukhu bitaru ni byawakho, Yerobowamu atweela ni babaandu tsana babaaramile boosi baakobola isi umuyiinga nga n’abalomela. 13Umuyiinga Rehobowamu waaba nga waalekelesile kamakyesi keesi baasakhalu baamuwa, weelakamo babaandu bano buubi busa. 14Aryo wabeelamwo bilomo byeene nibyo bitweela byeesi baasooleli basheewe baamulomela. Waabalomela ari, “Ilala siinga nga paapa wase aabaraambisatsaka kimilimo kimisiro naabi, ise ndi khuutsya khulooselakho kifuurewo. Niye aabawatsaka bitaambiso nga abakhupa ni tsikhoba, ise intsya khuraambisa tsikhoba nga tsilikho ni bibyuuma bibyooki!”

15Aryo umuyiinga waalekha khuwuliilisa byeesi babaandu belootsa ta. Bino byoosi byafwaana biryo, lwekhuuba byaba byoolelesa ilomo y’Omukasya khuubirira mu muŋoosi Ahija uwe Shilo, nga itsya isi Yerobowamu umwaana wa Nebati. 1610.16: 2 Sam 20.1Baryo ba Isiraeli boosi ni baabona bari umuyiinga waalobile khuubawa sheesi baakana, baalomela angaaki bari, “Ari ifwe khuli na mukabo shiina mu Dawudi? Sikhushiiliyo ni busikha buundi mu musooleli wa Yese ta. Inywe ba Isiraeli, yinyukha khwiileyo ingo! Ari lekha be ntsu ya Dawudi bewulile babaandu baabwe.” Baryo babaandu ba Isiraeli baakobolakayo ingo waabwe.

17Aryo Rehobowamu waaba nga niye umuyiinga we babaandu ba Isiraeli, babaaba nga bamenya mu biriimba bye mu shisiintsa sha Yuda. 18Umuyiinga Rehobowamu waarumana Adoramu, uwaba nga niye ukhulila bye kimilimo kimisiro, khuutsya khuukanikha isi babaandu ba Isiraeli. Ne ba Isiraeli boosi baamukhupa kamabaale, baamwiira. Ne kamakhuuwa kano nikoola isi umuyiinga Rehobowamu, waayuubakilisa khaangu, waatsya wekaama khu shikaari sheewe, wekhuuna tsiindimo khuukobolayo i Yerusalemu. 19Biryo bikuuka bino bye ngaaki bya Isiraeli byaamenya nga sibikana khuuwulibwa n’umwitsukhulu wa Dawudi yeesi ta, khukhwoolesa ni khu shifukhu she shaleelo shino.