Swahili Bible2

SHIITABO SHISHINYOOWA SHA

SAMWELI

KHUKHWAANTSULA

Shiitabo shishinyoowa sha Samweli shikanikha khu mbuka iye tsinjuukhashuukha khukhwaama khu buwuli bwe Baakayi khukhwoola khu buwuli bwe Bayiinga. Tsinjuukhashuukha tsino mu linaambo lye ba Isiraeli tsiibotokhelela khu baandu bataru: Samweli nga niye uwaba umukayi umukhulu naabi uwaakamayo; Saulo nga niye umuyiinga wa Isiraeli uwanyoowa; ni Dawudi nga mu bwaana bweewe byeesi aakhola byeyokyesana naabi mu buraambi bwa Samweli ni Saulo.

Kumurwe kumukhulu kwe mu shitabo shino nga bibiindi byoosi bye mu Ndakaano Ikhale ni bili, kuli ndi: Bubwiyikinwa mu Wele bureera Tsikhabi, ne khuumiinyaala khureera khuuhela. Shino shiyokyesana lubuula mu burume bwa Wele isi umusaayi Eli nga buloma buri: “Ise kane nikhoyele abo babaantsisamo ise shiriifwa, ne kane ikhalalile abo babaandekelesa.” (2.30)

Shiitabo shino shikanikha khu byambaaso bibikhali bitweela bibiwaamba khu buyiinga nga ni bwarakikhamo. Umukasya umweene abe niye umuyiinga wa Isiraeli umweene, ne lwe khuukana khuuwa babaandu sheesi baakana, Umukasya waabarobolela umuyiinga. Ne shishiindu shishifuura buukhulu shaba ndi umuyiinga ni babaandu beene boosi baaba bali ni khuuba aasi e buukhulu bwa Wele (2.7-10). Mu makaambila ka Wele, buulayi bwe babaandu boosi bwaba buli ni khuuliindibwa; bataambi namwe bayiindifu.

Inoondekhana iye bibiilimwo

Samweli awula Isiraeli nga umukayi (1.1—7.17)

Saulo ekyela umuyiinga (8.1—10.27)

Kimiiko kikinyoowa kye buwuli bwa Saulo (11.1—15.35)

Dawudi ni Saulo (16.1—30.31)

Khuufwa khwa Saulo ni basooleli beewe (31.1-13)