Swahili Bible2

9

Saulo akaanana ni Samweli

1Aabawo umusaani isi balaanga bari Kishi uwaba umuyiindifu naabi, uwe mu shikuuka sha Benyamini. Paapawe aba bari Abiyeli umusooleli wa Zerori, ni Zerori naye umusooleli wa Afiya. 2Kishi yuno aba n’umusooleli weewe lisiina bari Saulo, uwaba abonekha buulayi naabi, nga mu Isiraeli mwoosi mbaamo umuundu abe ubonekha buulayi khumufuura niye taawe. Niye abe afuurakho babaandu boosi be mu Isiraeli buuleeyi.

3Lutweela tsisikilya tsa Kishi, paapa wa Saulo tsyakoraana. Kila alomela Saulo ari, “Tsya na mutweela khu bakaanisi, utsye uweentse tsisikilya.” 4Baryo Saulo n’umwakaanisi baatsya babirira mu shibala she tsingoongo sha Efurayimu, babirira ni mu shisiintsa sha Salisha; ne iyo yoosi balekha khunyoolayo tsisikilya ta. Belooselayo baatsya babirira ni mu bisiintsa bya Shalimu ni bya Benyamini; ne iyo yoosi balekha khutsinyoolayo nayo ta.

5Lwanyuma lwa byoosi nga beetsile boolile mu shisiintsa sha Zufu, Saulo waalomela umwakaanisi weewe ari, “Khakhwakame ano khwiileyo, lukanile manya ari paapa wase anyala waakamisa khukhwiyembelela lwe tsisikilya, waarakikha khukhwiyembelela khulweefwe.”

6Ne umwakaanisi weewe waamwiilamo ari, “Liindakho no, mu shiriimba muno mulimo umusaani uwa Wele9.6 Umusaani wa Wele: Alala umusaani uwa Wele shimanyisa umuundu umukwalaafu, ni akhuundi shimanyisa Umuŋoosi umenyamwo. Umusaani yuno esiibwamo lukoosi naabi, naluundi buli shoosi sheesi aloma shoolelela. Lekha khutsye khumukanikheyo, manya lukanile anyala waakhuboolela ntsila shiina isi khuli ni khuutsyakho khuunyoola tsisikilya.”

7Kila Saulo amwiilamo ari, “Ari nga khwaatsiile khwamukanikhileyo, umusaani wa Wele uyo ifwe khunamuwa shiina? Ifwe sikhushiilikho ni biilyo byoosi mu tsisutilo tseefwe ta. Ari khunamuwa shiina?”

8Kila umwakaanisi elamo Saulo ari, “Ano ise ndiwo ni nusu ndweela iye feetsa. Khunyala khwaamuwa inyene iyo, naye lwanyuma waakhuboolela eena isi tsisikirya tsili.” 9Kila Saulo waamwiilamo ari, “Isho shishambaaso shilayi. Khakhutsye khubone umusaani unyala waabona kamarooro.” Aaloma aryo lwekhuuba abe mu biseela ibyo nga umuundu akana khukhwireebakho isi Wele, aloma ari “Khakhutsye khubone umuboni,” ari isi balaanga bari umuŋoosi. 10Saulo waamuloma ari, “Khakhutsye.” Baryo baatsya boola mu shiriimba isi umusaani wa Wele amenyatsaka.

11Baryo ni baaba nga baniinilila khaakiingi khuutsya khwoola mu shiriimba, baakaanana bakhaana babaaba balikho bataha kameetsi, kila babareeba bari, “Umuboni ali ano mu shiriimba shino?”

12Bakhaana nabo beelamo bari, “E e, alimwo. Ari waaraangiile waatsiile iburaangisi iyo, lwekhuuba shaleelo babaandu bali ni khuuwaanayo isaayilo mu shifwo shikhosefu she khukhwisaaya. Yuubakho mumuloondekho. 13Ari ni munaba nga mwinjila khu shilibwa she shiriimba muri, kane mumunyoole nga ashiili khwoola mu shifwo shikhosefu she khukhwisaaya ta. Lwekhuuba babaandu sibanyala baarakikha khuulya, nga niye ashiili khwoola khuloombela isaayilo ta. Nga mwaatsiile ari, kane mumunyoole.”

14Baryo Saulo n’umwakaanisi weewe baatsya. Ne ni baaba nga benjila mu shilibwa she shiriimba, baabona Samweli akyeenda eetsa isi bali, nga atsya isi shiifwo she khukhwisaaya.

15Shangoloobe nga nio bushe batsye, Umukasya aaba waabimbuliile Samweli ari, 16“Kumukaamba khu saawa nga tsino, iliyo umusooleli khukhwaama mu shikuuka sha Benyamini ukheetse is’uli. Ni nawe umutsukhekho kamafura, umurobole khuuba umuraangilisi we babaandu baase ba Isiraeli. Umweene yuno niye uliwonesa babaandu baase khukhwaama isi Bafirisitiya. Lwekhuuba naloleleele naboone isaambo isi babaandu baase bataambisibwamo, ni khulila khwaabwe khwe buyeeti khwoolile isi indi.”

17Samweli wenyusa tsimoni waabona Saulo, kila Umukasya alomela Samweli ari, “Oyuno niye umusaani isi nakhubooleele. Niye ukane awule babaandu baase.”

18Saulo waatsya isi Samweli a shilibwa, waamureeba ari, “Unyala wantsokesakho intsila itsya isi umuboni amenya?”

19Kila Samweli amwiilamo ari, “Ise niye umuboni. Ni muraangile mutsye iburaangisi iyo mu shifwo she khukhwisaaya. Shaleelo shino kane mulye ni nase, ne kumukaamba kumutikhinyi nio imbalekhuule mutsye, naluundi nio imbeelemo bireebo byeenywe. 20Ne mukheyembelela lwe tsisikilya tseenywe tsitsakoraanile biifukhu bitaru bibyabirire ta. Lwekhuuba ari baatsinyoolile khaale. Ne ari buli shiindu shoosi shishiilimo kumukaso shishiili mu Isiraeli, shili shoowo ni be muungo mwoowo boosi.”

21Ne Saulo waamwiilamo ari, “Iwe lwashiina unomela ise musaambo iyo? Lwekhuuba ise naama mu shikuuka sha Benyamini, nga nisho shishifuura bukyeekhe mu Isiraeli, ni babaandu be muungo mwase nibo ndi babaafuura bukyeekhe ilala.”

22Aryo Samweli waayila Saulo n’umwakaanisi weewe, waabengisa mu shiseenge shiboofu she khukhwisaayilamo, waabawa shiifwo she buraangisi akari mu bakyeni babaaba balaange baboola nga kamakhumi kataru. 23Kila Samweli alomela umuteekhi ari, “Ari n’undereerere shisiintsa she nyama tsana shishifuura buulayi sheesi ikhuweele khuubiikha.”

24Aryo umuteekhi naye waareera shinama she nyama shibuufu waashira iburaangisi wa Saulo. Kila Samweli alomela Saulo ari, “Inyama yino abe baakhubiikhiile iwe. Ari n’ukilye, lwekhuuba abe khwaakhubikhiile iwe lwe kumukholo kuno, khuuliila atweela ni bakyeni bano boosi beesi inaangile.”

Aryo Saulo waaliila atweela ni Samweli khu shifukhu isho. 25Lwanyuma lwa byoosi, baarurayo mu shifwo she khukhwisaaya, beekha mu shiriimba. Yabayo bulili bubwaŋoonebwa khu ntsu khu ngaaki khulwa Saulo khuukonakho. Khu bweene ukhwo, Samweli waakanikha isi Saulo. 26Antsye ni bwasha kumutikhinyi mu mamilimili, Samweli waalaanga Saulo ari, “Ari yinyukha, ikhulekhuule utsye mu ntsila tsoowo.” Aryo Saulo n’amala khukhwiŋoonaŋoona, benyukha baatsiila atweela. 27Baryo ni baaba nga balikho bekhilila bakana khurura ibulafu we shiriimba, Samweli waalomela Saulo ari, “Lomela umwakaanisi woowo eloosele iburaangisi weefwe. Ne iwe ni nase khuramekho inyuma khakyeekhe, ise ingana khukhuboolela iwe sheesi Wele ambooleele.”