Swahili Bible2

8

Babaandu ba Isiraeli baloomba khuufuna umuyiinga

1Samweli n’atsowa mu miiko waasakhuliwa, aarobola basooleli beewe khuuba baakayi mu Isiraeli. 2Lisina ly’omukiboole lyaba bari Yoweli, ni ly’owakhabili bari Abiya. Nibo boombi baaba baakayi i Berisheba. 3Ne basooleli bano sibaaloondelela she khuubonelakho sha paapa waabwe Samweli ta. Nibo baaba babaakana naabi kamapeesa nga baweentsa kamafuurisa, bakaanilatsaka iwoongo, baalekha khukhalatsaka kimisaango mu bwaŋali ta.

4Shifukhu shitweela kila baasakhulu mu Isiraeli babuusana atweela beetsa isi Samweli i Rama, 58.5: Maka 17.14nga bamuloma bari, “Bona ari iwe wahangaale mu miiko, ne basooleli boowo sibali khuuloondelela she khuubonelakho shoowo ta. Ni nashiryo ari n’ukhurobolele umuyiinga unakhuraangililatsaka ifwe nga kamanaambo kakaandi ni kali.”

6Shino she khuuloomba umuyiinga shakhalasa naabi Samweli, shikila ashiloombela isi Umukasya. 7Umukasya naye waamwiilamo ari, “N’urekeerese byeesi babaandu baloma, ubakholele byoosi byeesi bakana. Lwekhuuba nibo sibakhwikaanile iwe ta, ne bekaanile ise nga umuyiinga waabwe. 8Shino baashikhola khukhwaamila ilala khu shifukhu khweesi nabarusila khukhwaama i Misiri, baayindekha ise, besaaya bifwaani. Ni nashino ari bali khuushikhola khwiiwe. 9Ne ari n’ubarekeerese byeesi baloma, ubakholele nga ni bakana. Ne ubareewulile ilala, nga ubaboolela isaambo isi umuyiinga alibabirisamo.”

10Samweli waaboolela babaandu babaaba baloomba umuyiinga bilomo by’Omukasya byoosi. 11Waababoolela ari, “Eyino niyo isaambo isi umuyiinga alibabirisamo: Alihanyiinya basooleli beenywe khukhwinjila mu maye keewe. Abarobole khuuba babaatimisa kamakaali keewe, ni babaandi khuuba babaatimila khu ŋwaaŋwa, ni babaandi babe babaatima khuutsya iburaangisi we kamakaali keewe. 12Alirobolela baalala khu basooleli beenywe khuuba nga nibo babaraangilila baselikhale shiikana shitweela (1,000), ni babaandi khuuba babaraangilila kamakhumi karaano. Arobole babaandi khuuba nibo babaamulimila kimikuunda kyeewe ni khuukyesa bilimwa byeewe, ni khuumubasila bye busoolo ni bibyuuma bibiraambisibwa khu makaali keewe. 13Akhaayile ni babaana beenywe bekhaana khuuba babaamukholela kamafura kakaawunya buulayi, ni khuumuteekhela biilyo, ni khuumukhalaangila kimikaati. 14Umuyiinga akhaayile kimikuunda kyeenywe kikifuura buulayi, kimikuunda kye kimisabibu, ni kye kamatuunda oliveti, akikabile abo babaamulolelela niye. 15Akhaayile na buli shitweela she likhumi she biilimwa byeenywe, ni she kimisabibu abiwe baakhulu beewe ni babaakaanisi beewe babaamulolelela. 16Umuyiinga akhaayile babaakaanisi beenywe besaani ni bekhasi babafuura buulayi, ni tsikhaafu ni tsisikilya tseenywe tsitsifuura buulayi, atsire mu khukhola kimilimo kyeewe. 17Akhaayile shitweela she likhumi she bibyaayo byeenywe, ni nanywe mwabeene mukhekyele baakulwa beewe. 18Ni mbuka iyo nga yeetsile khwoola, inywe mwabeene mulililila Umukasya muri abayeete khuubawonesa khukhwaama isi umuyiinga isi mwabeene mwakana. Ne Umukasya s’alibeelamo ta.”

19Ne babaandu baalekha khuwuliilisa byeesi Samweli ababoolela ta. Baamuloma busa bari, “Taawe! Ifwe khukana umuyiinga khuukhuwula, 20nio nafwe khufwaane nga kamanaambo kakaandi ni kali, abe umuwuli weefwe, naluundi akhuraangilile khuutsya khusoolana mu busoolo bweefwe.”

21Aryo Samweli waabawuliilisa byeesi baaloma, kila elayo waaboolela Umukasya bino byoosi. 22Kila Umukasya alomela Samweli ari, “N’ubakholele byoosi byeesi bakana, ubawe umuyiinga.”

Lwanyuma lwa bino byoosi, Samweli waalomela babaandu ba Isiraeli boosi khukhwiilayo ingo waabwe.