Swahili Bible2

6

Isanduuku iye kamakaambila iya Wele bakikobosayo mu Isiraeli

1Lwanyuma lwe sanduuku iye kamakaambila y’Omukasya khuumenya mu shibala she Bafirisitiya khuumala kimyeesi musaafu, 2Bafirisitiya baalaanga basaayi baabwe, ni bafumu, baabareeba bari, “Isanduuku yino iye kamakaambila y’Omukasya, khukikhole khuryeena? Nimukhuboolele isaambo isi khunyala khwakiisilayo mu shifwo shayo.”

3Basaayi ni bafumu bano baabeelamo bari, “Ni muba nga mwisayo isanduuku iye kamakaambila iya Wele wa Isiraeli, simwaakha mwaakisayo busa muryo ta. Ne mu buli saambo yoosi mwaakha khukisayo ni shiwaanwa she khukhwiibiyisa lwe bibyoonako byeenywe. Musaambo yino inywe kane muwonesebwe, ni nashino kane shibokese lwashiina Wele abeele abawa shitaambiso shino.”

4Kila babaandu babeelamo bari, “Ne shiwaanwa shiina sheesi khunyala khwawayo?”

Nabo baabeelamo bari, “Nimwakaaniseyo bifwaani biraano bye zaabu bibifwaana nga kamabiimba, ni bifwaani bibiindi biraano bye zaabu bibifwaana nga tsimbeba, khuulekhaasa buukali nga bayiinga baraano be Bafirisitiya, lwekhuuba buulwaale ibwo bwabakhupa inywe ni bayiinga beenywe beene. 5Nashiryo, ni mukhole bifwaani biraano bye zaabu bibifwaana nga kamabiimba keenywe, ni bifwaani bibiindi biraano bye zaabu bibifwaana nga tsimbeba tsitsiili khukhwoonakisa bilimwa byeenywe. Bino mubyakaaniseyo nga shiwaanwa lwe khuuwa Wele wa Isiraeli shiriifwa, winyoola manya lukanile kane akaamise bukosi buno bububeetsile khwiinywe, ni khu ba wele beenywe, ni khu bilimwa byeenywe. 6Inywe lwashiina mukana khuwandalasa kimyoyo kyeenywe mufwaane nga ba Misiri, ni Faraawo ni baakhola? Nibo Wele n’amala khuubakholakho ni buurafu buukali, bakyelawo baalekhuula ba Isiraeli baatsya. 7Ari ni muŋoonaŋoone shikaali ni tsikhaafu tsibili tsitsinuunisa tseesi bakhabowatsakakho likyooki6.7 Likyooki: Likyooki nibyo bibaawo bibeetse bibili byeesi babowa mu milo mwe tsikhaafu khukhweesa shishiindu ta. Mutsibowekho likyooki khukhweesa shikaali, ne tsimoosi tsatso mutsisame mutsiseyo mwitaala.

10Babaandu bano baashikhola baryo nga ni baabaloma. Baayila tsikhaafu tsibili tsitsinuunisa, baatsibowa ni likyooki khu shikaali, ne baabowela tsimoosi mu litaala lyatso. 11Baryo baara isanduuku iye kamakaambila y’Omukasya khu shikaali, atweela ni sawu iyabamo bifwaani bye zaabu bye tsimbeba ni bye kamabiimba. 12Tsikhaafu tsino tseruungikha burereefu khu ntsila itsya kwe Besusemesi yonyene, nga sitsiyawukhakho khuukilekha ta. Tsaatsya busa tsiryo nga tsimoloola. Baaraangilisi be Bafirisitiya baaloondelela shikaali shino khukhwoolela ilala khu lwaakha ni Besusemesi.

13Babaandu be Besusemesi baaba balikho bakyesa iŋaano yaabwe mwitila. Ne nibenyusa tsimoni tsaabwe babona isanduuku iye kamakaambila y’Omukasya, betsula kumwikhoyo kumukali naabi. 14Tsikhaafu tsikhweesa shikaali tseetsa mu mukuunda kwa Yoswa uwe Besusemesi, tseemikha aambi ni kuubaale kuuboofu. Babaandu baarusakho Isanduuku iye kamakaambila, basaaka bibaawo bye shiikaali, baasa kumulilo, baawaanayo tsikhaafu tsana itso nga isaayilo intsoshe isi Umukasya. 15Ba Levi baasuta isanduuku iye kamakaambila y’Omukasya, baakira khu kubaale kuuboofu tsana, atweela ni sawu iyabamo bifwaani bye zaabu tsana. Khu shifukhu isho babaandu be Besusemesi baawaanayo biwaanwa bibiindi ni tsisaayilo isi Umukasya. 16Ne baaraangilisi baraano be Bafirisitiya ni baabona shino shishakholekha, beelayo i Ekuroni khu shifukhu sheene isho.

17Baryo Bafirisitiya baakaanisayo biwaanwa lwe khukhwibiiyisa bibyoonako byaabwe isi Umukasya, nga bifwaani biraano bye zaabu bibifwaana nga kamabiimba biweebwayo khulwe biriimba Ashidodi, ni Gaza, ni Ashikeloni, ni Gasi, ni Ekuroni. 18Naluundi nga bakaanisayo bifwaani bye zaabu bibifwaana nga tsimbeba khulwa buli shitweela khu biriimba bibiilikho kamatikiiyi ni bibyaalo bibikhaabakho kamatikiiyi, bibyawulibwa ni bayiinga baraano be Bafirisitiya. Ni kubaale kuboofu kweesi baarakho Isanduuku iye kamakaambila y’Omukasya, kushiiliwo ni shaleelo mu mukuunda kwa Yoswa uwe Besusemesi, khuuba nga kukushebusa lw’esho shishakholekha.

Isanduuku iye kamakaambila y’Omukasya iyilibwa i Kiriyasuyalimu

19Ne Wele weeraka batweela khu basaani be Besusemesi, baboola nga kamakhumi musaafu, lwekhuuba bekheengakho mukari mwe sanduuku iye kamakaambila y’Omukasya. Shino shaakila babaandu be Besusemesi baalila luukali, lwekhuuba Umukasya aabahesamo babaandu baakali.

20Shikila babaandu be Besusemesi baloma bari, “Mbaawo Wele ukuundi uuli umukhosefu nga Umukasya ta! Naanu unyala waatsya aambi ni naye waarama nga ali mulamu? Ifwe khuli ni khukhwirusakho isanduuku yino iye kamakaambila, ne ari khukiyila eena?”

21Baryo kila barumana baarume isi babaandu be Kiriyasuyalimu nga babaloma bari, “Bafirisitiya baakobosa isanduuku iye kamakaambila y’Omukasya. Nywe ni mwiitse mukiyile, ibeeyo ni nanywe.”