Swahili Bible2

5

Isanduuku iye kamakaambila nga ili Ashidodi ni Ekuroni

1Bafirisitiya ni baamala khuuyila isanduuku iye kamakaambila iya Wele, baakisuta khukhwaama i Ebenezeri, baakiyila i Ashidodi. 2Lwanyuma baakira mu lisaayilo lya wele waabwe Dagoni, baakira aambi ni shifwaani sheewe sheesi besaayatsaka. 3Ne ni bwasha kumutikhinyi kukweelakho, babaandu be Ashidodi baatsya mu lisaayilo lya Dagoni, baanyoola nga shifwaani sha Dagoni shaakwiile aasi mafumala mu moni tse sanduuku iye kamakaambila y’Omukasya. Baryo benyusa Dagoni baamwiisayo mu shifwo sheewe. 4Ne luundi ndi kumutikhinyi kukweelakho kwe shifukhu shishiindi, baanyoola ndi nga shifwaani sha Dagoni shaakwiile aasi mafumala mu moni tse sanduuku iye kamakaambila y’Omukasya. Ne kumuluundi kuno, kumurwe ni kamakhono ke shifwaani sha Dagoni nga byaabuumbulukhilekho, byakwiile iyo byonyene amulyaango, ni kusiintsa kukuuramile kwe kumubili nga nakwo nga kwaakwiile kuliiyo kwonyene. 5Shino nisho shishiikila khukhwoolesa ni shaleelo, basaayi ba wele Dagoni, ni babaandu babenjila mu lisaayilo lyeewe i Ashidodi, balekha khusaambakho khu shifwo isho namwe khuushikyeendelakho ta.

6Umukasya waawa babaandu be mu Ashidodi ni bisiintsa bibibotokheleelewo shitaambiso shiikali. Yabayo shiriisa shikali, lwe babaandu khuururaka kamarurise khu mibili kyaabwe. 7Lwanyuma lweebyo bibyaboolakho, babaandu be mu Ashidodi ni baabona baryo, baaloma bari, “Wele wa Isiraeli niye ukhuwa ifwe ni wele weefwe Dagoni shitaambiso yuno. Ni nashiryo, isanduuku yino iye kamakaambila siyakhiile khuuba ano ni nafwe luundi ta.” 8Baryo baaruma baarume khuutsya khulaanga baawuli be Bafirisitiya boosi baabareeba bari, “Isanduuku iye kamakaambila iya Wele wa Isiraeli, khukikhole khuryeena?”

Baawuli baabeelamo bari, “Isanduuku iye kamakaambila iya Wele wa Isiraeli nimukiyile i Gasi.” Baryo nabo baakiyila mu shiriimba she Gasi. 9Ne ni baamala khuukyolesayo, Umukasya waawa babaandu be mu shiriimba isho boosi shitaambiso khuururaka kamarurise khu mibili kyaabwe. Babaandu be Gasi nabo baaba ni khuurya khuukali naabi. 10Isho shaakila ndi isanduuku iyo iye kamakaambila iya Wele, baakiyila i Ekuroni, shishaba shiriimba shishiindi she Bafirisitiya. Ne ni boolesa isanduuku iyo i Ekuroni, babekhali b’eyo baalilila angaaki luukali nga baloma bari, “Nio ndi baareera ino isanduuku iye kamakaambila iya Wele wa Isiraeli, akhuhese nafwe fweesi!”

11Baryo nabo baarumana baarume khuutsya khulaanga baawuli be Bafirisitiya, baabaloma bari, “Nimwiiseyo isanduuku iye kamakaambila iya Wele, mukire mu shifwo shayo. Nio ilekhe khukhwiira ifwe ni babaandu beefwe ta.” Shaba shiryo lwekhuuba yabayo shiriisa she khuufwa shikali mu shiriimba shoosi, nga Wele abawa shitaambiso. 12Ni babaandu boosi babaarama nga baalamu, baaba bataambisikha busa lwe kamarurise. Babaandu boosi be mu shiriimba baalilila ba wele baabwe lwe buyeeti.