Swahili Bible2

4

1Na buli lomo yoosi isi Samweli akanikhatsaka, babaandu ba Isiraeli boosi baamuwuliilisatsaka.

Bafirisitiya bawaamba isanduuku iye kamakaambila

Shifukhu shitweela, ba Isiraeli benyukha baatsya mu busoolo khuusoolana ni Bafirisitiya. Ba Isiraeli nibo baabuusanila mu shifwo Ebenezeri, ne Bafirisitiya nabo baabuusanila mu shifwo Afeki. 2Bafirisitiya bebwakala ba Isiraeli buubi naabi. Ne busoolo ni bweloosela naabi, Bafirisitiya baafuura ba Isiraeli, baabeeramo baselikhale baboola bikana bine (4,000) mu kyeewa isi baasoolanila. 3Baselikhale be liiye lye ba Isiraeli babaaramawo beelayo mwibusanilo lyaabwe. Ne baaraangilisi ba Isiraeli bereeba bari, “Ne lwashiina Umukasya alekhile Bafirisitiya khuukhuwula ifwe shaleelo? Khayo khureere ano isanduuku iye kamakaambila y’Omukasya khukhwaama i Shilo, nio manya Umukasya abe ni nafwe, khutsye ni naye, manya waakhuwonesa khukhwaama isi baasiku beefwe.” 44.4: Luky 25.22Kila baryo barumanisa i Shilo, baatsya baareera isanduuku iye kamakaambila y’Omukasya, Umunyali wa byoosi, uwikhala angaaki mu bakerubi. Basooleli ba Eli baabili Hofuni ni Finehasi beetsa nga baasutile isanduuku iye kamakaambila iya Wele. 5Iryo isanduuku iye kamakaambila y’Omukasya ni yoolesebwa isi ba Isiraeli baabuusanila, ba Isiraeli boosi bayokesela angaaki lwe kumwikhoyo, ni shibala shoosi shaanikina. 6Ne Bafirisitiya ni baawulila liyoombo lye khuuyokesa khuno bereeba bari, “Khuuyokesa khuno khwoosi khukhwaama isi ba Heburaniya babuusaniile khumanyisa shiina?”

Ne ni baashimanyakho bari isanduuku iye kamakaambila y’Omukasya yoolele mu ba Isiraeli, 7Bafirisitiya baarya naabi. Kila baloma bari, “Wele weetsile mu ba Isiraeli, nashiryo ari ifwe kumutaambo kwaakhunyoolile! Lwekhuuba mbaawo shishiindu shishifwaana shiryo sishabatsakawo khwiifwe ta. 8Kumutaambo kwaakhunyoolile! Ari naanu unakhuyeeta akhuwonese ifwe khukhwaama mu bunyala bwe ba wele be kamaani bano? Bawele beene bano nibo babaahesa ba Misiri mu mubiimbi, nga babawa bitaambiso bya buli saambo yoosi. 9Ne inywe Bafirisitiya, ni mwiilemo kamaani, musoolane shisaani! Nio khulekhe khuyilibwa nga baakulwa be ba Heburaniya, nga nibo babeene ni babeele baakulwa beefwe ta. Ni muhandalale, musoolane shisaani.”

10Baryo Bafirisitiya baasoolana shisaani sheene, baawula ba Isiraeli. Na buli mutweela khu ba Isiraeli babaaramawo, waatima weelayo ingo weewe. Ne baselikhale be mu liiye lye ba Isiraeli babeeribwa boola kimikaanda kitaru (30,000). 11Ni Sanduuku iye kamakaambila iya Wele yaayilibwa, ni basooleli ba Eli baabili Hofuni ni Finehasi nabo beeribwa.

Khuufwa khwa Eli

12Khu shifukhu sheene isho, umusaani mutweela uwe mu shikuuka sha Benyamini, waatima khukhwaama iyo mu kyeewa isi baasoolanila, waatsya i Shilo. Aaba nga waatabulakile tsingubo tseewe lwe khukhwokyesanisa kumutaambo kumukali. 13Khu mbuka yino Eli aaba wekhaale khu shitsoloŋo sheewe aambi ni lukuuto nga waaliindiliile, naluundi nga weyembeleele lwe sanduuku iye kamakaambila iya Wele. Umusaani yuno n’ola mu shiriimba, waaboolela babaandu kamakhuuwa kano, boosi benyusa luwuungu lwe kamaani. 14Ne Eli n’awulila liyoombo lye luwuungu, waareeba ari, “Luwuungu luno lwoosi lwa shiina?”

Umusaani tsana waamutsyayo, waaboolela Eli kamakhuuwa kano. 15Eli aaba olesa kimiiko kye buukhulu kamakhumi syeenda na shinaane, naluundi nga tsimoni tseewe tsaabofwaala, nga saashinyalisa khuubona ta. 16Umusaani waaboolela Eli ari, “Ise niye uwaama khwaama iyo mwirome isi busoolo bubeele. Naama khutitukhayo shaleelo shino.”

Kila Eli amureeba ari, “Mwaana wase, bibeele biryeena?”

17Umusaani uyo uwareera kamakhuuwa weelamo ari, “Ba Isiraeli boosi batitukhile khukhwaama isi Bafirisitiya, ni babaandu baakali beeribwile. Ni basooleli boowo baabili Hofuni ni Finehasi nabo babeerire; ni sanduuku iye kamakaambila iya Wele nayo Bafirisitiya baakiwaambile.”

18Ne Umusaani uyo n’akanikha khu sanduuku iye kamakaambila iya Wele, Eli uwaba umusaani umukore luundi nga waanera naabi, waahanukha khukhwaama khu shitsoloŋo sheewe khweesi aaba wekhaale aambi ni shilibwa. Waakwa aasi waafunikha likosi, waafwa na khufwa. Eli aaba waaraangilila Isiraeli khuumala kimiiko kamakhumi kane kamabuufu. 19Umukhaana umumasaala wa Eli, uwaba umukhasi wa Finehasi aaba waahesa nga ali shisoombo, nga ali aambi khuusaala. Naye aryo nga n’awulila kamakhuuwa kano bari isanduuku iye kamakaambila iya Wele Bafirisitiya baakiwaambile, naluundi bari paapawe umumasaala n’umuseetsa weewe baafwiile, buutsiina bwe khuusaala bwaamulya, waasaala umwaana. Ne buutsiina bwaba bukali naabi. 20Ne nga ali aambi khuufwa, bakhasi babaaba bamuyeeta, baamuloma bari, “Ukharya ta. Umwaana isi usaalile umusiinde.” Ne niye waalekha khubeelamo namwe khubenaanayo ta.

21Aryo umwaana uyo waamutwiikha lisiina ari Ikabodi lilimanyisa liri, “Shiriifwa sha Wele shaarurire mu Isiraeli.” Shino shaba shiryo lwekhuuba isanduuku iye kamakaambila iya Wele, Bafirisitiya baaba baakiwaambile, ni lwe khuufwa khwa paapawe umumasaala, nikhw’omuseetsa weewe Finehasi. 22Aryo shikila waaloma ari, “Lwe khuuyilibwa khwe sanduuku iye kamakaambila iya Wele, shiriifwa sha Wele shaarurire mu Isiraeli.”