Swahili Bible2

30

Buusoolo ni Amaleki

1Dawudi ni basaani beewe bakyeenda boola i Zikulaga khu shifukhu she khataru. Khu mbuka iyo ba Amaleki baaba bayibwakaala naluundi batsonwaaka biriimba Negebu ni Zikulaga. Baaba baamala khukhwoosha Zikulaga ni kumulilo, 2bawaambaka bakhasi, ni babaandi boosi babaashibamo; babaana ni baakhulu beene. Mbaawo na mutweela isi beera ta, ne baabayilaka busa nga baalamu nga ni beeloosela khuutsya mu moni.

3Ne Dawudi ni basaani beewe ni boola i Zikulaga, baanyoola nga shiriimba shoosi bashookhile shaakwiile shili aasi. Naluundi baawulila bari babaandu be muungo mwaabwe boosi, bakhasi ni babaana bekhaana ni basooleli beene, baabayilile nga baabowe. 4Baryo baarakikha khuulila, baalekha khwaakamisa ta, khukhwoolesa boosi ni baaweelamo ilala kamaani ke khuulila. 530.5: 1 Sam 25.42,43Ni bakhasi ba Dawudi babili, Ahinomu ni Abigayili, nabo nga baabayililemo nga baabowe.

6Awo Dawudi waaba mu mutaambo kumukali naabi. Lwekhuuba baselikhale beewe nabo bawaambibwa kumutaambo kumukali naabi, lweesho shishaba shakholikhile khu baana baabwe basooleli ni bakhaana, bakana khukhupa Dawudi kamabaale bamwiire. Ne Dawudi wafuna kamaani khukhwaama isi Umukasya Wele.

730.7: 1 Sam 22.20-23Dawudi waalomela umusaayi Abiyasaari umwaana wa Ahimeleki ari, “Indereere i efodi iyo.” Abiyasaari naye waamureerera byeesi aakana. 8Shikila Dawudi ereeba isi Umukasya ari, “Inyala khuutsya naaloonda khu batsoonwaaki abo? Ne manya kane inyalise khuubawaamba?”

Umukasya waamwiilamo ari, “N’ubaloondekho. Kane unyalise khuubawaamba, naluundi kane uwonese babaandu be muungo mweenywe.”

9Aryo Dawudi ni basaani beewe bitoondo bisesaba baarakikha lukyeendo, baatsya khukhwoolesa ni boola khu kheetsi Besori, isi baalala khu nibo baarama inyuma. 10Ne Dawudi weloosela ni babaaramile bitoondo bine (400), lwekhuuba bitoondo bibili (200), baakhasikha khukhwaambukha khu kheetsi, nga baaluwile naabi.

11Baselikhale ba Dawudi baanyoola umuundu khukhwaama i Misiri nga ali iyo mwirome, baamureera isi Dawudi. Baryo baamuwakho kumukaati khuulya, naluundi baamuwakho kameetsi khuunywa, 12baamuwakho ni tsimiitso tse kufigi tsinyomu, ni biyuuyi bibili bye tsizabibu. Aryo n’amala khuulya, welamo kamaani, wewulila buulayi, lwekhuuba abe waamalile biifukhu nga bitaru nga mbaawo sheesi aliilekho namwe khuunywakho ta.

13Lwanyuma Dawudi waamureeba ari, “Iweewe umukoosi woowo niye naanu? Naluundi iwe waama waheena?”

Kila umusaani uyo amwiilamo ari, “Ise naama i Misiri. Ise ndi umwakaanisi w’Omumaleki mutweela. Umukoosi wase uyo n’abona nga ise ndi mulwaale, andekha ano biifukhu bitaru bibiibirire. 14Ifwe khwaba khwaamalile khuutsonwaaka shiriimba she mu mubiimbi Negebu she Bakeresi, shishiili imwaalo wa Yuda, ni shisiintsa she shikuuka sha Kalebu. Khwatsya khwoosha, khwamalila aasi shiriimba Zikulaga.”

15Dawudi waamureeba ari, “Unyala waakhuraangilila waakhuyila, waakhwookesa ba Amaleki abo?”

Umusaani naye welamo ari, “E e, kane imbayile isi baatsoonwaaki abo, siinga muntsitsubila mu lisiina lya Wele, muri singene muntsire ta, namwe muri singene mumbaaneyo isi umukoosi wase ta.”

16Umusaani uyu waabaraangilila waabayila isi ba Amaleki. Ni boolayo baanyoola nga baasalaniile busa, nga balikho balya luundi nga banywa, nga balikho bekhoya lwe bibiindu byeesi baaba baafunile khukhwaama mu shibala she Bafirisitiya, ni sha Yuda. 17Dawudi waabebwakala nga antsye bushiili kamamilimili, waabasoolanisa khukhwoolela ilala angoloobe nga inyaanga ikwa. Mbaawo na mutweela khu nibo uwatitukhakho ta, khuurusakho basaani baahele bitoondo bine (400) bonyene nibo babekaama khu ŋamila baatitukha. 18Dawudi waawonesa buli shiindu shoosi sheesi ba Amaleki baaba baayilile khukhwaama i Zikulaga, waawoneselamo ni bakhasi beewe boombi. 19Mbaawo shishiindu na shitweela shishakoraanakho. Dawudi aakobosa babaandu be muungo mwe baselikhale beewe boosi, babaana na baakhulu beene, basooleli ni bakhaana beene. Mbaawo uwakoraanakho ta. 20Dawudi aakobosakayo ni bibyaayo byeene, mumuuli kamasheese ni tsikhaafu byeesi ba Amaleki baayila. Basaani beewe baabisama khuubiyila nga byaaraangiile iburaangisi we bibyaayo bibiindi, lwekhuuba buli mutweela aaloma ari, “Bino byoosi bili bibiindu bya Dawudi.”

21Ni baaba nga bakobolayo, Dawudi weetsa isi basaani bitoondo bibili tsana, babaarama khu kheetsi Besori, lwekhuuba baaba baaluwile naabi, nga sibanyala khukhwilooselayo ta. Babaandu beetsa khukhwakaanila Dawudi, ni naabo beesi aaba nabo. Dawudi n’ola aambi isi bali waabakheesa, waabareeba nga ni bali.

22Ne batweela khu basaani ba Dawudi babaaba baalumaandu, naluundi nga sibenaanayo khu baandi ta, baaloma bari, “Babaandu bano babaakhaatsya ni nafwe mu busoolo, sibanyala baakabanana khu biindu byeesi khwafuna khukhwaama khu ba Amaleki ta. Khuurusakho buli muundu ayile busa umukhasi weewe ni babaana beewe, eleyo ingo.”

23Ne Dawudi weelamo ari, “Balebe, inywe simunyala mwaakhola muryo khuuba ni kumuluungo khu biindu byeesi Umukasya akhuweele ifwe ta. Niye akhuliindile khwaatsya, waakhunyalisisa khuuwula batsonwaaki. 24Naanu unyala khuubawuliilisa byeesi inywe muloma ari? Baselikhale babaarama khuliinda bibiindu byeefwe ano, ni naabo babaatsya mu busoolo, buli mutweela afuna kumukabo kukulekhaana.”

25Dawudi waabirisa likaambila ilyo mu Isiraeli, khukhwaamila abweene awo ni khukhwoola shaleelo shino.

26Dawudi n’elayo i Zikulaga, waakanisakakho biwaanwa isi basaale beewe babaaba baaraangilisi mu Yuda, nga abalomela ari, “Bibiindu bino khwabifunile khukhwaama khu baasiku b’Omukasya.”

27Dawudi aakaanisaka biwaanwa bino isi abo babaaba i Beseli, i Ramosi shishaba shisiintsa she Negebu, ni Yatiri. 28Waakaanisakho ni be Aroeri, ni Sifumosi, ni Eshitemowa, 29ni be Rakali, ni babekhali be mu biriimba Yerameeli, atweela ni Bakeni, 30ni naabo be Horuma, ni Borusani, ni Ataki, 31ni be Heburoni. Waakaanisakakho biwaanwa ni isi biriimba bibiindi mweesi niye ni basaani beewe baakyeendatsakila.