Swahili Bible2

3

Umukasya alaanga Samweli

1Umusooleli Samweli wakaanisatsaka Umukasya nga ayeetakho umusaayi Eli. Mu biifukhu ibyo, Wele s’aba nga akanikhaka isi babaandu shabusheele ta, ni khuubonekhelwa khukhwaama is’ali khwaba khukyeekhe naabi.

2Mu shilo shitweela, Eli uwaba nga saashibona buulayi ta, nga waabofwaala tsimoni, aaba nga waakonile mu shiseenge sheewe. 3Samweli aaba waakonele aasi mwisaayilo ly’Omukasya, mumwaba isanduuku iye kamakaambila iya Wele. Itaala ya Wele yaba nga ishiili khusima ta, 4Umukasya walaanga Samweli lisiina ari, “Samweli, Samweli.”

Ni Samweli naye welamo ari, “Ise niy’oyu.” 5Aryo kila enyukha atimaka isi Eli, waamuloma ari, “Ise niy’oyu paapa nga n’unaangile.”

Ne Eli waamwiilamo ari, “Ise akhukhulaangakho ta. N’uwileyo ukone aasi.” Aryo Samweli welayo waakona.

6Umukasya waamulaanga luundi ari, “Samweli.” Samweli ndi wenyukha waatimaka isi Eli, waaloma ari, “Ise n’iyooyu, nga n’unaangile.”

Eli waamwiilamo ari, “Mwaana wase, ise sinakhulaangilekho ta. N’uwileyo, utsye ukone aasi.”

7Samweli s’amanya ari Umukasya niye uwaba amulaanga ta, lwekhuuba Wele aba ashiili khumukanikhatsakayo ta.

8Umukasya walaanga Samweli kumuluundi kwe khataru. Ndi luundi wenyukha waatimaka isi Eli, waamuloma ari, “Ise niy’oyu paapa, unaangile.”

Abweenewo Eli waamanya ari Umukasya niye uwaba ali khuukanikha isi umwaana uyo. 9Shikila Eli waaloma Samweli ari, “N’uwileyo, utsye ukone aasi. Ne noola nga waakhulaangile luundi, uloma uri, ‘Umukasya, n’ukanikhe ni nase. Ise umwakaanisi woowo naarekeeresile.’ ”

Aryo Samweli welayo waakona aasi mu shifwo sheewe.

10Umukasya weetsa weemikha aambi ni naye, walaanga luundi Samweli, nga n’akhola kimiluundi kikyanyoowa ari, “Samweli! Samweli!”

Samweli welamo ari, “Umukasya, n’ukanikhe ni nase. Ise umwakaanisi woowo naarekeeresile.”

11Aryo Umukasya waaloma Samweli ari, “Iliwo shishiindu shikosi naabi sheesi ntsya khukhola khu baandu ba Isiraeli, na buli muundu yeesi ulishiwulilakho, alilulukha busa. 12Khu shifukhu isho, indyoolesa khu Eli ni ntsu yeewe bitaambiso byoosi byeesi nasuubisa, khukhwaama khu khurakikha khukhwoolesa khu ntsakamo. 13Lwekhuuba ise namuboolela ndi ntsya khuwa be mu ntsu yeewe shitaambiso shikhawawo ta, lwe shishoonako isho sheesi umweene aamanyakho, nga basooleli beewe benyaalutaka isi Wele, ne niye waalekha khubakhaangabisa ta. 14Ni nashiryo, ise netsubila ilala khu lwe ntsu ya Eli ndi, mbaawo shishiwongebwayo namwe shiwaano shishinyala shaarusawo shiibi shikali shino sheesi bakholile ta.”

15Aryo Samweli waarama mu bulili bweewe khukhwoolela ilala kumutikhinyi. Lwanyuma wenyukha wekulakawo kimilyaango kye ntsu y’Omukasya. Ne waaba waariire naabi waalekha khuboolelakho Eli byeesi Umukasya aaba waamubooleele mu khubonekhelwa ta. 16Ne Eli waamulaanga waamuloma ari, “Mwaana wase Samweli!”

Samweli naye weelamo ari, “Ise niy’oyu paapa.”

17Eli waamureeba ari, “Shiina sheesi Umukasya akhuboolele? Ukhaambisakho ilomo yoosi ta. Ni nawe nikane umbisekho ilomo yoosi khu byeesi akhubooleele, Wele kane akhuwe shitaambiso.” 18Aryo kila Samweli amuboolela byoosi byeesi Umukasya aamuloma, nga mbaawo ni ilomo na ndweela isi aamubisakho ta. Shikila Eli naye aloma ari, “Niye ali Umukasya, naakhole shoosi sheesi kane asiime.”

19Samweli waatsowa nga Umukasya ali ni naye, naluundi buli lomo yoosi isi Samweli aakanikhatsaka, Umukasya aakyolelesatsaka. 20Ni babaandu boosi ba Isiraeli, khukhwaamila ilala i Dani khukhwoola i Berisheba baashimanya bari, Samweli ilala ali Umuŋoosi w’Omukasya. 21Umukasya weloosela naabi khukhwiyokesanisa isi Samweli i Shilo, nga amuwatsaka ilomo shiina iye khuukanikha.