Swahili Bible2

29

Bafirisitiya bekaana Dawudi

1Bafirisitiya baareera liiye lyaabwe lyoosi baalibuusanisila i Afeki, ne liiye lye ba Isiraeli lyaabuusanila i Yezureeli. 2Baawuli be Bafirisitiya ni baaba nga balikho bakhuumba ni baselikhale beesi baaraangilila nga bali mu matuuli ke bitoondo, ni bikana; Dawudi naye waaba nga ali khuukhuumba ni basaani beewe inyuma waabwe nga ali atweela ni Akishi. 3Kila baakhulu be liiye lye Bafirisitiya ni baababona, bareeba bari, “Ne Baheburaniya bano bakhola shiina ano?”

Kila Akishi abeelamo ari, “Uyu niye Dawudi, uwabatsaka mutweela khu baakhulu mu buyiinga bwa Saulo, umuyiinga wa Isiraeli. Dawudi yuno waamenyile ano ni nase khuumala imbuka ndeeyi khukhwaama nga n’arura khu Saulo weetsa wetubaasa khu liiye lyase. Ise naakhumubonatsakamo shikosi shoosi ta.”

4Ne baakhulu be liiye lye Bafirisitiya bano baakhalalila naabi Akishi, kila bamulomela bari, “Umusaani yuno mukoboseyo khaangu mu shiriimba sheesi wamuwa. Ifwe sikhunyala khwaatsya ni naye mu busoolo ta, lwekhuuba anyala khukhwoola iyo, waakhushuukhila nga khulikho khusoolana. Anyala waalekha khufuna isaambo ikiindi iye khukhwikhoyesamo isi Saulo ta, khuurusakho nga waamuyiliile kimirwe kye baselikhale beefwe ano. 529.5: 1 Sam 18.7; 21.11Umweene yuno s’ali niye Dawudi isi bakhasi bashinila nga bamweembakho kumweenya bari,

‘Saulo weerire bikana bye baasiku beewe;

ne Dawudi weerire kimikaanda kye baasiku!’ ”

6Shikila Akishi alaanga Dawudi, waamulomela ari, “Ise ikhwitsubila mu lisiina lya Wele wa Isiraeli Umulamu ndi, iwe ubeelatsakile umuundu umwiyikinwa is’indi. Nashiryo abe naandikanile iwe usoolanile atweela ni nafwe. Khukhwaamila ilala khu shifukhu khweesi weetsila waakhwitubaasakho, ise naakhukhubonamwo buubi bwoosi ta. Ne baawuli babaaramile be Bafirisitiya sibaakhufukiilisile bari utsye ni nafwe ta. 7Nashiryo, n’uwileyo ingo mu lukoosi, ukhabakho ni sheesi ukhola shaabakhalasa ta.”

8Naye Dawudi welamwo ari, “Ne ari ise naakholile shiina? Iwe manya iliwo ilomo yoosi isi wambonamwo ise khukhwaama nga niitsa ano? Shiina ndi shishinyala shakhaanga ise khuutsya ni nawe umuyiinga wase, khusoolanisa baasiku boowo?”

9Akishi waamwiilamwo ari, “Ise ifukiilisa ndi iwe uli umuundu umulayi mu moni tsase nga n’ubona malayika wa Wele. Ne baakhulu be liiye lye Bafirisitiya baakhalilewo bari singene bakhufukiilise iwe utsye ni nafwe khusoolana mu busoolo buno ta. 10Nashiryo, ingana iwe ni baselikhale boowo beesi weetsa nabo khukhwaama khu Saulo, mwinyukhe kumukaamba kumutikhinyi mu mamilimili, mwiileyo.”

11Aryo Dawudi ni basaani beewe beerekekha, benyukha kumutikhinyi mu mamilimili, bakyeenda beelayo mu shibala she Bafirisitiya. Ne Bafirisitiya nibo bakyeenda baatsya kwe Yezureeli.