Swahili Bible2

26

Dawudi ndi luundi alekha khukhwiira Saulo

126.1: Zab 54Luundi ndi yabayo babaandu babaama i Zifu babaatsya i Gibeya khuutsya khukanikha ni Saulo, nga bamuboolela bari, “Dawudi ali ni shiifwo she khukhwiibisamo khu lukiingi Hakila aambi ni Jeshimoni shishiili mu mubiimbi.”

2Kila Saulo ndi enyukhilamo, waarobola baselikhale baalayi baboola bikana bitaru (3,000), be mu liiye lya Isiraeli, baatsya khuweentsa Dawudi iyo mu Mubiimbi kwe Zifu. 3Saulo waabuusila liiye lyeewe khu ndulo khwe lukuuto lulwaba lulolelanila ni lukiingi Hakila, nga luli aambi ni Jeshimoni. Ne Dawudi niye waarama mu khwiibisa khweewe iyo mu mubiimbi. Dawudi n’ashimanyakho ari Saulo weetsile khuumuweentsa, 4waarumana baabapelelesa, khuutsya khumanya oba shili sha ŋali shili Saulo weetsile.

5Lwanyuma Dawudi wenyukhilakho khaangu, waatsya isi Saulo ni liiye lyeewe babuusaniile. Dawudi waatsya waashifumbula nga Saulo ni Abuneri, umusooleli wa Neri, umukhulu we liiye lyeewe, baaba baakonile akari e libusanilo lye liiye, ni baselikhale babaaramile nga baakonile tsindulo tsoosi. 6Kila Dawudi areeba Ahimeleki uwaba Umuhiiti, ni Abisaayi wandaaye wa Yowabu, babaana b’omukhasi Zewuriya26.6 Zewuriya: Zewuriya aaba umukooko wa Dawudi umukhulu, nashiryo Abisaayi ni Yowabu baaba babewaana ba Dawudi ari, “Khwiinywe naanu ukane atsye ni nase isi Saulo abuusiile liiye lyeewe?”

Abisaayi weelamo ari, “Ise kane intsye ni nawe.”

7Mu shilo isho, Dawudi ni Abisaayi bekhweesa mbola, boola isi Saulo ni liiye baabuusanila. Saulo aaba nga ali khuukona akari e liiye, ni lifumo lyeewe nga baalisimikhile mwiloba aambi ni kumurwe kweewe. Abuneri ni baselikhale babaaramile boosi nabo baaba balikho bakona. 8Kila Abisaayi alomela Dawudi ari, “Khu mbuka yino Umukasya waakhuweele umusiku woowo mu mukhono kwoowo! Ari lekha ise imuwunile khwiloba kumuluundi mutweela kwonyene, nga inaambisa lifumo lyeewe lilyeene, singene ibe khabili ta.”

9Kila Dawudi alomela Abisaayi ari, “Ukhamukhoonya ta. Lwekhuuba naanu ilala unyala khuutiila khu murobole wa Wele, ni Wele waamulekha busa aryo? 10Mu ŋali nga Umukasya n’ali umulamu, Umukasya umweene akheere Saulo, namwe Saulo anyala khuufwa ni luufu lwa busheele, namwe balimwiirira mu busoolo. 1126.11: 1 Sam 24.6Ne ise inoomba ndi Umukasya akhaafukiilisa ise khuukhola buubi umuyiinga weewe umurobole ta. Ne khuurusakho ifwe khakhusute busa lifumo lyeewe liliili aambi ni kumurwe kweewe, ni muka yeewe iye kameetsi, khurure ano khutsye.”

12Aryo Dawudi waasuta lifumo lilyaba aambi ni kumurwe kwa Saulo, waasuta ni muka yeewe iye kameetsi, baarura baatsya. Ne bino bikholikha biryo, mbaawo namutweela khu basaani ba Saulo, uwabonakho namwe waashimanyakho namwe waasisimukhakho ta. Abe Umukasya waabasiindikhiile liilo liikali lilyeene. 13Dawudi ni Abisaayi baakhalisa litila, baatsya baaniina khu lukiingi luluundi, isi baabonela nga mbaawo buubi bwoosi ta, 14kila Dawudi ekhuunga isi liiye, nga aloma ari, “Abuneri! Iwe ulikho umbulila? S’unyala waantsilamo ta?”

Kila Abuneri naye elamo ari, “Iwe naanu uuli khuukhupila umuyiinga liyoombo?”

15Dawudi naye waamwiilamo ari, “Iwe uli umusaani wa saambo shiina? Iwe s’uli niye ufuura mu liiye lyoosi lya Isiraeli? Ne lwashiina iwe ukhanyalisile khuukhiinga umuyiinga woowo? Lwekhuuba ibeelewo umuundu mutweela uwiitsile mu libusanilo lyeenywe ilyo, waakana khukhwiira umuyiinga weenywe shiilo shino. 16Iwe nga umuliindi waakhaasikhile mu mulimo kwoowo. Ilala ikhwitsubila ndi iwe, ni baaliindi babaandi babaaramile boosi mwaakha khukhwiiribwa, lwe khuulekha khukhiinga buulayi umuyiinga wa Wele umurobole ta. Ari lolaka buulayi khubone, lifumo ly’omuyiinga lilibeele aambi ni kumurwe kweewe, ni imuka yeewe iye kameetsi biliwo?”

17Saulo waamanya buulayi likono lya Dawudi, kila naye ekhuunga ari, “Dawudi, iwe niye, mwaana wase?”

Dawudi naye weelamo ari, “Ise niy’oyu. O Umuyiinga.” 18Dawudi weloosela nga aloma ari, “Lwashiina kila iwe ulikho umeentsa ise naabi uryo? Manya iliwo sheesi ise nakhukholakho shiibi, namwe ise ndi na musaango shiina? 19O Umuyiinga ikhuloomba urekeeresa sheesi ise inoma. Siinga nga Umukasya niye uuli khuukila iwe unganisa buubi, khali afukiilile isaayilo ashuusakho bibyambaaso byeewe. Ne siinga nga bali babaandu busa babaali khuukhushuusa iwe lwe buubi, khali Umukasya abaweele shitaambiso. Lwekhuuba bona nibo baayimboona ise naarura mu shibala sh’Omukasya, baakila ise naayitsa ino khukhwiisaaya ba wele babaandi. 20Iwe ukhashifukiilila ise naafwiila mu shibala shireende shishiili aleeyi n’Umukasya ta. Lwashiina iwe nga umuyiinga wa Isiraeli wiitsa khuuweentsa ise, uuli induusi busa! Iwe khukhuumeentsela mu njiinji nafwaana busa nga khanywiinywi khe mwirome?”

21Kila Saulo elamo ari, “Mwaana wase Dawudi, iwe abe ubeele uwe khukhuuntsira ise shaleelo shino, ne buulamu bwase bubeele bwe kumukaso naabi is’uli! Nashiryo ise noonakile naabi, khuukhola shishiindu nga shino she khuukana khuukhwiira iwe. Ise nibirisile nga umuundu umusilu. Ne n’ukobole, ise singene ikhukholekho buubi bwoosi ta.”

22Dawudi naye weelamo ari, “O Umuyiinga, bona lifumo lyoowo ilishiina. Rumana mutweela khu bakaanisi boowo eetse alikhurereere. 23Umukasya asasula buli muundu nga emikha khu bukwalaafu ni bubwiyikinwa bweewe. Umukasya abe shaleelo shino akhumbeele mu mukhono kwase, ne ise abe sinyala khuutiila khu murobole w’Omukasya ta. 24Ise musaambo isi ikhuwoneselemo iwe buulamu bwoowo, nase inoomba ndi Umukasya khali aniindile ise, andusa mu bikosi byase bino byoosi.”

25Ndi Saulo waalomela Dawudi ari, “Mwaana wase Dawudi, ise ikhuloombela ndi khali Umukasya akhuweele iwe tsikhabi, na buli sheesi ukhola shikhutsiila buulayi.”

Aryo Dawudi waatsya mu ntsila tseewe, ni Saulo niye weelayo ingo weewe.