Swahili Bible2

24

Dawudi aloba khukhwiira Saulo

1Lwanyuma nga Saulo waakoboole khukhwaama mu busoolo ni Bafirisitiya, waawulila bari Dawudi ali mu mubiimbi kwe Engedi. 2Kila Saulo ayila baselikhale bikana bitaru (3,000) babaafuura buulayi mu Isiraeli mwoosi, khuutsya khuweentsa Dawudi ni basaani beewe aambi ni Lulwaanda lwe Tsimbusi Tsimusiru luluuli i Engedi. 324.3: Zab 57; 142Saulo weetsa isi lifuluma lyaba, nga lili aambi ni litaala mweesi kamasheese kaliindibwila. Lifuluma lino lyaba aambi ni intsila, kila enjila mukari mwalyo khukhwiyeeta. Dawudi ni basaani beewe baaba beebisile mukari ilala mwe lifuluma lino. 4Kila basaani ba Dawudi balomela Dawudi bari, “Umukasya aakhulomela iwe ari atsya khukhuyeeta iwe khuuwula baasiku boowo boosi, ni khuukhuyeeta iwe khuukhola shishiindu shoosi sheesi ukana. Shino shaakhiile khuuba nga nisho shifukhu sheene isho.”

Lwanyuma Dawudi wenyukha mu mbola busa waatsya waakhalakho khasiintsa khe ngubo khu ngubo ya Saulo. 5Ne lwanyuma Dawudi kumwoyo kweewe kwaamutsiina naabi lwe khuukhola shishiindu nga isho. 624.6: 1 Sam 26.11Kila alomela basaani beewe ari, “Khali Umukasya ashikhaliilisile ise indoba khukhola shishiindu nga shino khu muundu isi Umukasya aarobola khuuba umuyiinga ta! Ise sinyala naakhakakho na khakyeekhe khuukholakho Saulo buubi bwoosi ta, lwekhuuba niye ali umuyiinga wase.” 7Ni bilomo bino Dawudi waakhoongelesa basaani beewe baalekha khwibwakala Saulo ta. Aryo Saulo wenyukha, waarura mu lifuluma waatsya mu ntsila tseewe. 8Lwanyumakho khakyeekhe, Dawudi naye waarura mwifuluma tsana waatsya. Nga waakyeendakilekho khakyeendo, wekhuunga ni likono liikali ari, “O Umuyiinga wase.” Saulo weshebukha waabona Dawudi. Ni Dawudi aryo weenama aasi kumurwe kweewe khuumwiisamo shiriifwa. 9Waalomela Saulo ari, “O Umuyiinga, lwashiina urekeeresa byeesi babaandu bakhuboolela bari ise ingana khukhukholakho buubi? 10Waakha khuushibona uri abe shaleelo shino Umukasya ambeele ise ikhabi iye khuukhwiira iwe mu lifuluma. Batweela khu basaani baase abe bakanile khuukhwiira iwe, ne ise simbafukiilisile ta. Ise imbabooleele ndi ise sinyala naakhola buubi khu muundu isi Umukasya aatsukhakho kamafura ta. 11Ne ari O Umuyiinga, bonakho shisiintsa she ngubo khukhwaama khu ngubo yoowo, sheesi ise imaambile mu mukhono kwase! Shisiintsa shino ishikhalile khu ngubo yoowo, ne nalekha khukhwiira iwe ta. Ise ikhulekhile iwe khuuba mulamu nio shikhwokesanise shiri ise s’indikho ni buubi bwoosi bwe khukhwiira iwe namwe khuukhumiinyaalila ta. Ise naakhukhukholakho buubi bwoosi ta, ne iwe bona umeentsa ise nga ukana khukhuuntsira. 12Ne khali Umukasya umweene akhalilewo kumusaango kuno akari owo ni nase. Inoomba ndi khali Umukasya akhuweele iwe shitaambiso lweesho sheesi uli khukana khukhukhola khwiise, ne mbaawo sheesi kane ikhukhole khwiiwe ta. 13Nga n’umanyile lulikha lwe bakhale lululoma luri, ‘Buubi bwaama mu muundu umubi.’ Ne ise singene ikhukholekho buubi bwoosi ta. 1424.14: 1 Sam 26.20Ne shiina ilala shishireerire umuyiinga wa Isiraeli khukhwiitsa nga andimisa ise? Iwe ulikho utimisa ise uuli busa nga imbwa ifwiile, namwe uuli induusi busa! 15Ise inoomba ndi Umukasya umweene akhalewo naanu uuli umubi, naluundi awe shitaambiso akari aase ni nawe. Niye umweene ukane ambonese ise khukhwaama mu bunyala bwoowo.”

16Lwanyuma nga Dawudi waamalile khuukanikha bibiindu bino byoosi, Saulo waamureeba ari, “Ilala iwe niye Dawudi umusooleli wase?” Lwashino, Saulo waarakikha khuulila luukali. 17Saulo waamulomela ari, “Dawudi iwe uli umukhosefu khukhufuurakho ise. Lwekhuuba iwe waasaasiile ise ni shiisa shikali, ne ise naabeele umuundu umubi naabi isi iwe. 18Shaleelo shino iwe waantsokesile ise uri, waabeele umulayi naabi isi ise. Bona abe Umukasya ambeeleyo ise mu mukhono kwoowo, ne iwe s’untsirire ta! 19Mwilala, umuundu nga waanyoolile umusiku weewe, s’anyala waamulekha nga mulamu ta. Nashiryo, ise inoomba ndi khali Umukasya akhuweele iwe shiwaanwa shikali lweesho sheesi ukholile shaleelo. 20Shaleelo shino ise naamanyiile ilala ndi, iwe niye utsya khukhwiilawo nga umuyiinga wa Isiraeli, naluundi ni buyiinga ubwo bukhaabe bwe kamaani. 21Ise ikhuloomba iwe ndi, untsitsubile isi Umukasya, khukhwookesanisa uri singene wiire babetsukhulu baase ubamalewo ta. Ubalekhatsake babe baalamu, beloosele lisaaye lyase.”

22Dawudi wetsubila Saulo nga n’amuloomba khushikhola. Lwanyuma Saulo welayo ingo weewe, ni Dawudi naye ni basaani beewe beelayo mu bwibisilo bwaabwe.