Swahili Bible2

23

Dawudi awonesa shiriimba she Keyila

1Shifukhu shitweela, babaandu beetsa baaboolela Dawudi bari, “Bafirisitiya balikho bebwakala shiriimba she Keyila, naluundi balikho banuula biilyo khukhwaama mu mawuliilo.” 2Kila Dawudi atsya khukhwiireeba khu Mukasya ari, “Inyala khuutsya nebwakala Bafirisitiya bano?”

Umukasya waamwiilamo ari, “E e, n’utsye ubebwakale, uwonese shiriimba Keyila.”

3Ne basaani ba Dawudi baamuloma bari, “Ifwe abe yakhaba ano mu Yuda, khwayiyembelela naabi Bafirisitiya. Ne ari kane shoole eena, nikane khutsye khubebwakalile i Keyila.”

4Ndi luundi Dawudi waatsya wereeba khu Mukasya. Ne Umukasya waamuloma ari, “Yinyukhilamo utsye i Keyila, ni nase kane ikhunyalisise khuuwula Bafirisitiya abo.”

5Aryo Dawudi ni basaani beewe baatsya bebwakala Bafirisitiya. Baabasoolanisa ni kamaani kamakali, beera baakali khu nibo, baabukula tsikhaafu tsaabwe. Baryo baawonesa babaandu be Keyila.

6Nga Abiyasaari umwaana wa Ahimeleki n’atitukha khuutsya i Keyila khukhwitubaasa ni Dawudi, atsya ni efodi.

7Khu mbuka iyo Saulo waawulila bari Dawudi waatsiile i Keyila, kila elomela ari, “Ari Wele waamumbeele mu mukhono kwase. Dawudi ari wahaambikhiile mu shiriimba shishiilikho kamatikiiyi ni bilibwa.” 8Kila alaanga baselikhale beewe khukhwirekekhela busoolo, waabaloma bakhuumbe batsye i Keyila, bawaambe Dawudi atweela ni basaani beewe.

9Ne Dawudi n’awulila bari Saulo ali khukhwiitsa khuumuwaamba, waalomela umusaayi Abiyasaari ari, “Khakhwireebekho isi Wele akhuboolele shiina she khuukhola.”

10Lwanyuma Dawudi waaloomba ari, “O Umukasya Wele wa Isiraeli, ise umwakaanisi woowo naawuliile bari Saulo ali khuukana khukhwiitsa ano i Keyila, nga akana khukhwoonakisa shiriimba shino khulwase. 11Manya babaandu be Keyila bano banyala bambaanayo isi Saulo? O Umukasya Wele wa Isiraeli, ise ikhwikoontselela ndi umboolele.”

Kila Umukasya amwiilamo ari, “E e, Saulo kane eetse.”

12Dawudi waareeba luundi ari, “Ne manya babaandu be Keyila kane bambaaneyo ise ni baselikhale baase isi Saulo?”

Umukasya waamwiilamo ari, “E e, kane bakhuwaaneyo.”

13Aryo Dawudi ni basaani beewe, babaaba boola nga bitoondo bisesaba, benyukha khukhwaama i Keyila nga bakyeendaana mu bifwo bibikhali bitweela ta. Saulo n’awulila ari Dawudi warurire i Keyila watsiile, wakhalawo khulekha khumuloondakho ta.

14Aryo Dawudi waamenyatsaka mu bifwo bye bubwibisilo, bye mu ngoongo mu Mubiimbi kwa Zifu. Saulo weloosela khuuweentsa Dawudi buli shifukhu, ne Umukasya walekha khuwaanayo Dawudi mu makhono keewe ta.

15Khu mbuka isi Dawudi aabeela mu shifwo she Horeshi mu mubiimbi kwa Zifu, waaba ni buuri bukali naabi, lwekhuuba Saulo aaba nga alikho aweentsa khuumwiira. 16Ne Yonasani umusooleli wa Saulo waatsya khuubona Dawudi mu shifwo isho, waamuyeeta nga amwiisamo kamaani mu Wele. 17Yonasani waamulomela ari, “Ukheyembelela ta. Paapa wase Saulo singene anyaalise khuukhwiira iwe ta. Lwekhuuba niye waamanyila ilala ari, iwe niye utsya khukhwiilawo nga umuyiinga wa Isiraeli, naluundi waamanya ari ise niye utsya khuba umuro woowo. Shino paapa wase waashimanyila ilala ari shili shaŋali.” 1823.18: 1 Sam 18.3Baryo boombi baakhola indakaano mu moni ts’Omukasya, nga bafukiilisana khuuba babeyikinwa umuundu isi uwashe. Lwanyuma Yonasani weelayo ingo, ne Dawudi niye waarama i Horeshi.

1923.19: Zab 54Babaandu baalala khukhwaama mu shiriimba she Zifu, baatsya isi Saulo i Gibeya baamulomela bari, “O Umuyiinga Saulo, Dawudi ali ni bubwibisilo aambi ni nafwe iweefwe iyo i Horeshi, mu bikoongo bya Hakila, shiifwo shishiili imwaalo wa Jeshimoni. 20Ari iwe n’uba nga unyalisa khukhwiitsa nga kumwoyo kwoowo ni kukana, ifwe kane khukhuyeete umuwaambe.”

21Saulo waabeelamo ari, “Umukasya abawe tsikhabi, lwekhuuba inywe mwanjeetile ise naabi. 22Ari ni mutsye muweentselese buulayi. Ne ni muba nga mwaamunyoolile is’ali, ni khuumanya eena isi atela khuutsya, ni naanu umuboone is’ali. Baayimboolela buulayi bari ali umuundu umwikobani naabi. 23Ni nashiryo ni muweentselese buulayi, mumanye biifwo byeesi atela khukhwiibisamo, mukobole mumboolele. Ni nase lwanyuma kane intsye ni nanywe, siinga aba nga waayibisa mu bisiintsa bibiili mu bikuuka bya Yuda, indyo kane imunyoole.”

24Baryo babaandu bano benyukha baaraangila ibweeni wa Saulo, baatsya i Zifu. Baatsya baashifumbula nga Dawudi ni basaani beewe abe baayibisa imwaalo wa Jeshimoni mu Mubiimbi kwa Mawoni. 25Aryo Saulo ni basaani beewe baatsya khuuweentsa Dawudi. Ne Dawudi n’ashiwulilakho bari Saulo ali khukhwiitsa, wenyukha waatsya mu shifwo isi balaanga bari Lulwaanda shishiili mu Mubiimbi kwa Mawoni. Saulo naye n’ashiwulilakho aryo, weloosela khuuweentselesela ilala Dawudi. 26Saulo waaba nga akyeendela khu luwaande lutweela khwe lukiingi, ni Dawudi ni basaani beewe naye waaba khu luwaande luluundi, nga bakhakakho khuutitukha. Aryo Saulo ni baselikhale beewe ni baaba nga bali aambi khuuwaamba Dawudi, 27yabayo umuundu mutweela uweetsa isi Saulo waamuboolela ari, “Nuwiitse khaangu! Bona Bafirisitiya bali khukhwibwakala linaambo lyeefwe, ate bali khuuyila buli shiindu shoosi.”

28Ni abweene awo, Saulo waakamisa khuuloondelela Dawudi, weelayo ingo khuusoolanisa Bafirisitiya. Ni shiifwo isho shikila bashilaanga bari, “Lulwaanda lwe Bubwilukhilo.” 29Dawudi wenyukhayo iyo, waatsya weebisa, nga amenya mu shisiintsa sha Engedi.