Swahili Bible2

20

Yonasani ayeeta Dawudi khuutitukha

1Lwanyuma Dawudi waatitukha khukhwaama i Nayosi shisiintsa she Rama, waatsya khuubona Yonasani. Kila amureeba ari, “Ise naayonaka shiina? Musaango shiina kweesi ise nakhola? Shiibi shiina sheesi ise ndi nasho shishikila paapawo akana khukhuuntsira ise?”

2Yonasani naye waamwiilamo ari, “Sishinyala shaaba shiryo ta! Paapa wase s’anyala khuukhwiira iwe ta. Lwekhuuba niye mbaawo shishiindu shoosi sheesi akhola, shiboofu namwe shikyeekhe, nga waakhumboolelakho ise shishiili khu mwoyo kweewe ta. Lwashiina ambisakho shishiindu nga shino? Sishinyala shaaba shaŋali ta.”

3Dawudi naye waamwiilamo ari, “Ilala shili shaŋali. Ne khuurusakho ndi paapawo waamanya ari iwe ungana ise naabi. Ni nashiryo niye s’akanile khukhufuniaaka iwe kumwoyo kwoowo ta. Isho nisho shishakilile niye waalekha khukhuboolelakho iwe ta. Ise ikhwitsubila mu lisiina lya Wele Umulamu, ni mu buulamu bwoowo bubweene, ise ndi aambi naabi ni khuufwa!”

4Kila Yonasani alomela Dawudi ari, “Iwe n’umboolele ise sheesi ukana ikhukholele, ni nase kane ishikhole.”

520.5: Bala 28.11Dawudi waamwiilamo ari, “Kumukaamba shili shifukhu she Kumweesi Kumushaakha, ni nase naakhila khukhwikhala indiile atweela n’umuyiinga. Ne lekha intsye nibise iyo mwirome, khukhwoolesa angoloobe e shifukhu shishiila khu she kumukaamba. 6Ne siinga Saulo ekhala wereeba eena isi ise ndi, iwe nawe umwiilamo uri, Dawudi anoombile ari imufukiilile atsye ingo waabwe mu shiriimba she Beselehemu, nio naye anyalise khukhwitubaasa mu khuwaanayo khwe tsisaayilo khwa buli mwiiko khwe muungo mwaabwe. 7Siinga niye aloma ari mbaawo buubi ta, nase kane imanye ndi indi buulayi. Ne siinga shimukhalasa, awo nawe ushimanya busa uri, ali khuuweentsa khukhuuntsira. 8Iwe n’umaambile ise shiisa, lwekhuuba iwe niye uwashinanikhisa nio ifwe fweembi khwetsuba isi Umukasya khuri kane khubatsake basaale naabi. Siinga nga ibawo shiibi sheesi ise ikholile, ikhuloomba ndi iwe wamweene untsire ise, ne ukhambaanayo mu mukhono kwa paapawo ta.”

9Yonasani waamulomela ari, “Ukhambaasakho shishiindu shishifwaanakho nga isho ta. Ise nikane ishifuumbule ndi paapa wase akana khukhwiira iwe, mu ŋali kane ikhumanyise.”

10Dawudi ndi waareeba Yonasani ari, “Ise kane ishimanye ndyeena ndi paapawo waakhwiililemo buubi?”

11Yonasani waamwiilamo ari, “Yinyukha, khakhutsye fweembi iyo mwirome.” Baryo benyukha baatsya boombi.

12Nga bali iyo, Yonasani waalomela Dawudi ari, “Ise ikhwitsubila iwe nga Umukasya Wele wa Isiraeli niye umujulisi weefwe, indi khu saawa nga tsino kumukaamba, namwe khu shifukhu shishiilakho, kane imbe nga neereebilekho isi paapa wase imanye sheesi ambaasa khuukhola. Mu ŋali kane ikhuboolele, siinga niye aba nga akhwaambaasakho buulayi. 13Ne siinga aba nga akana khukhukholakho buubi, ise ikhwitsubila mu Mukasya ndi kane ikhuboolele ni nawe unyalise khuutitukha. 14Ise siinga imba nga ishiili mulamu, iwe untsokesanisatsaka shiisa shoowo shishikhaakama ta, manya nio naalekha khwiiribwa ta, nga sheesi Umukasya umweene akhwookesanisile iwe. 1520.15: 2 Sam 9.1Naluundi abe naakhafwa, iwe wokyesanisatsaka shiisa sheene isi be muungo baase biilo ni biilo. Shino ushikholatsaka abe yakhaba nga Umukasya waamalilawo ilala baasiku boowo boosi.”

16Baryo Yonasani ni Dawudi baakhola indakaano, iyaba nga ili ni khuliindibwa ni babetsukhulu baabwe boosi, nga baloma bari, “Umukasya umweene eliyaase babetsukhulu boowo babaakane bafuniaake indakaano yino.” 17Luundi ndi Yonasani waaloma Dawudi khuumwitsubila ari niye ali umusaale weewe uwaŋali, lwekhuuba Yonasani aakana Dawudi nga ni ekana umweene.

18Yonasani waalomela Dawudi ari, “Kumukaamba shili shifukhu she Kumweesi Kumushaakha, ni babaandu boosi kane beyaange lwekhuuba shitsoloŋo shoowo shikhaabe nga sishiilimo umuundu ushikhaalemo ta. 19Ni shifukhu shishiila khu she kumukaamba, buli mutweela kane ereebe ari waakooranilewo luukali. Ne lwanyuma utsye mu shifwo mweesi webisa makiboole, uliindile aambi n’isi babuusanisila kamabaale. 20Ni nase ikhaalase buufumo bwe buyiingo butaru aluwaande e kamabaale ako, ifwaane nga uuli khuulasa sheesi imboone. 21Nio lwanyuma inomele umwakaanisi wase khukhwiitsa khuubukula buufumo. Ni nase siinga inomela umwakaanisi ndi, ‘Bona buufumo bwaakwiile aambi ni kamabaale ako, bubukule ubundeerere ano.’ Abweene awo uba nga uli ni khukhwinyukha wiitse, lwekhuuba nga Umukasya n’ali Umulamu, umanya uri uli buulayi, mbaawo buubi ta. 22Ne nikane inomele umwakaanisi wase ndi, ‘Bona buufumo bwaakwiile aleeyikho.’ Shino shiba shikhwookesanisa shiri waakha winyukhewo utsye lwekhuuba Umukasya aba akana iwe ururewo. 23Ne bibiwaamba khu bisuubiso byeesi isi ise ni nawe khukholile, Umukasya kane abe umuloleleli weefwe biilo ni biilo.”

24Aryo Dawudi waatsya weebisa mwirome. Ne kamayiiya ke shifukhu she Kumweesi Kumushaakha ni koola, umuyiinga Saulo wekhala aasi khuulya biilyo. 25Nga niyabatsaka isaambo yeewe, umuyiinga wekhala khu shitsoloŋo sheewe aambi ni liitikiiyi, Abuneri wekhala khuumwilililakho, ni Yonasani wekhala nga balolananiile, ne shiifwo sha Dawudi shaaba busa nga mbaamo umuundu ta. 26Ne Saulo khu shifukhu isho mbaawo shishiindu shoosi sheesi aaloma ta. Lwekhuuba eyambaasa mu mwoyo kweewe ari, “Manya iliwo shishiindu sheesi Dawudi akholile shishimukholile waalekha khuba mukwalaafu lwe kamayiiya ta. Ilala s’ali mukwalaafu ta.” 27Ne khu shifukhu shisheelakho she kamayiiya, shiifwo sha Dawudi ndi shaaba busa nga mbaamo umuundu ta. Kila Saulo areeba umusooleli weewe Yonasani ari, “Lwashiina umusooleli wa Yese uyo, akheetsile khu mayiiya khuliila atweela ni naye. Ingoloobe s’abeele ano ta, ndi ni shaleelo bona s’aliwo ta.”

28Yonasani waamwiilamo ari, “Dawudi ingoloobe aanoombile ari imufukiilile atsye i Beselehemu, nga aloma ari, 29‘N’ufukiilile intsye, lwekhuuba be muungo mwase balikho ni kamayiiya mu shiriimba ni wandaayase waandakiile ari itsye. Nashiryo ise n’imba nga naanyoolile shiisa mu moni tsoowo, n’ufukiilile intsye imbone baalebe baase.’ Isho nisho shishikilile waalekha khuuba ashikabilo ano ni nawe ta.”

30Isho shaakila Saulo lirima lyaamuwaambila Yonasani, kila amuloma ari, “Iwe umwaana w’omukhasi ukhali umwiyikinwa luundi nabumiinyi! Ise naamanya ndi iwe waayihaamba khu Dawudi umwaana wa Yese uyo. Iwe waakha khuuswaala naabi lweesho, naluundi maayi woowo uwakhusaala aakha khuuswaala khuubona ari aakhusaala iwe. 31Iwe s’umanya uri Dawudi n’aba nga ashiili mulamu, iwe singene ube ni lukoosi ta, ni buyiinga bwoowo singene bubewo ta? Nashiryo, rumanisa khaangu bamundeerere ano alunaari, lwekhuuba aakha khuufwa.”

32Kila Yonasani amwiilamo ari, “Lwashiina iwe ukana khukhwiira Dawudi? Shiina ilala sheesi akhukholile?”

33Khulweesho, Saulo waakholowa lifumo lyeewe lwe khuukana khukhwiira Yonasani. Ni abweene awo Yonasani waashimanya buulayi ari paapawe akana khukhwiira Dawudi.

34Aryo Yonasani wenyukha khukhwaama khu shikabilo she biilyo nga wetsuule lirima, waalekha khulyakho khakhaandu khoosi ta, khu shifukhu isho she khabili she kamayiiya. Kumutaambo kwaamuwaamba lwekhuuba paapawe aaba nga waakhomyaasile Dawudi naabi.

35Kumutikhinyi kwe shifukhu shisheelakho, Yonasani wenyukha waatsya iyo mwirome khukhwakaananakho ni Dawudi, nga ali n’umusooleli umwakaanisi weewe. 36Yonasani waalomela umwakaanisi weewe yuno ari, “Nga ise naalasile buufumo bwe buyiingo, ingana utime utsye, ubwangale ubundeerere.” Nga umwakaanisi yuno n’arakikha khuutima, Yonasani waalasa buufumo khuubona ari butsya aleeyikho naabi. 37Ne nga umusooleli yuno n’atsya woola isi khaayiingo khaakwa, Yonasani waamulaanga nga aloma ari, “Khaayiingo akho khaakwiile iburaangisikho!” 38Yonasani waamuloma luundi ari, “Ukheemikha busa awo ta! Yuubakho!” Shikila umusooleli yuno angalaka buufumo bwe buyiingo waabureerera Yonasani. 39Umusooleli yuno s’amanya shiina shishaba shili khuutsya mu moni ta. Yonasani ni Dawudi bonyene nibo babaamanya. 40Lwanyuma Yonasani waasuta bye busoolo byeewe waabiwa umusooleli, nga amuloma ari, “Suta bino wiileyo ni nabyo mu shiriimba.”

41Nga umusooleli waamalile khuutsya, Dawudi wenyukha khukhwaama inyuma we kamabaale, wewunamila aasi kimiluundi kitaru. Lwanyuma boombi, niye ni Yonasani baakwana mu bifuba, nga buli mutweela alila kamasika, ne Dawudi niye waalila luukali khufuurakho Yonasani.

42Yonasani waalomela Dawudi ari, “N’utsye mu lukoosi, Wele abe ni nawe. Ne ushebulilatsaka uri ifwe fweembi khwetsubaniile isi Umukasya khuri akhuloleleele buulayi, ni khuubona khuri ifwe ni babetsukhulu beefwe khuliinda shisuubiso shino biifukhu byoosi.”

Lwanyuma Dawudi waantsukha waatsya, ni Yonasani naye weelayo mu shiriimba.