Swahili Bible2

2

Hana aruuya Wele

12.1: Luka 1.46-55Lwanyuma Hana waaloomba nga aloma ari,

“Mu mwoyo kwase ise nikhoyela Umukasya,

lwekhuuba waambonesele ise.

Ari ise inyala khuutsekhelela baasiku baase

nga ndi ni kumwikhoyo.

2Mbaawo uuli umukhosefu nga Umukasya ta,

mbaawo ukuundi uuli nga niye ta.

Mbaawo ukhuliinda ifwe ufwaanana

nga Wele weefwe ta!

3Ari inyala khuulomela abo babeyiingayiinga ndi,

‘Nimwaakamisilewo khukhwiyiingayiinga.

Ni kiminwa kyeenywe kikheelayo khuukanikha bye khukhwiniinisa ta,

lwekhuuba Umukasya ali Wele uuli ni khuumanya khwoosi.

Naluundi niye ali ukhalila babaandu boosi kumusaango

lweebyo byoosi byeesi bakhola.’

4Umukasya afuniaaka buyiingo bwe baselikhale be kamaani,

ne abo babaali bawefeeka, abaloosela khuuba ni kamaani.

5Babaandu babaabatsaka ni bye khuulya biikali bekura

ari batsya bepakasila busa nio banyale khuufunakho khe khuulya.

Ne abo beesi intsala yalyatsaka,

ari sishiibalya luundi ta.

Umukhasi uwabatsaka umukuumba

ari waasaalile babaana musaafu,

ne uyo uwabatsaka maayi uwe babaana baakali,

ari waaramile busa.

6Umukasya arusawo buulamu naluundi waabukobosawo.

Niye ekhisa babaandu aasi imakoombe

ne ndi waabakobosa mu bulamu.

7Umukasya niye ukhola babaandu babaandi khuuba bataambi,

ni babaandi khuuba bayindifu.

Niye ubara mu bifwo bye aasi,

naluundi niye ubaniinisa mu bifwo bye angaaki.

8Niye uwinyusa bataambi khukhwaama aasi mwifukhuulu,

ni naabo babataambataamba, abarusa mu mutaambo kwaabwe

waabekhasa atweela ni babaana be bayiinga,

aryo waabara mu bifwo bye shiriifwa.

9Niye ayilisa buulamu bwaabo babaamufukiilila,

ne baabi abasilisila mu shiilima;

umuundu s’afuura lwe kamaani keewe khu bweewe ta.

10Umukasya kane afuniaake baasiku beewe bekyele bipatu busa,

kane abasoolanise nga araambisa

khukuula khukhwaama mwikulu.

Umukasya alikhalila shibala shoosi kumusaango,

awe uyo isi arobola khuuba umuyiinga kamaani,

naluundi aniinise mu shifwo she angaaki

uyo isi atsukhakho kamafura.”

11Lwanyuma Elukaana ni Hana beelayo ingo waabwe i Rama. Ne umwaana umusiinde yuno Samweli waarama i Shilo, nga ayeetakho Eli khukhwakaanisa Umukasya.

Basooleli ba Eli

12Basooleli ba Eli babaaba basaayi khu mbuka iyo, baaba baamoyaani busa nga sibalimo ni khuurya Wele ta. 13Isaambo isi basaayi beebirisatsakamo isi babaandu yaba iri, umuundu yeesi n’areera isaayilo yeewe, ni inyama ni yaba nga ishitutuba, umwakaanisi abe eetsa ni shisaala shibeetse she kameeno kataru mu mukhono kweewe. 14Abe shisaala shino ashitawula mu sepiki, namwe mu ntsamuunyu iteekha. Ne abe buli inyama yoosi isi shisaala shino sharusatsaka, iyo niyo isi umusaayi ayilatsaka iweewe. Isaambo yino niyo isi baabirisatsakamo ba Isiraeli boosi babeetsatsaka i Shilo khuuwaanayo tsisaayilo tsaabwe. 15Ni imbuka ikiindi abe nga bashiili khwoosha kiminaawa ta, umwakaanisi w’omusaayi abe eetsa waalomela umuundu uwaba awaanayo isaayilo ari, “N’umbe inyama iye khukhwookhela umusaayi, lwekhuuba s’akane afukiilile inyama indeekhe busa khukhwaama is’uli ta, akhali imbisi yonyene.”

16Ne abe uyo utsya khukhwoosha isaayilo n’amwiilamo ari, “Liinda khunyoowe khwookhe kiminaawa isi Umukasya, nio lwanyuma uyile inyama yoosi isi kane unyale.” Abe umwakaanisi w’omusaayi yuno elamo ari, “Taawe, n’ukiimbe aluno ari ano, ne n’ukane ulobe, kane injibukule ni kamaani.”

17Musaambo yino shiibi she basooleli ba Eli shaba shikali naabi mu moni ts’Omukasya, lwekhuuba baaba benyayisaka busa biwaanibwayo by’Omukasya.

Hana akyeniyilakho Samweli i Shilo

18Samweli waaba nga akaanisatsaka mu moni ts’Omukasya, nga waakwaara ikaantso indayi ireremukha. 19Abe buli lweesi Hana n’umuseetsa weewe beetsila i Shilo khuuwaanayo isaayilo buli mwiiko, amunabilatsakayo ingubo n’amuyiilila. 20Abe buli lweesi beetsila, Eli abaloombela tsikhabi Elukaana n’umukhasi weewe, nga aloma ari, “Umukasya akhuloosele khuukhuwa lisaaye mu mukhasi yuno, khulw’omwaana isi wawaanayo isi Umukasya.” Bye tsikhabi ibyo nga abe byaaweele biryo, Elukaana n’umukhasi weewe beelayo ingo waabwe.

21Umukasya waawa Hana tsikhabi, aryo waasaalayo babaana besiinde babaandi bataru, ni bakhaana babili. Ne Samweli niye waaba nga atsowela i Shilo mu bwakaanisi bw’Omukasya.

Eli ni basooleli beewe

22Khu mbuka iyo, Eli aaba nga waasakhuliwile naabi mu miiko, naluundi waaba nga awulilaka bibiindu byeesi basooleli beewe bakhola isi babaandu ba Isiraeli, ni saambo isi baakonatsaka ni bakhasi babeetsatsaka khukhwakaanisa khu mulyaango kwe liweema likhosefu. 23Kila Eli abaloma ari, “Inywe lwashiina mukholaka bibiindu bye tsisoni nga bino? Lwekhuuba mbulilaka bibibawaambakho, nga bikanikhibwa ni babaandu ba Wele bari intsibirisa yeenywe shiili ndayi ta. 24Taawe, baana baase. Nimubyaakamise lwekhuuba kamakhuuwa kano keesi imbulilaka kakaasalanisibwa ni babaandu ba Wele sikali malayi ta. 25Umuundu mutweela n’oneka isi umuundu washe, Wele niye umwiimilawo, ne umuundu n’oneka isi Umukasya, naanu ukane amwiimilewo mu moni tseewe?” Ne basooleli bano baalekha khuwuliilisa byeesi paapa waabwe aloma ta, lwekhuuba Umukasya abe waakhalilewo khuubahesa.

262.26: Luka 2.52Ne umusooleli Samweli weloosela buli shifukhu khuutsowa mu mubili, ni Wele nga amusiima, ni babaandu nabo nga bamusiima.

Buuŋoosi bwe khuuhela khwe muungo mwa Eli

27Shifukhu shitweela umuŋoosi weetsa isi Eli nga amureerera buurume khukhwaama isi Umukasya, nga Umukasya aloma ari, “Ise neyokesana isi shikuuka she ntsu ya kuukawo nga bashiili baabowe ba Faraawo i Misiri. 282.28 a Luky 28.1-4; b: Lev 7.35,36Narobola shikuuka sha kuukawo uyo, khukhwaama mu bikuuka byoosi bye ba Isiraeli, nabarawo nibo khuuba basaayi baase. Nabakana nibo khuutsyatsaka khu sheeso shase khukhwakaanisa nga boosha bubaane, ni khuboolela babaandu baase shiina sheesi imbakanakho khuukhola. Naluundi babaandu be mu ntsu ya kuukawo iyo, nabawa kumukabo kwe khuulya khu biwaanwa bibiramakho khwiibyo bibyookhebwela khu sheeso. 29Ne ndi lwashiina mulolelela ni kumuluungo tsisaayilo ni bibiwaanibwayo byeesi nalakila khukhwaama mu baandu baase? Iwe Eli, lwashiina wisamo naabi basooleli boowo lukoosi khufuurisa ise, nga mwinesela mwabeene khu bisiintsa bye bibiwaanibwayo bibifuura buulayi bibireerebwa ni babaandu baase ba Isiraeli?”

30Isho shishiikila Umukasya Wele wa Isiraeli aloma lubuula ari, “Ise nasuubisa ndi babaandu be muungo mwoowo, ni shikuuka sha paapawo, kane babaatsake basaayi babaantsakaanisa ise biilo ni biilo. Ne ari, ise Umukasya, inoma ndi sishikane shibe shiryo luundi ta. Lwekhuuba ari abo babaakane baantsisemo ise shiriifwa nibo beesi kane imbe lukoosi, ne abo babaakane baandekelese, kane nabo batsubibwe. 31Ne ari bona biifukhu bilikho biitsa, mweesi ise ndikhwiirirakho iwe, ni basooleli boosi be mu ntsu yoowo, shiryo ilekhe khubawo umuundu yeesi uwaangaala khukhwoolesa mu busakhulu ta. 32Uryo iwe kumutaambo kukhuwaambe, nio ulole ni libuba khu buyiindifu bweesi indiiwa Isiraeli. Ne mu luruungo lwe muungo mwoowo, simulibamo umuundu uliwaangaala khukhwoolesa mu busakhulu ta. 33Ne umuundu yeesi khu be mu ntsu yoowo isi indiramisawo khuuba umusaayi khu sheeso shase, alitsula kumutaambo ni khuurunya, ni khukhwitsusa iwe kumutaambo mu mwoyo ni kamasika kamakali. Ni babaana be muungo mwoowo balifwa nga bashiili basooleli busa.

342.34: 1 Sam 4.11“Ari shino shilyoolelela khu basooleli boowo baabili Hofuni ni Finehasi babaalifwiila khu shifukhu shitweela boombi. Khano khaliba nga khaabonelo is’uli, khakhokesana khari bino byoosi bilyoolelela. 35Ari samweene indirobolelayo umusaayi ukuundi uli umwiyikinwa, ukane akholatsake byeesi ise ingana, luundi bibiintsikhoyesa. Ise ndimuwa lisaaye ilyo lililyakaanisa khuuyeetakho umurobole wase biilo ni biilo. 36Ni biifukhu bilyoola, buli muundu uliramakho nga mulamu khu be mu ntsu yoowo, aliitsa afukhamile aasi ekoontselele umusaayi wase uyo ari amuwekho tsinusu namwe shipatu she kumukaati, nga amuloma ari, ‘Paapa, n’undobole ise khuuba mutweela khu basaayi, nio inyale khuufunayo khe khuulya.’ ”