Swahili Bible2

19

Saulo akhakakho naabi khukhwiira Dawudi

1Shifukhu shitweela, Saulo waalomela umusooleli weewe Yonasani, ni baselikhale beewe babaandi khukhakakho beere Dawudi. Ne Yonasani nga akana naabi Dawudi, 2shikila amureewula ari, “Paapa wase Saulo ali khuukhakakho naabi akana khukhwiira iwe. Nashiryo kumukaamba kumutikhinyi wiliinda naabi, wibise mu shifwo she shimoonyo, ube ibweene iyo. 3Ni nase ikhaatsye niimikhe ni paapa wase mu shifwo mweesi wibisile. Abweene awo inganikhe is’ali bibikhuwaambakho. Ni nase nga nawuliile shishiindu shoosi shishikhuwaambakho, kane ikhuboolele.”

4Kumutikhinyi ni kwoola, Yonasani waakanikha khu Dawudi biilayi byeesi aakhola byonyene, nga aloma Saulo ari, “O Umuyiinga, ukhakholakho khu Dawudi, umwakaanisi woowo buubi bwoosi ta. Lwekhuuba niye waakhukhukholakho buubi bwoosi ta. Ni bibiindu byoosi byeesi akhola byabeele biilayi naabi is’uli. 5Niye ewaanayo buulamu bweewe waatsya khukhwiira Goliyasi, n’Umukasya waayeeta naabi ba Isiraeli khuuwula baasiku khu shifukhu isho. Ni nawe wamweene ni washibona, shakhwikhoyesa naabi. Nashiryo lwashiina iwe ukana khutsukha kamafuki kakaakhalikho ilomo yoosi ta?”

6Saulo n’awuliilisa bino waasuubisa ari, “Nitsubila mu Mukasya Umulamu ndi, Dawudi singene eribwe ta.”

7Nio Yonasani waalaanga Dawudi, waamuboolela byoosi byeesi Saulo aaba waalomile. Lwanyuma waaraangilila Dawudi, waamureera isi Saulo, ni Dawudi weloosela khukhwakaanisa Saulo nga makiboole.

8Khu mbuka ikiindi ndi, aabawo busoolo ni Bafirisitiya. Dawudi ndi waatsya waabebwakala, waabasoolanisa, khukhwoolesa ni baatitukha boosi.

9Luundi ndi shisaambwa shiibi khukhwaama isi Umukasya sheetsa khu Saulo. Saulo aaba wekhaale mu ntsu yeewe, nga ali ni lifumo mu mukhono kweewe, ni Dawudi aaba nga ali khuumukhupila lituungu. 10Saulo ndi waakhakakho khuumuwunila khwitikiiyi ni lifumo. Ne Dawudi ndi wewoma luundi, lifumo lyaatsya lyaawuna liitikiiyi. Aryo Dawudi waatitukha khukhwaama mu ntsu waakorawo.

1119.11: Zab 59Ni mu shilo sheene isho, Saulo waarumana baaliindi beewe khuutsya khuliindila abuntsu ya Dawudi, nio banyalise khuumwiira kumutikhinyi. Ne Mikali umukhasi wa Dawudi waamureewula ari, “Iwe nga waakhutitukha mu shilo muno, kumukaamba batsya khukhwiira.” 12Kila Mikali ayeeta Dawudi khuubirira mwitilisa, weekha aasi, waatitukha waatsya. 13Mikali waabukula shifwaani shibeetse, waashaalisa mu bulili bwa Dawudi. Waakwaarisa bubwooya bwe mbusi khu murwe kwasho, waashibiimbakho tsingubo.

14Ni kumutikhinyi ni kwoola, Saulo waarumana baaliindi beewe khukhwiitsa khuuwaamba Dawudi, Mikali waababoolela ari, “Dawudi ali mulwaale.”

15Ne Saulo waarumana baaliindi bano khukhwiilayo wa Dawudi nga ababoolela ari, “Ni mutsye mundereere Dawudi ano, nga ali mu bulili bweewe, nio nase inyalise khuumwiira.”

16Ne baaliindi ba Saulo ni boolayo, sheesi baanyoola mu bulili shaba shifwaani shibeetse, nga baashikwaarisile bubwooya bwe mbusi khu murwe kwasho.

17Kila Saulo aloma Mikali ari, “Lwashiina iwe umoombesele ise uryo, waakila umusiku wase waatitukha nga mulamu waatsya?”

Mikali weelamo ari, “Anomeele ise ari abe anyala waantsira nga naakhumulekha waatitukha ta.”

18Ari nga Dawudi n’amala khuutitukha, waatsya woola wa Samweli i Rama, waamuboolela byoosi byeesi Saulo aakana khuumukhola. Kila baryo Dawudi ni Samweli baatsya baamenya i Nayosi.

19Umuundu mutweela waatsya waaboolela Saulo ari, “Dawudi ali mu shisiintsa she Nayosi mu Rama.”

20Kila ndi Saulo arumana baselikhale babaandi khuutsya bakobose Dawudi. Ne ni boolayo i Rama, baanyoola Samweli nga niye uuli khuuraangilila baŋoosi babaaramile, nga balikho bakanikha bye buŋoosi. Umwoyo wa Wele weekha khu baselikhale tsana nabo, baarakikha khuukanikha bye buŋoosi. 21Ne Saulo n’ashiwulila aryo, waarumana baselikhale babaandi. Ne nabo ndi baakanikha bye buŋoosi. Ndi waarumana lituuli liliindi kumuluundi kwe khataru, nabo baakhola shitweela sheene nga bakanikha bye buŋoosi. 22Lwanyuma lwa byoosi, Saulo umweene wenyukha waatsya i Rama. Waakyeenda woola khu sebele iye kameetsi imboofu i Seku, waareeba ari, “Samweli ni Dawudi bali waheena?”

Babaandu baamwiilamo bari, “Bali i Nayosi, shisiintsa shino she Rama.”

23Aryo Saulo waakyeenda khuutsya i Rama. Ne n’aba nga akyeenda atsya, Umwoyo wa Wele waamwiikhakho, waatsya nga akanikha bye buŋoosi, khukhwoolesa n’ola i Nayosi. 2419.24: 1 Sam 10.11,12Aryo weyabulamo bikwaaro byeewe, waakanikha bye buŋoosi mu moni tsa Samweli. Waakwa aasi waakona bukhuna busa shifukhu isho shoosi, ni shiilo sheene. Abweene awo, shaarakikha khuulomebwa shiri, “Saulo naye ari wekyelile mutweela khu baŋoosi?”