Swahili Bible2

18

1Baryo Dawudi ni Saulo nga baamalile khuukanikha, buulamu bwa Yonasani umusooleli wa Saulo, bwawaambakana naabi ni bwa Dawudi, bekyela basaale naabi. Yonasani waakana naabi Dawudi nga ni ekana umweene. 2Ni khukhwaamila khu shifukhu sheene isho, Saulo waara Dawudi mu bwakaanisi bweewe, waalekha khumufukiilila khuukobolayo ingo wa paapawe ta.

3Lwe khuukana khuukali ukhwo khweesi Yonasani aaba nakhwo isi Dawudi, baryo baakhola indakaano iye buusaale. 4Kila Yonasani weyabula bikwaaro byeesi aaba waakwaarire, waabiwa Dawudi, atweela ni bye busoolo byeewe, ni lurima lweewe, ni buyiingo, atweela ni kumusipi kweene.

5Buli shiindu shoosi sheesi Saulo aarumana Dawudi khuutsya khukhola, aashikholatsaka buulayi naabi. Isho shaakila Saulo waamwikyelisa umukhulu we liiye lyeewe. Shisheene shino shekhoyesa naabi buli muundu yeesi atweela ni babaakaanisi ba Saulo babaandi.

6Khu mbuka isi Dawudi erirakho Goliyasi, ni baaba nga bakobolaka ingo khukhwaama mu busoolo, bakhasi khukhwaama mu buli shiriimba she mu Isiraeli beetsa nga beemba kimyeenya luundi nga bashina khukhwakaanila Saulo. Nibo baaba nga beemba kimyeenya ni kumwikhoyo nga bali ni bibisakasa ni tsiindiingiti. 718.7: 1 Sam 21.11; 29.5Ni baaba nga bashina, baaba nga beemba bari,

“Saulo waakhoonyile baasiku beewe biikana,

ne Dawudi niye waakhoonyile kimikaanda!”

8Ne kumweenya kuno kwakhalasa naabi Saulo, kila elomela mu mwoyo kweewe ari, “Isi Dawudi balikho beemba bari niye waakhoonyile kimikaanda kye baasiku, ne isi ise bari naakhoonyile bikana byonyene. Ne ari shishikane shiilekho singene bamukhole niye khuuba umuyiinga?” 9Ni khukhwaamila khu shifukhu sheene isho, Saulo waarakikha khuubonela Dawudi buubi.

10Shifukhu shisheelakho, shisaambwa shiibi khukhwaama isi Wele khaangukho sheetsa shaakwa khu Saulo, waarakikha khukhwibirisa nga umupeme mu ntsu yeewe. Ne Dawudi niye waaba nga amukhupila lituungu lyeewe nga busheele n’akholatsaka. Ne khu mbuka yino, Saulo aaba nga ali ni lifumo mu mukhono kweewe. 11Kila Saulo akholowa lifumo nga elomela mu mwoyo kweewe ari, “Kane imuwunile khwitikiiyi.” Ne Dawudi waamwiwomakho kimiluundi kibili.

12Saulo aarya naabi khulwa Dawudi, khulwekhuuba Umukasya aaba ayeeta naabi Dawudi, ne nga abe waarura khu Saulo. 13Aryo Saulo waarusa Dawudi mu bwakaanisi buukhulu, waamura busa khuuba umukhulu we baselikhale shikana shitweela. Dawudi waabaraangililatsaka khuutsya khusoolana. 14Ne Dawudi mu busoolo buno waaba nga awula buli oosi isi aatsya, lwekhuuba Umukasya aaba amuyeeta naabi. 15Ne Saulo n’abona nga Dawudi akhola buulayi naabi, weloosela khuumurya luukali. 16Ne babaandu boosi be mu Yuda ni mu Isiraeli mwoosi bakana naabi Dawudi, lwekhuuba aabaraangililatsaka buulayi mu busoolo bwoosi.

Dawudi akhwa umukhaana wa Saulo

17Shifukhu shitweela Saulo waalomela Dawudi ari, “Aso, bona umukhaana wase umukhulu Merabu uyu shiina. Ise ngana khumukhuwa iwe khuuba umukhasi woowo, ne sheesi ise ikhukanakho iwe, n’ube umunyindaalifu khulwase, usoolane busoolo bw’Omukasya.” Shino Saulo ashikhola nga eyambaasa ari, “Ikhaba ise niye umwiira ta, ne khayo Bafirisitiya nibo babe babaamuntsirira.”

18Kila Dawudi elamo Saulo ari, “Ise niye naanu atweela ni be muungo mwase, mu bikuuka bye mu Isiraeli muno mwoosi, unyala khuuyila umukhaana woowo?” 19Ne imbuka iye khuukaba Merabu isi Dawudi niyoola, shaatsya shenyoola nga waakabiwile isi Aduryeli, khukhwaama mu shiriimba sha Mehola.

20Saulo aaba n’umukhaana ukuundi isi balaanga bari Mikali. Mikali yuno aba akana naabi Dawudi. Shiryo shino shekhoyesa naabi Saulo n’ashimanyakho. 21Kila Saulo elomela mu mwoyo kweewe ari, “Kane ifukiilile Dawudi akhwe Mikali, nio inyale khuumuraambisa nga kumureko, Bafirisitiya banyale khuumuntsirira.” Kila ndi khu luno Saulo alomela Dawudi ari, “Ari ikhuwa iwe ikhabi iye khabili, iwe khuukhwa mutweela khu bakhaana baase.”

22Saulo waalakila babaakaanisi beewe khuukanikha isi Dawudi mu shimoonyo busa bari, “Umuyiinga akhukana iwe naabi, ni babaakaanisi beewe babaandi nabo bakhukana naabi. Ari lwashiina ukhafukiilila khuukhwa umukhaana w’omuyiinga, khuuba umukhasi woowo.”

23Aryo Dawudi n’amala khuuwuliilisa buulayi babaakaanisi ba Saulo, naye waabeelamo ari, “Inywe mwaambaasa muri shili shishiindu shikyeekhe naabi khuukhwa umukhaana w’omuyiinga? Simubona muri ise ndi umusaani umutaambi busa, naluundi ukhamanyikhanile ta?”

24Kila babaakaanisi bano beelayo baboolela Saulo bino byoosi byeesi Dawudi aaloma. 25Saulo naye welamo ari, “Ni mutsye muboolele Dawudi muri, sheesi ise nga umuyiinga imukanakho nga bye khuukhwa, nikhwo khuutsya mu busoolo, angobosele shishokyesanisa shiri werire Bafirisitiya baboola shitoondo shitweela. Shino nisho shishinaba khukhwiliyaasa baasiku baase.” Ne yino yaba isaambo isi Saulo akana Dawudi khukhwiiribwamo ni Bafirisitiya.

26Baryo babaakaanisi ba Saulo baatsya baboolela Dawudi bilomo bino. Dawudi wekhoya naabi lwe lomo iye khuyila umukhaana w’omuyiinga. Ni nashiryo nga imbuka iyareebwawo ishiili khubira ta, 27Dawudi atweela ni basaani beewe benyukha baatsya beera Bafirisitiya bitoondo bibili. Aryo waakobola ni shishokyesana shiri werire Bafirisitiya bano, waashokyesanisa isi Saulo, nio anyale khuukhwa Mikali. Lwanyuma Saulo waafukiilila Dawudi khuuyila Mikali nga umukhasi weewe.

28Aryo Saulo woola khuushimanyakho ari Umukasya aaba ali khuuyeeta Dawudi, naluundi waashimanya ari Mikali akana naabi Dawudi atweela ni ba Isiraeli boosi. 29Bino byoosi byaakila Saulo weloosela khuurya naabi lwa Dawudi. Ni Saulo aryo waaba umusiku wa Dawudi biifukhu byoosi bibyaramayo.

30Bawuli be Bafirisitiya beloosela busa khukhwiitsaatsaka khuusoolanisa ba Isiraeli. Ne buli mbuka nga Dawudi abasoolanisa waabawula boosi. Shino she khuuwulatsaka Bafirisitiya, shaakila lisiina lya Dawudi lyaamanyikhana naabi khufuurisa baakhulu babaandi babaaramile be mwiihe lya Saulo.