Swahili Bible2

15

Buusoolo ni ba Amaleki

115.1: 1 Sam 10.1Shifukhu shitweela Samweli waalomela Saulo ari, “Umukasya aanduma ise khuukhurobola iwe khuuba umuyiinga we babaandu beewe ba Isiraeli. Ari rekeeresa buurume buno bubwaama isi Umukasya. 215.2: Luky 17.8-14; Maka 25.17-19Shino nisho sheesi Umukasya Umunyali wa byoosi aloma ari, atsya khuwa babaandu ba Amaleki shitaambiso, lwekhuuba bebwakala babaandu ba Isiraeli nga bali mu ntsila khukhwaama mu shibala she Misiri. 3Ni nashiryo ari n’utsye wibwakale ba Amaleki, ubahese boosi atweela ni bibiindu byaabwe byoosi byeesi bali nabyo. Ukhawaambilakho na mutweela shiisa ta. Ne n’utsye wiire basaani ni bakhasi, atweela ni babaana beene. Uwesele ilala ni tsikhaafu, kamasheese, tsiŋamila, atweela ni tsisikilya tseene.”

4Aryo Saulo waarumanisa khuulaangaka basaani khukhwitubaasa khu liiye lyeewe i Telayimu. Bano boosi atweela baaba basaani kimyeeka kibili (200,000) ni kumukaanda mutweela (10,000), kumukaanda mutweela khu bano khukhwaama mu Yuda. 5Aryo Saulo wabaraangilila baatsya khu shiriimba sha Amaleki, baatsya bebuulila mwitila. 6Aabawo babaandu beesi balaanga bari Bakeni, Saulo waabalomela ari, “Babaandu beenywe baaba be shiisa naabi isi linaambo lyeefwe nga khwaama i Misiri. Ni nashiryo ni mwinyukhewo mururewo, lwekhuuba ise singana inywe mwahelela atweela ni ba Amaleki bano ta.” Baryo Bakeni bano barura mu ba Amaleki.

7Lwanyuma Saulo webwakala ba Amaleki tsana waabahesa khukhwaamila ilala i Havila, khukhwoolela ilala i Shuri, shishiili i bukwanyaanga wa Misiri. 8Aryo waahesela ilala ba Amaleki boosi, khuurusakho aaramisa umuyiinga Agaga yenyene nga umulamu. 9Saulo ni liiye lyeewe baalekha Agaga nga umulamu, baryo baalekha khuhesa ni kamasheese kamalayi, ni tsikhaafu tsitsaba tsindayi nga tsinere, ni bibiindu bibiindi bibyafuura buulayi. Ne baahesela ilala bibyaayo bibikhaaba biilayi namwe binere ta.

Umukasya ekaana Saulo nga umuyiinga

10Umukasya waalomela Samweli ari, 11“Ise nisonesa naabi khuubona nga nakhola Saulo khuuba umuyiinga, lwekhuuba ari waamiinyaaliile ise, waalekhile khuuloondelela kamakaambila kaase.” Samweli kumutaambo kwaamuwaamba. Ni shiilo isho shoosi, waalila nga aloomba isi Umukasya. 12Samweli wenyukha kumutikhinyi mamilimili, waatsya khuukanikha isi Saulo. Abe yabawo umuundu uwaboolela Samweli ari Saulo atsya i Karumeli, weyombekhelayo shikhebuliso lwe lisiina lyeewe, nio buli muundu abe nga amushebulililakho, lwanyuma waatsya i Gilugaali.

13Lwanyuma nga Samweli waanyoolile Saulo, Saulo waamulomela ari, “Samweli, Umukasya akhuwe iwe tsikhabi! Ise noolelesile byoosi byeesi Umukasya anomeele khuukhola.”

14Kila Samweli amureeba ari, “Ne khuumalaala khwe kamasheese, ni khuumoloola khwe tsikhaafu khweesi ise mbulila khuno, khwaama eena?”

15Saulo naye weelamo ari, “Baselikhale baase babyaamisile khukhwaama khu ba Amaleki. Nibo baakhalilewo khuulekha kamasheese kamalayi ni tsikhaafu tsindayi tsinere, nio tsiwaanibweyo isi Umukasya Wele woowo nga tsisaayilo. Ne bibiramile byoosi khwaabihesile.”

16Samweli naye weelamo Saulo ari, “Yaakama awo! Ise ari khekhuboolele sheesi Umukasya ambooleele mu shilo shishibirire.”

Saulo waamuloma ari, “Imboolele khubone.”

17Samweli weloosela nga aloma ari, “Iwe unyala weyambaasa uri s’uli mukhulu ta, ne Umukasya aakhurobola iwe khuuba umuyiinga naluundi khuuba uloolelela babaandu beewe ba Isiraeli. 18N’Umukasya nga n’akhurumana khuukhola kumulimo kuno, aakhulomela ari wibwakale luundi uhesele ilala ba Amaleki baboonaki abo. 19Ne ari iwe lwashiina walobile khuuwuliilisa byeesi Umukasya aloma? Lwashiina wakhalilewo khukhwilekhela bibiindu bino, waakhalasa Umukasya?”

20Naye Saulo weelamo Samweli ari, “Umukasya aanduma khuutsya khukhola kumulimo, ni nase naakukhola, naakhumumiinyaalilakho ta. Nawaamba Agaga, umuyiinga we ba Amaleki, naahesa ni linaambo lyeewe lye ba Amaleki lyoosi. 21Baselikhale baase baayila bibiindu bibifuura buulayi, kamasheese, ni tsikhaafu, abe bibiitsya khukhwiiribwa busa, baabireera i Gilugaali khuubiwaanayo nga tsisaayilo isi Wele, Umukasya woowo.”

22Samweli naye weelamo ari,

“Umukasya niye s’ekhoyela biwaanibwayo bibyooshe ni tsisaayilo ta.

Niye akana abo babaamuwulila.

Lwekhuuba khuumuwulila niye khufuura tsisaayilo,

ni khuumurekeeresa khufuura kiminaawa kye kamasheese.

23Lwekhuuba khuumiinyaalila Wele khuli nga

shishoonako she khukhwiireeba khu balosi,

ni khuuwandalala kumwoyo khuli nga shishoonako she khukhwisaaya bifwaani.

Ni nawe lwekhuuba wamiinyaala

waalekha khukhola byeesi Wele aakhulomela ta,

ari Wele waakhalilewo khukhwiikaana iwe nga umuyiinga.”

24Lwanyuma Saulo waalomela Samweli ari, “Ilala noonakile isi Umukasya. Ise naaminyaaliile Umukasya atweela ni nawe mu bilomo byeesi waanomela. Ise narya khulwe liiye, indyo naabarekeeresa nibo. 25Ne ari ise ikhuloomba iwe untsiyakhile shishoonako shase, khwiileyo ni nawe, nio manya nase nesaaya Umukasya.”

26Samweli waamwiilamo ari, “Ise siinatsya ni nawe taawe, lwekhuuba iwe waamiinyaaliile Umukasya. N’Umukasya naye waakhwikaanile iwe khuuba umuyiinga wa Isiraeli.”

2715.27: 1 Sam 28.17; 1 Bay 11.30,31Aryo Samweli n’aba nga ashuukha atsya, Saulo waakulukhila ibikyele we ngubo yeewe, nayo yonuukhamo. 28Kila Samweli amulomela ari, “Umukasya aluno ari waakhwonuulilekho khwiiwe buyiinga bwa Isiraeli shaleelo shino, waabuweele umuundu ukuundi ukhufuurakho iwe buulayi. 29Ni Wele we shiriifwa uwa Isiraeli s’awombesa namwe s’ayuusakho ta. Niye s’ali umuundu uri ayuusakho bibyambaaso byeewe ta.”

30Saulo weelamo ari, “Ise noonakile, ne naakhwikoontseleele n’umbekho lukoosi mu moni tse baselikhale ni babaandu ba Isiraeli boosi. N’uwiitse khwiileyo ni nase, manya nase nesaayakho Umukasya Wele woowo.” 31Aryo Samweli waashuukha waaloonda khu Saulo, ni Saulo aryo wesaaya Umukasya.

32Kila lwanyuma Samweli waalakila ari, “Nimundeerere ano Agaga, umuyiinga we ba Amaleki!”

Baryo baareera Agaga nga alikho akhuumba buulayi busa nga elomela mu mwoyo kweewe ari, “Ilala sibanyala baantsira ari ta, khali baantsiriire mu busoolo.”

33Ne Samweli waaloma ari, “Agaga, nga lurima lwoowo ni lwaakila bakhasi bafwaana nga babaakhalikho ni babaana ta, ni maayi woowo naye kane abe nga ukhalikho n’umwaana ta.” Aryo Samweli waaremakaka Agaga mu bipatu busa mu shifwo she khukhwisaayilamo i Gilugaali.

34Lwanyuma Samweli waatsya ingo weewe i Rama, ni Saulo naye waatsya iweewe iyaba i Gibeya. 35Ni biifukhu byoosi byeesi Samweli aaba nga ashiili mulamu, s’elayo luundi khuubonakho khu Saulo ta. Aryo Umukasya wesonesa naabi lwekhuuba aakhola Saulo khuuba umuyiinga wa Isiraeli.