Swahili Bible2

14

Yonasani ebwakala Bafirisitiya

1Shifukhu shitweela Yonasani, umwaana wa Saulo waalomela umusooleli uwamusutatsakila bye busoolo byeewe ari, “Yiitsa khukhalise khutsye isi Bafirisitiya babuusaniile.” Ne shino Yonasani aashikhola nga akhuboolelakho paapawe Saulo ta. 2Saulo aaba nga amenya aambi ni Gibeya aasi e kuusaala kweesi balaanga bari buubeya, kukuuli i Miguroni. Ibweene iyo aaba ali ni baselikhale baboola nga bitoondo bisesaba (600). 3Ahija umwaana wa Ahitubu uwaba wandaaye wa Ikabodi, nga niye umwitsukhulu wa Finehasi, niye uwaba umusaayi w’Omukasya i Shilo. Mbaawo namutweela khu baandu babaabawo uwashimanyakho ari Yonasani waatsiile ta.

4Khu mukhoosi kweesi Yonasani aakhalawo khuubirirakho khukhwoola isi Bafirisitiya baabuusanila, khwabakho khu buli luwaande kimibaale kimiboofu kibili; kuulala abe lisiina lyakwo bari Bozezi, ni kukuundi bari Sene. 5Kuubaale kutweela kwaba kuli lwe ngaaki khuulolelela i Mikimashi, ni kukuundi nga kuli lwe mwaalo khuulolelela i Geba.

6Yonasani kila alomela umusooleli uwamusutilakho bye busoolo byeewe ari, “Khayo khutsye khwoole isi Bafirisitiya, babaakhenjila imbalu bano babuusaniile. Winyoola khulweefwe babaandu babili nga ni khuli, Umukasya anyala waakhuraambilamo. Mbaawo shishinyala shaashinjilila Umukasya khuukhola khuukhuyeeta ifwe oba khuli baakali namwe bakyeekhe bari ta.”

7Kila umusooleli tsana aloma ari, “Nukhole sheesi waambaasa khuukhola. Ise ndi atweela ni nawe.”

8Yonasani waaloma ari, “Ari yinyukha khwambukhe khutsye isi Bafirisitiya, nio banyale khuukhubona. 9Ne singa bafukiilila khukhwiitsa isi ifwe khuli, khuryo ifwe kane khurame isi khuli, khulekhe khutsya isi libusanilo lyaabwe ta. 10Ne siinga bakhulomela ifwe khuutsya isi bali, kane khutsye. Lwekhuuba shino kane shibe shokyesanisa shiri Umukasya waabawaanileyo mu makhono keefwe.”

11Aryo Yonasani n’umusooleli uwamuyeetakho kila batsya beemikha mu shifwo isi Bafirisitiya banyala baababonela. Kila Bafirisitiya baloma bari, “Ni mubone ba Isiraeli tsana bekhweesile khukhwaama mu malowo abe isi beebisa.” 12Kila bekhuunga isi Yonasani n’umusooleli uwamuyeetakho nga babaloma bari, “Nimwiitse ano isi ifwe khuli, ni nafwe kane khubokesanise.”

Yonasani waalomela umusooleli weewe ari, “Inondekho! Lwekhuuba ari Umukasya waabareere mu mikhono kye ba Isiraeli.”

13Yonasani wekhweesa khuuniina nga araambisa kamakhono ni bikyele, n’umusooleli weewe nga waamuloondelekho. Ni boola khu ngaaki, Yonasani waaba nga eera Bafirisitiya babaaba nga bamwaamila ibweeni, n’umusooleli weewe nga eera abo babaaba nga bamwaamila inyuma weewe. 14Mu khwibwakala khukhwanyoowa khuno khweesi Yonasani n’umusooleli weewe baakhola, beera Bafirisitiya kamakhumi kabili, mu buleeyi bubwoola nga tsimita kataru.

15Baryo baselikhale Bafirisitiya boosi baaba ni khuurya khuukali naabi. Aabawo abo babaaba mwibusanilo, ni babaandi babaaba nga baaliindile, ni babaandi babaaba nga bebwakala biifwo bibiindi, atweela ni babaandu boosi. Boosi baarya naabi nga baakaraangaraane busa. Shibala shoosi shaanikina busa, abawo biinikino biikali mu baandu boosi.

Khuuwulibwa khwe Bafirisitiya

16Baaliindi ba Saulo uwaba ali i Gibeya baalola baabona nga baselikhale Bafirisitiya batitukha, nga batima batsya iyi ni neeyi. 17Kila Saulo aloma babaandu babaaba ni naye ari, “Ni mubale baselikhale boosi mubone naanu ukhaliwo ano ta.” Baryo ni baamala khuubala, baanyoola nga Yonasani n’umusooleli uwamuyeetakho khuusuta bye busoolo byeewe sibaliwo ta.

18Kila Saulo aloma Ahija uwaba nga niye umusaayi mu biseela ibyo ari, “Reera ano isanduuku iye kamakaambila iya Wele, khumwireebekho she khuukhola.” Lwekhuuba mu biseela ibyo abe isanduuku iye kamakaambila iya Wele yino yaba ili ni liiye lye ba Isiraeli. 19Ne Saulo n’aba nga ashikanikha isi umusaayi aryo, khuutuumbuukha mu Bafirisitiya khwaaba nga khwiloosela busa naabi. Kila alomela umusaayi ari, “Ukhenaanayo khukhwiitsa ni sanduuku ta.”

20Aryo Saulo khaangukho ni baselikhale beewe nabo benyukha baatsya mu busoolo isi Bafirisitiya. Ni khu mbuka yino, Bafirisitiya baaba mu khutuumbuukha khuukali naabi, boola ni khukhwiirana babeene bonyene na bonyene. 21Aabawo baselikhale Baheburaniya baalala babaaba nga bakulibwa ni Bafirisitiya khuubasoolanilakho, khu luno bashuukha beela khu lubeka lwe ba Isiraeli baasoolanila Saulo ni Yonasani. 22Ni ba Isiraeli babaandi nabo babaaba nga baayibisa mu ngoongo tsa Efurayimu ni baawulila bari Bafirisitiya balikho batitukhaka, nabo baarurayo beetsa betubaasa mu khubebwakala. 23Aryo Umukasya waawonesa ba Isiraeli khu shifukhu isho, ni busoolo buno bwaatsya bweloosela bwaabira i Besi Aveni.

Bibyabawo lwanyuma lwe buusoolo

24Babaandu ba Isiraeli baaba bali ni kumutaambo kumukali nga baawetsekheleele shifukhu isho, lwekhuuba Saulo aaba nga waabalakiile ni shishitsubo ari, “Kane atsubibwe muundu yeesi ukane alyekho biilyo nga ise ishiili khuhesa baasiku baase boosi ta.” Isho shaakila baselikhale boosi baalekha khuulyakho biilyo byoosi ta. 25Baselikhale boosi ni babaandu baakyeenda baabira mu shisaali, baabona bubuukhi bwe ntsukhi aasi. 26Mu shisaali mwoosi mwabamo bubuukhi nga buroonya buli aandu, ne mbaawo umuundu na mutweela uwalyakho bubuukhi buno ta, lwekhuuba babaandu baarya naabi shishitsubo sha Saulo. 27Ne Yonasani niye aaba nga akhuwulilakho shishitsubo shino ta. Kila awaamba imiimbo yeewe, waakitiila mu buukhi, waabulyakho. Aryo niye wewulila buulayi, naluundi waabona buulayi. 28Kila mutweela khu baselikhale amulomela ari, “Paapawo akhwitsubisile ifwe nga aloma ari umuundu yeesi ulyakho biilyo byoosi shaleelo kane atsubibwe, ni nafwe khwafukiilisana khuulekha khulyakho khakhaandu khoosi ta. Isho shishikila ukhubona khuwetsekhelela khuri.”

29Yonasani waabeelamo ari, “Paapa wase waakhurereere biwaangafu biikali naabi mu shibala shino. Ni mumbone ise nga niindi buulayikho, nga ndi ni kamaani lwanyuma lwe khuulyakho bubuukhi buno. 30Shaandibeele shifuura buulayi, inywe muba nga mumuliilekho biilyo byeesi baasiku beefwe Bafirisitiya batitukhile baalekha. Khali khwanyalisile khuuhesa Bafirisitiya bano baakali ni khufuurisakho.”

31Isi antsye bwatsya khukhwilabulila, nga ba Isiraeli baaluwile luukali naabi lwe khukhwiira Bafirisitiya khukhwaamila ilala i Mikimashi khukhwoola i Ayaloni. 32Baryo ba Isiraeli bawutulaka bibiindu biikali khukhwaama khu baasiku baabwe, baarakikha khuulyaka bibiindu bilala khu nibyo. Baakhoonyakila kamasheese, tsikhaafu, ni tsimoosi tseene khwiloba, baalyaka tsinyama nga tsishiilimo kamafuki. 3314.33: Rak 9.4; Lev 7.26,27; 17.10-14; 19.26; Maka 12.16,23; 15.23Babaandu baaboolela Saulo bari, “Bona baselikhale balikho booneka isi Umukasya, nga balya tsinyama tsitsishiilimo kamafuki.”

Ni Saulo naye waabeelamo ari, “Inywe mwaakholele buubi naabi. Aluno ni mupiringise kubaale kuboofu mukundeerere isi indi ano.” 34Luundi ndi waabalomela ari, “Ni mutsye, muboolele buli muundu andereere ano ikhaafu yeewe, ni lisheese. Kane khubikhoonyele ano khu kubaale kuno, nio lwanyuma khulye. Awo singene ibewo umuundu ukane onakise isi Umukasya lwe khuulya inyama ishilimo kamafuki ta.”

Ni mu shilo sheene isho buli muundu wareera ikhaafu yeewe waakikhoonyela khu kubaale ikwo. 35Aryo Saulo wombekha shisheeso shishanyoowa she khuuwaanilakho tsisaayilo isi Umukasya.

36Lwanyuma Saulo waalomela baselikhale beewe ari, “Khakhutsye khwibwakale Bafirisitiya luundi nga antsye ashiili mu shilo, khubasoolanise khukhwoolesa kumutikhinyi. Khubeere boosi, khubanuulekho byoosi byeesi bali nabyo.”

Babaandu nabo beelamo bari, “Iwe n’ukhole isho sheesi ubona uri shili shilayi.”

Ne umusaayi Ahija waaloma ari, “Taawe! Khakhunyoowe khukhwiireebakho isi Wele.”

37Kila Saulo ereebakho isi Wele ari, “Ise intsye ari nibwakale Bafirisitiya bano? Kane ukhuyeete khuubahesa?” Ne Wele waalekha khwiilamo khu shifukhu isho ta.

38Kila Saulo alaanga baaraangilisi be liiye lyeewe boosi atweela waabaloma ari, “Khwaakha khuweentselese khubone shiibi shiina shishikilile Wele waalekha khuukhwiilamo ta. 39Naluundi nitsubila ilala mu Mukasya Umulamu, umuundu yeesi uwoonakisile, abe ikhaba umusooleli wase Yonasani, aakha khuufwa.” Ne mbaawo n’umuundu na mutweela uwaamwiilamo ta.

40Kila lwanyuma Saulo alomela ba Isiraeli boosi ari, “Inywe kane mwiimikhe khu lubeka ulwo n’umusaayi, ni nase ni Yonasani khube khu lubeka luluundi.”

Babaandu nabo baamwiilamo bari, “Iwe n’ukhole sheesi ubona uri shili shilayi.”

4114.41: Bala 27.21; 1 Sam 28.6Lwanyuma Saulo waaloomba ari, “O Umukasya Wele wa Isiraeli, iwe lwashiina ukhaantsililemo shaleelo, ise umwakaanisi woowo? Naakhwikoontseleele, nukhwookese naanu uwoonakisile. Singa shishoonako shino shiba mwiise, namwe mu musooleli wase Yonasani, shookese ni Urimu. Ne singa shiba she babaandu ba Isiraeli, shookese ni Tumimu.”

She khukhwiilamo sheetsa nga shookesana shiri Yonasani ni Saulo nibo babaaba nga boonakisile, ne akhuba liiye lya Isiraeli ta.

42Kila ndi Saulo alomela umusaayi Ahija ari, “Khupa khaakokha akari aase n’umusooleli wase Yonasani.” Shiryo shaanyoolekha nga Yonasani niye uwaba ni shikosi.

43Saulo waareeba Yonasani ari, “Mboolele, shiina sheesi wakholile?”

Yonasani naye weelamo ari, “Ise natiilile imiimbo yase mu buukhi bwe ntsukhi, naakhoombakho bukyeekhe buri. Ne ari bona uli khuuloma uri ari naakhila khuufwa.”

44Saulo waamulomela ari, “Nisho shisheene, Yonasani. Iseese nitsuba ndi waakha khuufwa.”

45Ne baselikhale nibo beelamo bari, “Taawe! Sikhwaakha khukhwiira Yonasani ta. Lwekhuuba niye uwakilile Wele waakhuyeeta ifwe khuuwula baasiku beefwe. Ifwe khwitsuba mu Mukasya Umulamu, sikhutsya khumwiira ta. Naluundi mbaawo na mutweela unyala waamuwaambakho ta, lwekhuuba Wele waakhuyeetile khulweewe.” Baryo baselikhale baakila Saulo waalekha khukhwiira Yonasani ta.

46Aryo Saulo waakamisa khuutimisa Bafirisitiya, baryo beelayo iwaabwe.

Saulo asoolanisa baasiku beewe

47Aryo Saulo nga n’amala khukhwikyela umuyiinga wa Isiraeli, waasoolanisa baasiku beewe khu mbeka tsoosi, nga nibo bano: babaandu ba Mowabu, ba Amoni, ba Edomu, bayiinga ba Zoba, ni Bafirisitiya. Buli oosi isi Saulo aasoolanila, aabawula boosi. 48Saulo waasoolana buulayi naabi, waahesa ni ba Amaleki. Aryo waawonesa ba Isiraeli khukhwaama isi baasiku babaabebwakalatsaka. 49Basooleli ba Saulo baaba nibo Yonasani14.49 Yonasani: Alala umanyikhaane nga Esibaali, ni akhuundi bari Isibosheesi., Ishivi, ni Malikishuwa. Ni bakhaana beewe babili nga umukhulu niye Merabu, n’umukyeekhe niye Mikali. 50Umukhasi wa Saulo abe bamulaanga bari Ahinomu, uwaba umukhaana wa Ahimaazi. N’umukhulu we liiye lya Saulo aaba shanyanyina sheewe bari Abuneri, umusooleli wa Neri, khootsa wa Saulo. 51Paapa wa Saulo abe bamulaanga bari Kiishi, ni paapa wa Abuneri bari Neri, boombi babaana ba Abiyeli.

52Mu biifukhu byoosi byeesi Saulo aabeelamo nga ali umuyiinga wa Isiraeli, aabawo khuusoolana khuukali ni Bafirisitiya. Ne abe buli lweesi Saulo anyoolela umusaani uwe kamaani, ukharya ta, abe amwiinjisa burereefu mwiiye lyeewe.