Swahili Bible2

13

Buusoolo ni Bafirisitiya

1Saulo aaba umusaani umusooleli busa13.1 Umusooleli: Bibyaronebwa bilala mu Luheburaniya biloma biri aba olesa kimiiko kataru mu mbuka isi aarakikhila khuuwula Isiraeli, aryo waawula Isiraeli khuumala kimiiko kibili.

2Saulo waarobolayo basaani baselikhale bikana bitaru (3,000) khukhwaama mu Isiraeli, ni babaandu babaaramile boosi waabasiindikha khuukobolayo ingo. Niye Saulo umweene waarama ni basaani bikana bibili (2,000) baaba ni naye i Mikimashi, shisiintsa she mu ngoongo she Beseli. Ni basaani babaaramile shikana shitweela baarama ni Yonasani i Gibeya, shisiintsa sha Benyamini.

3Yonasani webwakala naluundi waasoolanisa waawula liiye lye Bafirisitiya lilyaba i Geba, ni Bafirisitiya babaaramile baashiwulilakho. Aryo Saulo waarumana baarume khuutsya mu bisiintsa byoosi mu linaambo nga bafuura tsifuluumbeti tse busoolo, nga akana buli muundu yeesi awulile luundi amanye. 4Baarume baatsya baaboolela babaandu ba Isiraeli boosi bari Saulo webwakalile luundi waahesile liiye lye Bafirisitiya lilyaba lyaabuusaniile i Geba, naluundi bari Isiraeli yekyelile shibiiyile isi Bafirisitiya. Shikila babaandu boosi benyukha baatsya betubaasa khu Saulo i Gilugaali.

5Bafirisitiya baabuusana atweela khuusoolanisa ba Isiraeli. Baaba ni liiye lilyoola kamakaali kimikaanda bitaru (30,000), basaani babasoolanila khu ŋwaaŋwa bikana bisesaba (6,000), ni baselikhale babaandi be khu bikyele babaaba boola nga bukali bwe kumuyekhe khu ndulo khwe nyaantsa. Boosi baatsya baabuusanila i Mikimashi, lubeka lwe bwaamanyaanga wa Besi-Aveni. 6Basaani ba Isiraeli baabona bari Bafirisitiya baabafuurire bukali, naluundi baabona nga bali khuutsya khumiinilisibwa naabi mu busoolo. Shikila baalala khu nibo batima baatsya beebisaka mu mafuluma ni baalala mu malowo, ni babaandi mu mabaale kamaboofu. Babaandi baatsya beebisaka mu bifwo bye tsiŋani13.6 Tsiŋani: Mu Luheburaniya, byaba biifwo bibyabeetsebwa mu lwaanda, byaraambisibwa nga biifwo bye khusiikhamo baafu, ni baalala mu malowo ke tsintsitsi tse kameetsi. 7Ni baalala khu ba Isiraeli baakhalisa luluutsi Yorudaani, baatsya shanjelekha mu shibala sha Gadi ni Gileyadi.

Ne Saulo niye aba ashiili i Gilugaali, ni baselikhale beesi aaba nabo baaba bali khuunikina busa lwe khuurya. 813.8: 1 Sam 10.8Saulo waaliindila biifukhu musaafu, imbuka isi Samweli aamulomela. Ne Samweli waalekha khukhwiitsa i Gilugaali nga ni shaba ta, kila basaani beesi Saulo aaba nabo baarakikha khuumusalanilakho. 9Lwanyuma kila Saulo waalakila ari, “Nimundeerere ano bibyaayo khubiwaaneyo nga tsisaayilo tsintsoshe tse lukoosi lwe khukhwikhoyesa Umukasya, nio anyalise khuukhuyeeta ifwe.”

Aryo Saulo wahaanayo isaayilo intsoshe. 10Ne n’aba nga amaliilisa khuwaanayo ari, Samweli naye woola. Saulo waatsya khumwakaanila.

11Samweli waamureeba ari, “Shiina sheesi waama khukhola?”

Saulo naye waamwiilamo ari, “Ise imboone nga baselikhale baase baasalanilakho, ate nga iwe wakhwoolela khu mbuka isi waloma ta. Naluundi abe Bafirisitiya baabuusaniile i Mikimaashi, 12nase naarya naabi nga nambaasa ndi banyala khukhuuntsibwakala ano i Gilugaali. Indyo imbeele nga ishiili khuwaanayo isaayilo isi Umukasya khuumuloomba buyeeti ta, shikila nimiinilisile khuuwaanayo isaayilo yino khu sheeso she kumulilo.”

13Samweli waamwiilamo ari, “Iwe waakholile shishiindu she busilu! Iwe waakhuliinda bilakilo by’Omukasya Wele woowo byeesi akhuboolela ta. Iwe uba nga uwoleele Umukasya, khali akhulekheele iwe ni babaana boowo buwuli bwa Isiraeli biilo ni biilo. 1413.14: Bur 13.22Ne ari buwuli bwoowo singene bwiloosele buryo ta. Ari Umukasya umweene weroboreere umuundu isi umweene akana khuuba umuwuli we babaandu beewe, lwekhuuba iwe waakhuwulila bilakilo byeewe ta.”

15Samweli wenyukha waarurayo i Gilugaali, waatsya i Gibeya, shishiili mu Benyamini.

Ne Saulo ni baselikhale beewe babaaramawo nga waababalile boola nga bitoondo bisesaba (600) byonyene. 16Saulo naye, n’umusooleli weewe Yonasani, ni liiye lyaabwe baatsya baabuusanila i Geba, nasho shisiintsa sha Benyamini, ne nibo Bafirisitiya baabuusanila i Mikimaashi. 17Baselikhale Bafirisitiya baatsya mu bipuri bitaru, khuutsya khukhwibwakala ni khuunuula bibiindu mu byaalo. Shipuri shitweela shaatsya kwe ngaaki khukhwaamila i Ofura mu shisiintsa sha Shuwaali. 18Shipuri shishiindi shaatsya kwe bukwanyaanga, khu mukhoosi kwa Besi Horoni, ni shipuri she khataru shaatsya kwe bwaamanyaanga, khu mukhoosi kukweesanile ni Litila lya Ziboyiimu.

19Bafirisitiya sibaafukiilisakho khuuwa “baabasi be bibyuuma” ba Isiraeli khuubakho ni mbuka iye khukhwikholela bibyuuma bye khuuraambisa ta. Shino baashikhola nga belomela bari, “Ba Isiraeli banyala bekholela tsiindima ni kamafumo.” 20Isho shaakila ba Isiraeli baatsyatsaka mu Bafirisitiya khuuwakalatsaka tsimbako tse khu yeeyi, tsiyaywa ni tsinjeso tsaabwe, ni khuubeetsa bibaawo bye khuubowa khu yeeyi atweela nio tsikyeende. 21Ne Bafirisitiya baabakhalatsakila buukusi bwe angaaki naabi lwe khuuwakala tsimbako tse khu yeeyi, ni tsiyaywa, ni tsinjeso tsaabwe. 22Bibiindu khuuba biryo, khukhwoola khu shifukhu she khuutsya mu busoolo, baselikhale ba Isiraeli, sibaabakho namwe sibaatsyakho ni tsiindima namwe kamafumo ta, khuurusakho Saulo n’umusooleli weewe Yonasani bonyene. 23Baryo Bafirisitiya baayila liiye lyaabwe khuutsya khuliinda intsila iye Mikimaashi.