Swahili Bible2

11

Saulo awonesa shiriimba sha Yabeshi mu Gileyadi

1Nakashi uwe Amoni, waraangilila liiye lyeewe waatsya khuluumba shiriimba sha Yabeshi shishiili mu shisiintsa sha Gileyadi, waashibotokhelela. Ni babaandu boosi be Yabeshi baalomela Nakashi bari, “Iwe n’ukhole indakaano ni nafwe, ni nafwe kane khuryo khukhufukiilile iwe nga umuwuli weefwe.”

2Nakashi naye waabeelamo ari, “Mu ŋali ise kane ikhole indakaano ni nanywe, ne nga mwaamalile khuufukiilisana ni nase shino: mufukiilile ise khuutomolaka imoni iye khu lubeka luulayi khu buli muundu yeesi mu Isiraeli. Indyo ise mbe nga naakhomyaasile linaambo lya Isiraeli.”

3Baaraangilisi be shiriimba Yabeshi nabo beelamo bari, “N’ukhuwe ifwe biifukhu musaaafu, khunyale khurumanisa mu Isiraeli mwoosi, khulola umuundu unyala wakhuwonesa ifwe. Ne nilekha khubawo na mutweela ta, ulwo nio ifwe khwiwaaneyo is’uli.”

4Baalala khu baarume baatsya boola i Gibeya, shiriimba sha Saulo. Ne nibaamala khubawa kamakhuuwa kano khukhwaama i Yabeshi, babaandu boosi baarakikha khuulilila mu mutaambo kumukali naabi. 5Khu mbuka yino Saulo aaba nga aloota, nga aama mu mikuunda, nga alikho akyeendela inyuma we tsiyeeyi. Kila waareeba ari, “Shihangafu shiina shishiiliwo? Lwashiina babaandu balila bari?” Bamwiilamo nga bamuboolela kamakhuuwa keesi babaandu baareera khukhwaama i Yabeshi. 6Ne Saulo n’awulila shino, khaangukho Umwoyo wa Wele waamwiikhakho ni kamaani kamakali, aryo wetsula buurafu buukali naabi. 7Aryo Saulo waabukula tsibili khu yeeyi tseewe, waatsiremakamwo bipatu, waabiwa baarume khuubiyila mu Isiraeli mwoosi. Aabaloma khuubiyila isi babaandu boosi nga aloma ari, “Shino nisho shishikhaakholikhe khu yeeyi tseenywe nanywe ni kane mulekhe khukhwiitsa khuutsya ni Saulo ni Samweli mu busoolo.”

Umukasya waalekhuula shiriisa shaawaamba babaandu ba Isiraeli boosi. Baryo kila babaandu boosi beetsa atweela. 8Saulo waababuusanisila boosi i Bezeki, nga baabalibwile atweela boosi, boola basaani kimyeeka kitaru (300,000) khukhwaama mu Isiraeli mwoonyene, ni kimikaanda kitaru (30,000) khukhwaama mu Yuda namwo. 9Baryo kila Saulo ni liiye lyeewe balomela baarume tsana babaama i Yabeshi khukhwiilayo, nga babaloma bari, “Kumukaamba antsye butsya khwoola bwe mwihangilwe buri, khukhaabe nga khwaabawonesele inywe.”

Baarume bano ni beelayo i Yabeshi, baaboolela babaandu bilomo bino, byaabeesamo naabi kamaani. 10Kila baboolela ba Amoni bari, “Ifwe khukhewaaneyo isi muli kumukaamba, ni nanywe munyala khuukhukhola ifwe sheesi mukana shoosi.”

11Buryo ni bwaba nga busha shifukhu shisheelakho, Saulo waawukhanisamo liiye lyeewe mu bipuri bitaru, bebwakala ba Amoni nga antsye ashimaliya. Baryo baahesa ba Amoni khukhwoolela ilala khu saawa tse mwihangilwe. Babaandu bakyeekhe bari khu ba Amoni, babaanyala khuutitukha, ne nga boosi baasalanisibwa, buli mutweela waatsya mu ntsila yeewe busa.

12Babaandu ba Isiraeli baatsya isi Samweli, baamuloma bari, “Bali eena babaandu baabaloma bari Saulo s’anyala wekyela umuyiinga weefwe ta? N’ukhureerere babaandu bano, ni nafwe kane khubeere boosi.”

13Kila Saulo abaloma ari, “Mbaawo umuundu na mutweela utsya khukhwiiribwa shaleelo ta. Lwekhuuba khu shifukhu shino nikhwo khweesi Umukasya awoneseelekho Isiraeli.”

Saulo bamufukiilisa nga umuyiinga

14Lwanyuma kila Samweli aloma babaandu boosi ari, “Ni mwiitse khutsye i Gilugaali, khukholele ibweene iyo indakaano khuŋaŋasa Saulo khuuba nga umuyiinga weefwe.” 15Baryo babaandu boosi baatsya babuusana mu shifwo she khukhwisaaya i Gilugaali. Ibweene iyo bakhola Saulo khuuba nga umuyiinga waabwe. Baryo Saulo ni babaandu boosi bawaanayo tsisaayilo tse lukoosi isi Umukasya. Boosi baaba mu khwikhoya khuukali naabi.