Swahili Bible2

10

1Lwanyuma, Samweli waabukula imuka iye kamafura ke kuusaala kumuzeyituuni, waakatsukha khu murwe kwa Saulo. Lwanyuma waamukwa mu shifuba nga amulomela ari, “Umukasya waakhuroboole iwe khuuba umuraangilisi luundi umuwuli we babaandu beewe ba Isiraeli. Iwe kane ubakhiinge luundi ubawonese khukhwaama mu mukhono kwe baasiku baabwe. Ni nabino byoosi kane bibe nga she khuubonelakho khukhwookesana nga Umukasya waakhuroboole iwe khuuba umuwuli we babaandu beewe.

3“Nawe uryo kane wilooseleyo woole isi kuusaala kuboofu10.3 Kuusaala Kuboofu: Alala kuusaala kukumanyikhaane nga kukwalaafu kwe Tabori. Abweene awo kane waakaanane basaani bataru nga batsya khukhwisaaya Wele i Beseli. Mutweela khu nibo kane abe nga waasutile buumeeme bwe tsimbusi bubili, n’ukuundi nga waasutile kimikaati kibili, n’ukuundi nga waasutile iwootswa iye viini. 4Kane bakhukheese, ne lwanyuma bakhuwekho kimikaati kibili, ni nawe ukyakaanile. 5Lwanyuma lweebyo, utsye khu lukiingi lwa Wele i Gibeya, isi liiye lye Bafirisitiya libuusanila. Ne n’ukane ube nga winjila mu shiriimba, kane wakaanane lubatsaangwa lwe baŋoosi nga baama mu shifwo she khukhwisaaya, nga balikho bakhupa kamatuungu, tsiŋoma, nga bafuura kimilele, ni babaandi nga balikho bakanikha bye buŋoosi. 6Ni abweene awo, Umwoyo w’Omukasya kane ekhe khwiiwe nga etsila mu maani kamakali akhukaluse khuuba umuundu uwe saambo ikiindi busa, ni nawe kane witubaase atweela ni nabo nga ukanikha bye buŋoosi. 7Ni bibiindu bino byoosi nga byooleleele, iwe uli ni khuukhola byoosi byeesi unyala khukhola, lwekhuuba Wele niye ukane akhuyeete. 8Lwanyuma uraangile utsye i Gilugaali, isi nase kane niitse lwanyuma ikhwakaanane, khuwaaneyo tsisaayilo tsintsoshe ni biwaanwa bye lukoosi isi Umukasya. Iwe kane uniindile ibweene iyo khuumala biifukhu musaafu, ni nase ikhaakhuboolele shiina shishikheelekho khuukhola.”

9Nga Saulo n’ashuukha busa ari khuulekha Samweli, Wele waamukalusa khuuba umuundu uwe saambo kiindi busa. Ni bibiindu byoosi byeesi Samweli aamuboolela byoolelela khu shifukhu sheene isho. 10Aryo Saulo n’umwakaanisi weewe ni boola i Gibeya, lubatsaangwa lwe baŋoosi lwamwakaanana. Ni abweene awo, Umwoyo wa Wele waamwiikhakho mu maani kamakali naabi, waabetubaasakho, naye waarakikha khuukanikha bilomo bye buŋoosi.

11Ni babaandu baalala abe babaamanya Saulo ni baamubona nga naye akanikha bilomo bye buŋoosi naluundi nga ebirisa nga umuŋoosi, bereeba bonyene bari, “Shiina ndi shisholele khu musooleli wa Kishi? Ari Saulo naye wekyelile umuŋoosi?”

1210.12: 1 Sam 19.23,24Kila mutweela khu basaani abe babaamenya mu shifwo isho elamo ari, “Ne baŋoosi bano babaandi, paapa waabwe niye naanu?” Isho shaakila luulomo lweetsawo lululoma luri, “Ari Saulo naye wekyelile umuŋoosi?”

13Aryo Saulo n’amala khuukanikha bilomo bye buŋoosi, waatsya mu shifwo she khukhwisaayilamo khu lukiingi.

14Lwanyuma, paapa wa Saulo umukyeekhe n’ababona, waareeba Saulo ari, “Inywe abeele mwaatsya waheena?”

Saulo welamo ari, “Abeele khwaatsya khuweentsa tsisikilya tsitsakoraana. Ne ni khukhaatsinyoola ta, khwaatsya khubona Samweli.”

15Kila paapa wa Saulo umukyeekhe yuno amureeba luundi ari, “Ne shiina sheesi Samweli ababooleele?”

16Saulo naye welamo ari, “Akhuboolele busa lubuula ari tsisikilya tsaanyoolikhanile.” Ne Saulo mbaawo shoosi sheesi aamuboolelakho khu byeesi Samweli aakanikha bibiwaamba khu bye khuuba umuyiinga ta.

Umukasya okyesanisa Saulo khuuba umuyiinga

17Aryo Samweli walaangilila ari ba Isiraeli boosi babuusanile i Mizupa khukhwakaanana n’Umukasya. 18Nga boosi baabuusaniile atweela, Samweli waababoolela ari: “Umukasya Wele wa Isiraeli anomeele ise imbashebuse inywe ndi, niye uwabawonesa inywe waabarusa mu Misiri, ni isi kamanaambo kakaandi koosi kakaababonabonisa inywe.

19Ne bona ndi Wele tsana uwabawonesa inywe khukhwaama mu bikosi byeenywe ni kimitaambo kyeenywe kyoosi, ndi mwamwikaana nga muloomba muri mufune umuyiinga. Nashiryo ari buli shikuuka shaakha shiitse khuubuusanila isi Umukasya mu bukali.”

20Aryo Samweli waareera bikuuka byoosi, shitweela tweela isi shisheeso. Umukasya waarobolamo shikuuka sha Benyamini. 21Aryo ndi Samweli waareera shikuuka sha Benyamini nga awulakamo tsiingo, ni muungo mwa Materi mwaawulibwawo nga bareera umuundu khu muundu. Lwanyuma lwa byoosi Saulo umusooleli wa Kishi waarobolebwa. Ne ni baamuweentsa, balekha khumubonakho ta.

22Baryo kila babaandu baloomba isi Umukasya nga baloma bari, “O Umukasya, Umuundu mweene weetsilekho ano?”

Kila Umukasya abeelamo ari, “E e, aliwo, ne weebisile mu bikuku.”

23Baryo kila babaandu batima baatsya baareera Saulo baamwiimisa akari mu baandu. Niye waaba muleeyikho naabi khufuura babaandu babaaramile boosi. 24Kila Samweli alomela babaandu ari, “Ni mubone umusaani uyuno, niye isi Umukasya abaroboleele khuuba umuyiinga. Mbaawo umuundu ukuundi uuli nga niye ta.”

Baryo kila babaandu balookhela angaaki bari, “Umenyewo luukali umuyiinga!”

25Abweenewo, Samweli waasontsoola babaandu bibiindu bibyaakhila umuyiinga khuufuna ni bye khuukhola. Aryo waabirona byoosi mu shitabo, waabira mu shifwo shikhosefu isi besaayila Umukasya. Lwanyuma lwa byoosi Samweli waalekhuula babaandu khuutsyaka, nga buli mutweela elayo ingo weewe.

26Saulo naye aryo weelayo ingo weewe i Gibeya. Ne Wele aaba wahaambilekho khu myoyo kye babaandu baalala khukhwikyela baloondeleli ba Saulo, baryo kila batsya ni naye iweewe. 27Ne aabawo basaani baalala be bunywaanywa baabaloma bari, “Saulo naye ali umuundu unyala waakhuwonesa ifwe khukhwaama isi baasiku beefwe?” Baryo baalekelesa naabi Saulo, baalekha na khumureererakho ni biwaanwa ta. Ne Saulo niye waaliinda lukoosi lweewe.