Swahili Bible2

SHIITABO SHISHINYOOWA SHE

BAYIINGA

KHUKHWAANTSULA

Shiitabo shino shishinyoowa she Bayiinga shilooselakho khu byaamayo bye buyiinga bwa Isiraeli, nga luukano lwabyo ni lurakikha mu bitabo bya Samweli bibiili. Luukano luno lunyala khukhwawukhanisibwamo bisiintsa bitaru, nga nibyo bino: (1) Khuureebwawo khwa Solomoni khuuba umuyiinga wa Isiraeli ni Yuda, naluundi lukanikha ni khu khufwa khwa Dawudi. (2) Khuuwula khwa Solomoni atweela ni biilayi byeesi aakhola. Ni shishifuurira ilala buukhulu khu nibyo nikhwo khukhwombakha Liisaayilo Liikhulu mu Yerusalemu. (3) Khukhwaawulamo buyiinga bwaamamwo bisiintsa bibili, nga nibyo she ngaaki ni she mwaalo, ni khuutubakho tsingano tsitsiindi tse bayiinga babaawula mu Isiraeli ni mu Yuda mu miiko kikyeelakho mu senkyure iye shisyeenda nga Kristo ashiili khusaalikha ta.

Mu bitabo byoombi bye bayiinga, buli muwuli uwabawo aapimibwa khuusiintsiila khusaambo isi aawulilatsakamo Wele, ni biilayi byeesi aakholelatsakila linaambo lyeewe. Ne khukhwisaaya bifwaani ni bumiinyi nibyo bibyareeratsaka khuuhela mu baandu. Bayiinga be buyiinga bwe ngaaki bwa Isiraeli baakhasikha naabi lwe lomo yino. Ne buyiinga bwe mwaalo bwa Yuda mwabamo khuwulila Wele, ne luundi nga alala bakhasikhana. Babaandu babaamanyikhana buulayi mu shitabo shinyoowa she Bayiinga shino baaba baŋoosi b’Omukasya, baaba nibo babaandu banyindaalifu naabi babaakanikhatsaka khulwa Wele, nga bareewula babaandu khuulekha khwisaaya bifwaani, nio lwanyuma balekhe khuminyaalila Wele ta. Mu baŋoosi bano umanyikhaane naabi niye aba Eliya, ni luukano lulukanikha khu khukhaabisana khweesi aaba nakhwo ni basaayi ba Bayaali mu suula 18.

Inoondekhana iye bibiilimwo

Intsakamo ye buwuli bwa Dawudi (1.1—2.12)

Solomoni ekyela umuyiinga (2.13-46)

Buwuli bwa Solomoni (3.1—11.43)

a. Kimiiko kya Solomoni kikyanyoowa (3.1—4.34)

b. Khukhwombekha Liisaayilo Liikhulu (5.1—8.66)

c. Kimiiko kikiindi kikyeelakho (9.1—11.43)

Khukhwaawulamo buyiinga (12.1—22.53)

a. Bikuuka bye ngaaki biminyaala (12.1—14.20)

b. Bayiinga ba Yuda ni ba Isiraeli (14.21—16.34)

c. Umuŋoosi Eliya (17.1—19.21)

d. Umuyiinga Ahabu wa Isiraeli (20.1—22.40)

e. Yehoshafati umuyiinga wa Yuda ni Ahaziya umuyiinga wa Isiraeli (22.41-53)