Swahili Bible2

9

Umukasya abonekhela Solomoni luundi

(2 Bye Kimiboolo 7.11-22)

1Aryo Solomoni waamaliilisa khukhwombekha Liisaayilo Liikhulu ly’Omukasya, waamaliilisa ni lubili lweewe lwe khuukonamwo. Waamaliilisaka byoosi byeesi areengekhareengekha khukhwoombekha. 29.2: 1 Bay 3.5; 2 Kim 1.7Lwanyuma ndi Umukasya waamubonekhela kumuluundi kwe khabili, nga n’amubonekhela makiboole i Gibiyoni. 3Umukasya waamulomela ari, “Ise naawuliile khuuloomba atweela ni khukhwilootsa khwoowo, khweesi ureerire isiindi. Ise naakhosesele intsu yino isi wombekhele, ni nase mu bweene muno nimwo mweesi kane baantsisaayatsakile. Intsu yino ili iyase, ni nase kane ingilolelatsakile biifukhu byoosi. 4Ne isi iwe, siinga uwuliilisa byeesi inoma nga paapawo Dawudi n’akholatsaka, ni kumwoyo kwaŋali luundi kumuwolu, ukholatsake byoosi byeesi kamakaambila ni biilakilo byase byeesi biloma, 59.5: 1 Bay 2.4ni nase kane nolelese bibitsubo byase byeesi nalomela paapawo Dawudi, ndi ilibawo umuundu khukhwaama muungo mweewe, uliba umuyiinga wa Isiraeli biilo ni biilo. 6Ne siinga iwe uminyaalila ise, namwe babaana boowo babaalikhusikhila iwe, siinga nabo baminyaala, baalekha khuwuliilisa kamakaambila kaase ni biilakilo byase byeesi indikhuukhuwa iwe, luundi baatsya baakaanisa ba wele babaandi, babesaaya, 7nase ndyo singene ifukiilise babaandu baase ba Isiraeli khuumenya mu shibala shino sheesi nabawa ta. Naluundi kane naantsukhe Lisaayilo lino likhosefu isi nalomakho ndi kane bantsisaayatsakilemo. Indyo kane nikyelise linaambo lya Isiraeli khuuba nga she khukhwilolakho busa luundi babe buukhomo isi kamanaambo kakaandi. 89.8: 2 Bay 25.9; 2 Kim 36.19Abe yakhaba nga Lisaayilo lino likhulu libonekha nga lye kamaani naabi liryo, kane liikyele busa nga she khukhwiyaanga isi abo babaabirawo, nga bereeba bari, ‘Lwashiina Umukasya aakhola shishiindu shiibi shishifwaana shiri khu baandu beewe ni khu Lisaayilo lyeewe likhulu?’ 9Ne babaandu babeene baliilamo bari, ‘Shino shaba shiri lwekhuuba babaandu baarura khu Mukasya Wele waabwe, uwarusa bakuuka baabwe khukhwaama mu shibala she Misiri, beela khukhwisaaya ba wele babaandi, shaakila Umukasya waabareerakho buukosi buno.’ ”

Indakaano ya Solomoni ni Hiramu

(2 Bye Kimiboolo 8.1-2)

10Khukhwombekha Lisaayilo likhulu atweela ni lubili, byayilila Solomoni kimiiko kamakhumi kabili. 11Lwanyuma Solomoni waabukula biriimba kamakhumi kabili bye mu shisiintsa she Galilaaya, waabiwa Hiramu, umuyiinga we Tuulo, nga amusasula lwe tsimbaawo tse kimisaala sida ni sayipuraasi, ni zaabu byeesi aaraambisa.

12Ne Hiramu n’etsa khukhwaama i Tuulo khuubona khu biriimba byeesi Solomoni aamuwa, biriimba bino byaalekha khumusangaasa ta. 13Kila alomela Solomoni ari, “Wandaayase, biriimba shiina bino byeesi umbeele?” Kila Hiramu alaanga biriimba bino ari Kabulu, lwekhuuba aabibona nga sibilimo kumukaso ta. Biriimba bino bilaangibwa biryo khukhwoolesa ni shaleelo shino. 14Hiramu aaba waayakaanisa umuyiinga Solomoni tsikilo bikana bine (4,000) tse zaabu.

Bibiindu bibiindi byeesi Solomoni aakhola

(2 Bye Kimiboolo 8.3-18)

15Eyino niyo isaambo isi Solomoni awaanyiinyamo babaandu khuuraamba nga boombekha Liisaayilo Liikhulu ly’Omukasya, atweela ni lubili lweewe, ni Millo9.15 Liiloba lyeesi baatsukha ibulafu khuwaangasa ni khubalaayisakho khakiingi khweesi shiriimba shombekhebwa, ni litikiiyi lya Yerusalemu, atweela ni biriimba bya Hazori, ni Megido ni Gezeri. 16Makiboolekho, Faraawo umuyiinga we Misiri, ebwakala lwanyuma wahaamba shiriimba Gezeri, waashiwaambisakho kumulilo, waashoosha shaawawo, weeraka ni babaandu ba Kanaani babaaba bashimenyamwo. Lwanyuma waashiwayo nga shiwaanwa she bukhwaale isi umukhaana weewe, uwakhwaalikha wa Solomoni. 17Aryo Solomoni waakhakakho khuubona ari shiriimba shino sha Gezeri shombekhebwa luundi. Solomoni waalakila ni baraambi beewe khukhwoombekha ni biriimba Besi-Horoni she Mwisina, 18Baalati, ni Tamari shishaba mu mubiimbi kwe mu shibala sheewe. 19Baatubakho ni khukhwombekha biriimba bye birara, ni biriimba mweesi kamakaali, ni tsiŋwaaŋwa tseewe bibiikhibwa. Solomoni waabalakila khukhwoombekha byoosi byeesi akana mu Yerusalemu, ni mu Lebanooni, na buli aandu oosi mu buyiinga bweewe.

20Aabawo babaandu babaakhaaba ba Isiraeli ta, nga nibo ba Amori, ba Hiti, ba Perizi, ba Hivi, ni ba Yebusi, babaaba nga bamenya mu shibala isho. 21Bano boosi baaba babetsukhulu be babaandu be kamanaambo, beesi ba Isiraeli bakhaahesa ta, ne baaramawo nga baakulwa be ba Isiraeli. Bano boosi, Solomoni aalakila ari benjisibwe mu buraambi bweewe ni kamaani, naluundi baarama nga baraamba baryo khukhwoolesa ni shaleelo shino. 22Ne khu baandu ba Isiraeli, mbaawo na mutweela isi Solomoni aalakila ari bamwinjise ni kamaani mu buraambi ta. Ne khuurusakho nibo aabakhola busa khuuba baselikhale beewe, baakhulu be angaaki mu buwuli bweewe, baakhulu be kamaye, baakhulu be babatimisa kamakaali keewe, ni naabo babatimila khu ŋwaŋwa tseewe. 23Solomoni aarobolayo baakhulu babaandi baboola bitoondo biraano ni kamakhumi karaano (550), khuuba nga nibo babaalolelela baraambi babaakholatsaka mu bye khukhwombekha khweewe.

24Lwanyuma nga Solomoni waamalile khuumusa umukyelama weewe, uwaba umukhaana wa Faraawo khukhwaama mu shiriimba sha Dawudi, waamuyila mu lubili lweewe lweesi aamwombekhela.

259.25: Luky 23.17; 34.23; Maka 16.16Abe kimiluundi kitaru mu mwiiko, Solomoni awaanayo tsisaayilo tsintsoshe, ni biwaanwa bye lukoosi isi Umukasya, nga araambisa shisheeso sheesi ombekha.

Aryo Solomoni waamaliilisa kumulimo kwe khukhwombekha Liisaayilo Liikhulu.

26Lwanyuma umuyiinga Solomoni wombekha tsimeeri i Eziyoni Geberi, shishaba aambi ni Elati she mu shibala sha Edomu, khu ndulo khwe nyaantsa Imbesemu. 27Hiramu waarumana basaani beewe babaamanya naabi bye khuusuba khu meetsi, khuutsya khutimisa tsimeeri tsa Solomoni, nga baraambila atweela ni basaani ba Solomoni. 28Baatsya baatimisa tsimeeri boola i Ofiri, baareerera umuyiinga Solomoni tsikilo kumukaanda ni biikana bine (14,000) tsa Zaabu.