Swahili Bible2

6

Solomoni ombekha Liisaayilo Liikhulu

1Lwanyuma lwe kimiiko bitoondo bine ni kamakhumi shinaane (480) imbuka isi ba Isiraeli baarurirakho mu Misiri, kwaba kumwiiko kwe khaane kwe buyiinga bwa Solomoni, mu mweesi kwe khaabili nga nikwo kwa Zivu6.1 Zivu: Kumweesi kuno khu kaleenda ye Baheburaniya kutela khuubawo mu mweesi kwe khaane ni kwe kharaano, Solomoni waarakikha khukhwombekha Liisaayilo Liikhulu.

2Liisaayilo Liikhulu lyeesi Solomoni ombekha khukhwisaayilamo Umukasya lyaba tsimita kabili na musaafu buuleeyi (27), tsimita syeenda (9) buubalaayi, ni tsimita likhumi na tsitaru ni shisiintsa (13.5) khuuniina mu ngaaki. 3Iburaangisi isi benjilila mu Liisaayilo Liikhulu yombekhebwa buuleeyi bwayo khukhwiikha aasi nga bwoola tsimita tsine ni shisiintsa (4.5), ni tsimita syeenda (9) buubalaayi nga imalila ilala ibweeni walyo yoosi. 4Ombekhelakho ni kamadilisa nga kabonekha kamanyelele ibulafu, ne nga mukari kabonekha kamabaalayikho. 5Khu matikiiyi ke Liisaayilo Liikhulu ibulafu wako ni nyuma we shishombekhe weene, ombekhelakho buseenge butaru, buli khatweela nga khali khu khasheewe. 6Shishombekhe she Liisaayilo Liikhulu shoosi shabakho tsinuungo tsitaru, nga inyoowela ilala aasi yoolesa buubalaayi tsifuuti musaafu ni shisiintsa (7 1/2), inuungo iye khabili yaba buubalaayi tsifuuti syeenda, ni nuungo iye khataru yaba yoolesa buubalaayi tsifuuti likhumi ni shisiintsa (10 1/2). Buseenge bwe mukari bwawaambisibwa ni kamatikiiyi ke Liisaayilo Liikhulu nga baraambisa bibiwaambakanisa, nga kamatikiiyi kameene karama konyene.

7Kamabaale kakaaraambisibwa mu khwombekha Liisaayilo Liikhulu, baraambi baamalila ilala khukabeetsa buulayi nga kashiili isi bakabeetsela, nio lwanyuma karereebwa mu Lisaayilo. Nashiryo, Lisaayilo lino nga lyombekhebwa, s’abawo liyoombo lye khuukhoonyaka khwe nyoondo namwe iyaaywa, namwe shishuuma shishiindi shoosi shishiraambisibwa mu khwombekha ta.

8Kumulyaango kwe khukhwiinjililamo khuutsya mu nuungo iye aasi kwaba khu luwaande lwe mwaalo lwe shishoombekhe, ni biniinilo bye khuutsya khu nuungo iye khaabili byaba ibweene iyo, ni khukhwaama khu bweene ikhwo, khuutsya khu nuungo iye khataru. 9Aryo Solomoni wombekha Liisaayilo Liikhulu waalimala. Lwanyuma mu ngaaki mwalyo, baakhupilamo tsimbaawo tse kimisaala kimi sida. 10Aryo wombekhelakho buseenge bubuundi khu ndulo khwe Lisaayilo lyoosi, nga buli khatweela khu nibwo bwoolesa buuleeyi bubuniina mu ngaaki nga tsifuuti musaafu ni shisiintsa (7 1/2). Buseenge buno babuwaambakanisa ni shishombekhe shoosi nga baraambisa tsimbaawo tse kimisaala sida.

11Lwanyuma kila Umukasya awa Solomoni buurume buno, nga amuloma ari, 12“Ibyo bibiwaambakana ni shishoombekhe shino, iwe siinga uwuliilisa kamakaambila kaase, waakhola byeesi ikhulomela khuukhola, ise kane nolelese byeesi nasuubisa paapawo Dawudi khuubirira mwiiwe. 13Ise kane imenyatsake akari mu baandu ba Isiraeli, siindilekha babaandu baase na khakyeekhe khoosi ta.”

14Aryo Solomoni waamaliilisa buulayi khukhwoombekha Liisaayilo Liikhulu.

Khuumiliisa mukari mwe Liisaayilo Liikhulu

(2 Bye Kimiboolo 3.8-14)

15Mukari khu matikiiyi ke Liisaayilo Liikhulu koosi, baakhupilakho tsimbaawo, khukhwaamila ilala aasi khuuniina khukhwoolela ilala mu ngaaki. Ni aasi amukhe e Lisaayilo lyeene, baakhupilawo tsimbaawo tse kimisaala sayipuraasi. 166.16: Luky 26.33,34Shiifwo shishifuura bukhosefu she mu Lisaayilo Likhosefu, shishaba inyuma wayo, baashawulamo shaaba nga shoolesa tsifuuti kamakhumi kataru buuleeyi. Nasho bashikhupilakho tsimbaawo tse kimisaala sayipuraasi, khukhwaamila ilala aasi amukhe khuuniina khukhwoolela ilala mu ngaaki mweene. 17Shiseenge shikhulu she Liisaayilo Liikhulu shishaba iburaangisi, abulafu e shiifwo shishifuura bukhosefu, shaba shoolesa tsifuuti nga kamakhumi kasesaba. 18Kamatikiiyi ke mu Liisaayilo Liikhulu ke mukari bakakhupakho tsimbaawo nio ilekhe khubawo libaale na litweela lilibonekha ta. Ni khu mbaawo tsa sida tseene tseesi baaraambisa, baatsironakakho bifwaani bye tsimuka ni bimuli.

19Solomoni aaŋoonaŋoona mukari mwe Liisaayilo Liikhulu, mu shifwo shishifuura bukhosefu, mweesi baara Isaanduuku iye Kamakaambila y’Omukasya. 20Khaseenge khe mukari khano khaaba khoolesa buuleeyi tsifuuti kamakhumi kataru, ni buubalaayi nabwo tsifuuti kamakhumi kataru, ni buuleeyi khuuniina mu ngaaki nabwo tsifuuti kamakhumi kataru. Khu matikiiyi koosi aawakhakho ni zaabu inyene. Ni shisheeso nasho baashikhupilakho tsimbaawo tsa sida. 21Mukari mwe Liisaayilo Liikhulu mwoosi baawakhamwo ni zaabu inyene. Solomoni waakholesa ni kiminyololo kye zaabu, baakibowa khuukhiingilila a bwinjililo e khuutsya mu shifwo shishifuura bukhosefu. 226.22: Luky 30.1-3Mukari mwoosi mwe Liisaayilo Liikhulu mwawakhibwamo ni zaabu khukhwoolesa shishoombekhe shoosi ni shawa. Ni khu sheeso shishaba mukari mwe shiifwo shishifuura bukhosefu, nasho baashiwakhakho i zaabu.

236.23: Luky 25.18-20Mu shifwo she mukari shishifuura bukhosefu, Solomoni aaramo bakeruubi babili beesi baakhola khukhwaama mu kuusaala ku olivu, nga buli keruubi olesa tsifuuti likhumi na tsiraano buuleeyi. 24Buli lutaha lwa keruubi lwaba lwoolesa buuleeyi bwe tsifuuti musaafu ni shisiintsa. Ne nga khukhwaama khu lutaha lwa keruubi mutweela khukhwoola khu lw’okuundi, aabawo buubalaayi bwe tsifuuti likhumi na tsiraano. 25Bakeruubi bano boombi baaba bafwaanana mu mbonekha ni buukali bwaabwe. 26Buli keruubi aaba olesa buuleeyi khuuniina mu ngaaki tsifuuti likhumi na tsiraano. 27Solomoni aara bakeruubi bano boombi mutweela aambi n’uwashe, mu shifwo shishifuura buukhosefu she mu Liisaayilo Liikhulu. Tsindaha tsaabwe tsabalaayisibwa tsaaba nga tsimalakho khaseenge khoosi. 28Ni bakeruubi baabili bano nabo aabawakhakho ni zaabu.

29Kamatikiiyi ke shishombekhe koosi bakawakhakho ni bifwaani bye bakeruubi ni bye kimisaala kamasheendu, ni bimuli, khu biseenge bye mukari ni bye bulafu byeene. 30Ni aasi amukhe nawo baawakhawo ni zaabu.

31Khu mulyaango kukwiinjila mu shifwo she mukari shishifuura bukhosefu, Solomoni aakholesa kumulyaango kumubalaayi, kukwiyikula kweleeyi ni neeyi, khukhwaama mu kuusaala kumuzeyituuni. Ni mbonekha iye kumuwaango kwe lulwiitsi luno kwabakho tsimbeka tsiraano. 32Khu milyaango kibili kikyakholebwa khukhwaama mu mbaawo tse kuusaala kuzeyituuni, kikinjila mu shifwo shishifuura bukhosefu, baaronakho bifwaani bye bakeruubi, ni kimisaala kimisheendu, ni bimuli. Khu bino byoosi bawakhakho ni zaabu. 33Ni musaambo niyo ndweela, akholayo kumuwaango kwe kumulyaango kukwiinjila mu Liisaayilo Liikhulu, khuuba kwe tsimbeka tsine, nga kukholebwa khukhwaama mu kuusaala kumuzeyituuni. 34Akholayo ni kimilyaango kibili kikiindi khukhwaama mu kuusaala sayipuraasi, nga buli mulyaango kwifunya kweela mu kwashe. 35Kimilyaango kino baakironakho bifwaani bye bakeruubi, kimisaala kimisheendu, ni bimuli, lwanyuma byoosi baabiwakhakho buulayi ni zaabu.

36Lulwaanyi lwe Liisaayilo Liikhulu lwe mukari lwabakho kamatikiiyi keesi bombekha nga baraambisa tsileeya tsitaru tse kamabaale kamabeetse buulayi, ni leeya ndweela iye tsimbaawo tse kimisaala sida.

37Khuusimama kumulimo kwe khukhwombekha Liisaayilo Liikhulu ly’Omukasya, khwaba mu mweesi kwa Zivu, mu mwiiko kwa Solomoni kwe khaane kwe buyiinga. 38Baraambi baamaliilisa khukhwombekha Liisaayilo Liikhulu lino mu miiko musaafu, nga nikyo kimiiko likhumi na mutweela kye buwuli bwa Solomoni, mu mweesi kwa Bulu, nga nikwo kumweesi kwe shinaane6.38 Bulu: Khu kaleenda ye Baheburaniya imbuka yino yabawo akari e kumweesi kwe likhumi ni akari e kumweesi kwe likhumi na mutweela .