Swahili Bible2

5

Tsiŋoonaŋoona tse khukhwombakha Liisaayilo Liikhulu

(2 Bye Kimiboolo 2.1-18)

1Umuyiinga Hiramu we Tuulo nga n’awulila bari Solomoni wekyelile umuyiinga khukhwiila mu bikyele bya paapawe Dawudi, waarumanisa khaangu baarume khuutsya is’ali, lwekhuuba niye aaba nga uwe buusaale bukali ni Dawudi. 2Solomoni naye waamurumanisila buurume buno: 3“Iwe waamanya buulayi uri, paapa wase Dawudi s’anyalisa khukhwombekhela Umukasya Wele weewe Lisaayilo ta, lwekhuuba aaba asoolana busoolo buukali naabi ni kamanaambo kakaamwibotokhelela. Shino shaba shiryo nga akana khuusoolana, khukhwoolesa nga Wele waareere baasiku beewe boosi aasi eewe. 4Ne ari bona Umukasya Wele wase waambeele ise lukoosi khu buli lubeka lwoosi, naluundi sishiilikho ni baasiku, namwe buukosi bwoosi ta. 55.5: 2 Sam 7.12,13; 1 Kim 17.11,12Shikila ari indi khuuŋoonaŋoona khukhwoombekha Liisaayilo Liikhulu lwe khukhwisaayilamo Umukasya Wele, khuuloondekhana ni sheesi Umukasya umweene aalomela paapa wase Dawudi ari, ‘Umwaana woowo uliikhala khu shitsoloŋo shoowo khukhwiila mu bikyele byoowo, niye ulyombekha Lisaayilo lye khukhuuntsisaayilamo.’ 6Nashiryo ari n’ulakile baanemele kimisaala kya sida kye Lebanooni. Khayo basaani baase baraambakanile atweela ni basaani boowo, ni nase kane imbasasule kumusheemba kweesi bakana. Iwe nga n’umanyile, mbaawo babaandu musiifwe babaamanyile khuukhala tsimbaawo nga basaani boowo ba Sidoni ta.”

7Hiramu wasangaala naabi nga n’awulila bino byeesi Solomoni aamuloomba, shikila naye aloma ari, “Ise ndi ni khuuruuya khuukali naabi isi Umukasya shaleelo shino, lwekhuuba waawa Dawudi umusooleli umukhulu naabi, khuuba umuyiinga we linaambo likhulu mu shifwo sheewe.” 8Aryo lwanyuma kila arumanisa buurume buno isi Solomoni: “Naafunile buurume bweesi waantsakaanisile, ni nase kane ikhukholele nga ni wanoombile, khukhwakaanisa tsimbaawo tsa sida ni bikyeenga biboofu. 9Baraambi baase kane babisute khukhwaama mu njiinji tsa Lebanoni, babiikhise khukhwoola khu nyaantsa Meditereniani. Kane babowe atweela bikyeenga bino, babire khu meetsi, bikyelakyele khuubyoolesa khu ndulo khwe nyaantsa isi kane ubikane byoole. Ibweene iyo, baraambi baase bakhaakaangulule bikyeenga bino, nio baraambi boowo babiyile isi ukana bitsye. Khu lubeka lwoowo khuukhusasula, iwe uli ni khukhuuntsakaanisa ise bye khuulya lwe babaandu baase.”

10Musaambo yino, Hiramu waakaanisa Solomoni tsimbaawo tsa sida ni bikyeenga byoosi byeesi aakana. 11Naye Solomoni waakaanisatsaka Hiramu tsitani bikana bibili (2,000) bye ŋaano, ni tsi lita bikana bine (4,000) bye kamafura ke kuusaala ku oliveti, buli mwiiko.

12Umukasya wolelesa sheesi aasuubisa, waawa Solomoni kamakhula. Baryo Hiramu ni Solomoni baakhola ikwangwaani iye buusaale akari aabwe, alekha khubawo busoolo ta.

13Umuyiinga Solomoni waalakila khuufuna baraambi beesi bawaambila busa kamaani, baboola kimikaanda kitaru (30,000) khukhwaama mu Isiraeli mwoosi. 145.14: 1 Bay 12.18Babeene bano aabarumana khuutsya khuraamba mu Lebanoni, ne nga batsiila mu matuuli kataru, baraambi kumukaanda mutweela (10,000) buli mweesi. Buli lituuli lyatsya khuraambayo kumweesi mutweela mu Lebanooni, ne kimyeesi kibili bakobola baaba nga bali ingo waabwe khuwolakho. Adoniramu niye uwaba akhulila khuraambisa babaandu ni kamaani khuno.

15Solomoni aabayo ni baraambi baboola kimikaanda shinaane (80,000), babaaba nga barema kamabaale iyo mu shibala she mu ngoongo, ni babaandi kimikaanda musaafu (70,000), nga nibo babaasutaka kamabaale keene. 16Aabakho ni baraambi babaandi bayeeti baboola bikana bitaru (3,000), babaaba bakhulila khuulolelela baraambi nga ni baaraamba. 17Umuyiinga waalakila, baraambi baatsya baabeetsa kamabaale kamaboofu kamalayi, keesi beeyetisa khukhwoombakha kumusiingi kwe Liisaayilo Liikhulu.

18Baraambi ba Solomoni ni baraambi ba Hiramu baraambakanila atweela ni basaani babaama i Gebali5.18 Gebali: Lwanyuma shaamanyikhana nga Bayibulosi, khuukhala ni khuuŋoonaŋoona tsimbaawo, atweela ni kamabaale lwe khukhwombekha Liisaayilo Liikhulu.