Swahili Bible2

21

Inimiro ya Nabosi

1Aabawo umusaani isi balaanga bari Nabosi uwe mu Yezureeli, uwaba nga ali ni nimiro yeewe iye kimisabibu aambi ni lubili lwa Ahabu, umuyiinga wa Samariya. 2Shifukhu shitweela kila Ahabu alomela Nabosi ari, “Bona inimiro yoowo iye kimisabibu ili aambi ni lubili lwase. Ari ikhuloomba iwe ukiimbe ise, injikyelisemo inimiro ye tsinyenyi, ni nase kane ikhuwemo inimiro ikiindi ikifuurakho niyo, namwe nga ta, ikhuwemo kamapeesa koosi keesi kane ukane.”

3Nabosi niye weelamo Ahabu ari, “Inimiro yase yino iye kimisabibu iseese nakisikhila khukhwaama khu bakuuka baase. Ni nashiryo ise sinyala naakikhuwa iwe ta.”

4Ahabu waamawo waakobolayo ingo weewe, nga waakhalaale, luundi nga waawetsekheleele luukali lweesho sheesi Nabosi iwe Yezureeli aamwiilamo. Aryo Ahabu weelayo ingo, waatsya waakona khu bulili bweewe, waakona nga waashuukhile waaloleleele ibwitikiiyi, waalekha khukana ni khuulyakho khakhaandu khoosi ta.

5Kila umukyelama weewe Yezebeli eetsa waamureeba ari, “Shikosi shiina shishiiliwo? Shiina shishiili khuukhureerera kumutaambo kumukali waalekha ni khuulya ta?”

6Ahabu naye waamwiilamo ari, “Ise inganikhilekho ni Nabosi uwe Yezureeli, nga imuloma ndi angulise ise inimiro yeewe, namwe nga ta, imuwemo inimiro ikiindi ifuurakho, ne niye wekaana ari s’anyala waakiimba ta.”

7Kila umukyelama weewe Yezebeli amwiilamo ari, “Iwe s’uli niye umuyiinga wa Isiraeli? Yinyukha urure mu bulili, ulyekho biilyo. Lekha kumwoyo kwoowo kusangaale. Ise kane ikhuwe inimiro ya Nabosi uwe Yezureeli.”

8Aryo Yezebeli waarona tsibaluwa mu lisiina lya Ahabu, waatsikuunyakho shangumu sheewe, waatsakaanisa baasakhalu atweela ni baakhulu babaandi be mu shiriimba mweesi abe Nabosi amenya. 9Mu burone buno arona ari, “Ni mulaange babaandu boosi khuubuya intsala ni khuuloomba, muwe Nabosi shiifwo she angaaki she shiriifwa. 10Mufuneyo babaandu babili bawoombesi balolelanile ni naye iburaangisi weewe, balome bari niye waatsubile Wele atweela n’umuyiinga. Lwanyuma mumurusewo, mumuyile ibulafu we shiriimba, mumukhupe kamabaale mumwiire.”

11Baryo baasakhalu atweela ni baaraangilisi babaandi be shiriimba, ni baamala khuufuna buurone, baatsya baakhola nga baaloombebwa khuukhola. 12Baryo balaangilila khuubuya intsala, ni babaandu boosi ni baabuusana atweela, baareera Nabosi, baamura mu shifwo she angaaki she shiriifwa iburaangisi we babaandu. 13Babaandu babeeyi tsana beetsa, bekhala nga baalolelaniile ni naye iburaangisi weewe, baamutsuntsumilisa bari niye aatsuba Wele atweela n’umuyiinga. Baryo baamukhweeselesa baamurusa ibulafu we shiriimba, baamukhupa kamabaale baamwiira. 14Lwanyuma baakaanisa Yezebeli buurume nga baloma bari, “Nabosi waamalile khaale khukhwiiribwa.”

15Khaangukho nga Yezebeli n’afuna buurume buno bwe khuufwa khwa Nabosi, waatsya waalomela umuyiinga Ahabu ari, “Ari yinyukha utsye wiyilile inimiro tsana abe isi Nabosi ekaanile khuukhukulisa iwe. Niye waafwiile khaale.” 16Aryo Ahabu wenyukhilamo khaangu, waatsya waayila inimiro tsana iyaba iya Nabosi, yeekyela iyeewe.

Eliya ekiitsa Ahabu

17Lwanyuma Umukasya waalomela Eliya uwe Tishibe ari, 18“Yinyukha utsye waakaanane ni Ahabu, umuyiinga wa Isiraeli, umenya i Samariya. Bona ari waatsiile ali mu nimiro ya Nabosi, waakiyilile khuuba nga iyeewe. 19N’utsye umuwe buurume buno, bweesi ise Umukasya indi khuukhuwa iwe, umulome uri, ‘Lwanyuma lwe khukhwiira Nabosi, ndi waayila ni nimiro yeewe? Ni nashiryo, mu shifwo mweene mweesi tsiimbwa tsakhoombakila kamafuki ka Nabosi, nimwo mweesi tsilikhoombakila kakoowo nako.’”

20Nga baanyoolaane, Ahabu waalomela Eliya ari, “Iwe umusiku wase, kwaluno ari waanyoolile?”

Eliya naye weelamo ari, “Ilala naakhunyoolile! Lwekhuuba iwe waakhaliilewo ilala khuukhola bibiili bye bubwoonaki mu moni ts’Omukasya. 21Ari Umukasya ali khuutsya khukhureerakho iwe shitaambiso, akhuheselewo ilala. Mbaawo umuundu na mutweela uwe muungo mwoowo, uliramawo ta, khaabe umubowe namwe umulekhuule mu Isiraeli muno. 22Muungo mwoowo muli khuutsya khuhelela ilala, mufwaane nga muungo mw’omuyiinga Yerobowamu umwaana wa Nebati, ni mw’omuyiinga Baasha, umwaana wa Ahija. Lwekhuuba iwe waakhalasile naabi Umukasya, naluundi waakilile babaandu ba Isiraeli boosi khukhwoonaka. 2321.23: 2 Bay 9.36Naluundi Umukasya waandakiile ikhubooleele ndi tsiimbwa tsikhaalye kumubili kwa Yezebeli umukyelama woowo mu shiriimba Yezureeli. 24Naluundi, na buli muundu yeesi uwe muungo mwoowo ulifwiila mu shiriimba, tsiimbwa tsilimulya, ni nooyo yeesi ulifwiila iyo mwirome, tsingosya nitso tsilimulya.”

25(Mbaawo umuundu ukuundi yeesi uwewaanayo mu khukhola bye bubwoonaki mu moni ts’Omukasya nga Ahabu ta. Bino byeetsawo biryo lwekhuuba umukyelama weewe Yezebeli niye uwakhonjelesa khubikhola. 26Niye akhola bibyoonako bye bunyaalu ibyo naabi, lwekhuuba ewaanayo khukhwisaaya bifwaani nga babaandu ba Amori ni baakholatsaka; ba Amori bano nibo beesi Wele aawoona mu shibala nio ba Isiraeli beetsamwo.)

27Ahabu n’amala khuuwulila buurume buno, wonuulaka bikwaaro byeewe, wakwaara tsisawu tsa makoongwe, waabuya ntsala. Aryo waalekha khulyakho biilyo ta, waakona mu sawu tseene tsa makoongwe, waakyeendaka aryo nga weetsuule kumutaambo kumukali.

28Lwanyuma Umukasya waakanikha isi Eliya uwe Tishibe luundi nga aloma ari, 29“Waaboone Ahabu nga afwifwitsikhile mu moni tsase? Aryo lwekhuuba waakholile isho, ise singene indeere shitaambiso sheesi imusuubisile nga niye ashiili mulamu ta. Ne isho shikhaakholikhe khu mbuka iye babaana beewe, lwekhuuba indihesela ilala babetsukhulu beewe boosi.”