Swahili Bible2

2

Khuuboolelela khwa Dawudi khukhwaakamayo isi Solomoni

1Umuyiinga Dawudi nga ashiili khufwa ta, aaboolelela Solomoni mu bilomo bino: 2“Ise ndi aambi khuufwa intsye mu ntsila iye makoombe nga buli muundu yeesi ukuundi n’akhiile khuufwa. Ne ngana iwe ube umusaani umunyindaalifu luundi uwe kamaani. 3Yitsiliilisa khuuloondelela byeesi Umukasya Wele akana. Ukyeendatsakile mu mukhoosi kweewe, uwaambatsake kamakaambila keewe, ni biilakilo byeewe, ni khuukaambila khweewe atweela ni bujulisi bweewe, nga nibyo bibyaronebwa mu makaambila ka Musa. Nio nawe lwanyuma unyalisatsake khuufuna biilayi nga ukhola buli shiindu shoosi sheesi ukana, na buli aandu oosi isi utsya. 4Iwe n’ukane ukholatsake uryo, Umukasya kane olelese sheesi aasuubisa ise nga aloma ari, ‘Siinga babetsukhulu boowo bamenyawo nga ni baakha khuukhola, baaba baaŋali mu khunoondelela ise ni kumwoyo naluundi ni buulamu bwaabwe bwoosi, kane ibewo mutweela khu nibo ukane ekhale khu shitsoloŋo shoowo nga umuyiinga mu Isiraeli.’

52.5 a 2 Sam 3.27; b: 2 Sam 20.10“Naluundi aliwo shishiindu shishiindi sheesi ukhaakha webilila ta. Iwe waamanya isaambo isi Yowabu umwaana wa Zeruya ambirisamo ise, nga ni eraka baakhulu baase be liiye babili, nga nibo Abuneri umwaana wa Neri, ni Amasa umwaana wa Jeseri. Bano aabeera nga shifwaanikhana nga nibo babaaba baasiku beewe mu busoolo, ate nga aashikhola khu mbuka isi busoolo bukhaabeelawo ta. Mu shino umweene ereerakho kumusaango lwe kamafuki kakaakhalikho ni kumusaango kwoosi ta. Nashiryo shili isi uli khubona uri umuwa shitaambiso. 6Shino n’ushikhole mu makyesi ke angaaki, ne ukhamulekha waafwiila mu lukoosi mu miiko kyeewe kye busaakhulu ta.

72.7: 2 Sam 17.27-29“Ingana uwaambile shiisa basooleli ba Bazilayi uwe Gileyadi. Ise ngana iwe ubakhole nibo babe bakyeni be muungo mw’omuyiinga ba lubeelela, lwekhuuba baanjeeta ise naabi nga ni natitukhawo khulwa wandaayo Abisalomu.

82.8: 2 Sam 16.5-13; 19.16-23“Naluundi ushebulilatsaka Shimeyi umusooleli wa Gera, niye umusaani uwaama i Bahurimu shishiili mu Benyamini. Niye aantsuba ise luundi waakhomaka, ni naba nga ndi khuutitukha khuutsya i Mahanayimu. Nga niye ni eetsa khukhuuntsakanana ise khu luutsi Yorudaani, netsuba isi Umukasya ndi siindimwiira na khakyeekhe khoosi ta. 9Ne shishitsubo isho sishimukhola niye khuulekha khuba ni kumusaango ta. Iwe uli umuundu umukyesi naabi, kane umanye isaambo iye khumwiiramo afwe.”

10Lwanyuma Dawudi waafwa, baamusiikha mu shiriimba sha Dawudi. 112.11: 2 Sam 5.4,5; 1 Kim 3.4Niye aba nga waawulila mu Isiraeli khuumala kimiiko kamakhumi kane, ne musaafu khu nikyo aawula nga ali i Heburoni, ni kataru na kitaru aawula nga ali i Yerusalemu. 122.12: 1 Kim 29.23Aryo Solomoni weela mu bikyele bya paapawe Dawudi nga umuyiinga, wareera buyiinga bweewe bwoosi aasi e bunyala bweewe.

Khuufwa khwa Adoniya

13Yabawo shifukhu shitweela Adoniya umwaana wa Hagisi weetsa khuubona Basisheba, maayi wa Solomoni. Kila Basisheba amureeba ari, “Khukhwiitsa khuno khuli khwe lukoosi?”

Adoniya waamwiilamo ari, “E e.” 14Ne waalooselakho ari, “Niitsile busa nga ngana khuukanikhakho is’uli.”

Basisheba naye waamwiilamo ari, “Mbaawo buubi ta. N’ushikanikhe.”

15Kila Adoniya weelamo ari, “Nga n’umanyile, buyiinga buno abe bwaba bubwase; nga buli muundu yeesi mu Isiraeli andoleelela ise khuuba umuyiinga. Ne bibiindu ni byashuukhakho, buyiinga buno bwaatsya wa wandaayase, lwekhuuba iyo niyo isaambo isi Umukasya aashikanamwo. 16Ne ari ise ndiyo busa ni ilomo ndweela yonyene isi ingana khukhuloomba iwe. Ikhwikoontselela, ukhekaana ta.”

Basisheba waamwiilamo ari, “Shiina sheesi ukana?”

172.17: 1 Bay 1.3,4Adoniya naye weelamo ari, “Ikhuloomba utsye ukanikhe isi Solomoni, afukiilise ise khuuyila Abishaga uwe Shunemu khuuba umukhasi wase. Ise naamanyile niye singene akhwikaanile iwe ta.”

18Basisheba naye weelamo ari, “Shilayi. Kane intsye imukhuloombele.”

19Aryo Basisheba waatsya isi umuyiinga Solomoni khuumukanikhayo khulwa Adoniya. Umuyiinga n’amubonakho wenyukha khu shitsoloŋo sheewe khuumwakaanila, weenamisa kumurwe kweewe khuumuwa lukoosi. Lwanyuma weelayo wekhala khu shitsoloŋo sheewe, waalakila ari bareerereyo maayi weewe shitsoloŋo shishiindi, nio anyale khukhwikhala aambi ni naye khu mukhono kweewe kumulayi. 20Lwanyuma kila Basisheba amuloma ari, “Indiyo ni shishiindu shikyeekhe shiri sheesi ingana khuukhuloomba. Niyikina ndi iwe s’ukane wikaane ta.”

Solomoni weelamo ari, “Maayi, n’umboolele khubone, ni nase singene nikaane ta.”

21Kila Basisheba elamo ari, “Fukiilisa wandaayo Adoniya, ayile Abishaga umukhaana uwe Shunemu khuuba umukhasi weewe.”

22Solomoni naye weelamo maayi weewe ari, “Iwe unyala uryeena waanoomba ise khuufukiilila Adoniya khuuyila Abishaga umukhaana we Shunemu? Manya unyala waanoomba ise uri imuwe ni buyiinga buno bwoosi. Iwe waashimanya buulayi bubweene uri niye ali wandaayase umukhulu, ni khu lubeka lweewe ali n’umusaayi Abiyasaari, ni Yowabu umwaana wa Zeruya.” 23Kila umuyiinga Solomoni etsubila mu moni ts’Omukasya nga aloma ari, “Khali Wele antsirire ise, siinga Adoniya alekha khwiiribwa lwa shino sheesi aloombile! 24Umukasya umweene waayiŋaŋasa ise, luundi waayintsikhasa khu shitsoloŋo she buyiinga sha paapa wase Dawudi. Niye waayindeerawo ise buyiinga buno nga umweene n’asuubisa. Ni nashiryo mu ŋali mubweene, Adoniya aakha khuufwa khu shifukhu she shaleelo shino.” 25Shikila umuyiinga Solomoni awa biilakilo isi Benaya umwaana wa Yehoyada khuutsya khumwiira. Aryo khu mbuka iyo, Adoniya weeribwa.

Abiyasaari bamusiibula khukhwiilayo ingo

262.26 a 2 Sam 15.24; b: 1 Sam 22.20-23Lwanyuma umuyiinga Solomoni waalomela umusaayi Abiyasaari ari, “N’ukoboleyo ingo woowo i Anasosi. Abe waakhila khuufwa, ne singene ikhwiire aluno ari ta, lwekhuuba iwe niye uwasutatsaka isanduuku iye kamakaambila y’Omukasya nga paapa wase niye umuyiinga, naluundi mwabonabonela atweela mweembi mu mbuka iyo iyaba imangafu.” 272.27: 1 Sam 2.27-36Aryo Solomoni waawoona Abiyasaari khukhwaama mu bwakaanisi bwe busaayi isi Umukasya. Aryo waaba nga wolelesile sheesi Umukasya aalomela i Shilo bibiwaamba khu baandu be mu ntsu y’omusaayi Eli.

28Kamakhuuwa kano koolela Yowabu. (Abe yakhaba nga Yowabu yuno s’aba khu lubeka lwa Abisalomu ta, ne aayeeta naabi Adoniya.) Yowabu wekhuuna tsiindimo, waatsya mu lisari likhosefu ly’Omukasya, waatsya wehaamba khu tsiintsika tse khu sheeso. 29Solomoni n’ashiwulila ari Yowabu waatimile waatsiile mu lisari ly’Omukasya khu sheeso, waarumana Benaya umwaana wa Yehoyada khuutsya amwiirire abweene awo.

30Aryo Benaya waatsya mu lisari ly’Omukasya, waalomela Yowabu ari, “Umuyiinga waalakiile ari urure ano.”

Yowabu naye weelamo ari, “Siinarura ta. Ne nga ifwiila ano.”

Benaya weelayo waatsya waaboolela umuyiinga sheesi Yowabu aaloma.

31Umuyiinga Solomoni weelamo ari, “N’utsye ukhole sheesi akhulomeele. N’utsye umwiirire a sheeso eene awo, lwanyuma umusiikhe. Uryo kane ube nga waandusilekho kumusaango ni khu paapa wase ni be muungo mweewe, lwe kamafuki ke babaandu babaakhalikho kumusaango beesi niye aakhoonyaka. 32Umukasya umweene kane awe Yowabu shitaambiso, lwe khukhwiira basaani babili babaaba baalayi khufuurisa niye umweene. Paapa wase s’ewaambila mu khufwa khw’omukhulu we liiye lya Isiraeli Abuneri umwaana wa Neri, ni Amasa umwaana wa Jeferi uwaba umukhulu we liiye lya Yuda ta. 33Shiryo shitaambiso khulwe khuufwa khwe babaandu bano khali khubeele khu Yowabu, ni khu be muungo mweewe biilo ni biilo. Ne Umukasya kane awatsake paapa wase Dawudi, ni be muungo mweewe babekhala khu shitsoloŋo sheewe lukoosi.”

34Aryo Benaya waatsya mu Lisari ly’Omukasya, waakhoonya Yowabu. Baasuta kumulaambo kweewe, baakuyila baakusiikha muungo mweewe iyo mu mubiimbi. 35Lwanyuma umuyiinga waarobola Benaya khuuba umukhulu we liiye, khukhwiila mu shifwo sha Yowabu, naluundi waarobola Zadoki khuuba umusaayi khukhwiila mu shifwo sha Abiyasaari.

36Luundi ndi umuyiinga Solomoni waarumanisa Shimeyi khukhwiitsa is’ali, waamulomela ari, “Yiyombekhela intsu ano mu Yerusalemu, umenyatsake mu bweenemwo. Ni mu buli shiindu shoosi sheesi ukhola, ukhakhakakho khurura mu shiriimba shino ta. 37Lwekhuuba khu shifukhu khweesi ulikhakakho khuurura mu shiriimba shino, waakhalisa litila Kidironi, uliiribwa. Ukwo kuliba musaango kwoowo.”

38Shimeyi naye weelamo umuyiinga ari, “Sheesi uli khuuloma shili shilayi. Ni nase kane ikhole nga niwaama khuundakila.” Ni khukhwaamila abweenewo, Shimeyi waamenyatsaka mu Yerusalemu imbuka ndeeyi.

39Ne lwanyuma lwe khuubirawo kimiiko kitaru, babili khu baakulwa ba Shimeyi baamutitukhakho, baatsya w’omuyiinga Akishi uwe Gaasi. Ne Shimeyi n’ashifumbula ari bali iyo, 40wekhala khu sikilya yeewe, waatsya i Gaasi khuutsya khubaweentsa. Ne n’abanyoola waakobola ni nabo i Yerusalemu.

41Ne ndi yabawo umuundu uwatsya waaboolela Solomoni ari, Shimeyi atsyakho i Gaasi ne waamala waakobola. 42Isho shaakila Solomoni waarumanisa Shimeyi khukhwiitsa is’ali, waamuloma ari, “Ise sinakhulayisa ano mu lisiina ly’Omukasya, khuulekha khururakho ano mu Yerusalemu ta? Nakhureewula ndi lweesi uliruriramo, uliiribwa. Iwe siwafukiilisana ni nase uri isho shili shilayi, naluundi uri kane ushikhole uryo? 43Ne ari ndi lwashiina wafuniaakile shishitsubo shoowo isi Umukasya, naluundi waaminyaalila byeesi ise nakhulomela?”

44Umuyiinga waalomela luundi Shimeyi ari, “Iwe ushebulila mu mwoyo kwoowo bibiindu biibi byoosi, byeesi wakhola khu paapa wase umuyiinga Dawudi. Ni aluno ari, Umukasya atsya khuukhuwa shitaambiso khulweebyo byoosi byeesi wakhola. 45Ne khali Umukasya ambeele ise tsikhabi, ni buyiinga bwa paapa wase khali abuwaangasile biilo ni biilo.”

46Kila lwanyuma umuyiinga alakila Benaya umwaana wa Yehoyada khuuyila Shimeyi atsye amwiire. Aryo Benaya waamuyila waamwiira.

Aryo Solomoni waaba nga ari niye uuli ni bunyala bwoosi mu buyiinga bweewe.