Swahili Bible2

16

1Umukasya waakanikha isi Jehu, umusooleli wa Hanani, nga amukana atsye aboolele Baasha ari, 2“Ise nakhwaamisa aleeyi mwifukhuulu busa, naakhuniinisa, naakhwikyelisa umuwuli we babaandu baase ba Isiraeli. Ne bona ari wemoyaanisakile busa, wafwaanile nga Yerobowamu n’onakisa. Ari bona waasyubuluusile lirima lyase, lwekhuuba waayilile babaandu baase mu khwoonaka. 3Ni nashiryo intsya khukhuhesa iwe, ni be muungo mwoowo boosi, nga ninahesa be muungo mwa Yerobowamu umwaana wa Nebati. 4Babaandu boosi be muungo mwoowo babaakhaafwiile mu shiriimba, bakhaaliibwe ni tsiimbwa, ni naabo babaakhaafwiile mwirome iyo, bakhaaliibwe ni tsingosya.”

5Bibiindu bibiindi byoosi byeesi Baasha aakhola nga ali umuyiinga, ni bibiindi bye bunyala bweewe, byaronebwa mu Shiitabo she bibyaamayo bye Bayiinga ba Isiraeli. 6Aryo Baasha n’amala khuufwa, baamusiikha i Tiruza. Lwanyuma lweewe umusooleli weewe Ela waamwiilila mu bikyele byeewe nga umuyiinga.

7Buurume ubwo bweesi Umukasya aakanikha bubuwaamba khu Baasha ni be muungo mweewe nga abirira mu Muŋoosi Yehu umwaana wa Hanani, bweetsa lwekhuuba Baasha umweene aakhola buubi bukali naabi mu moni ts’Omukasya. Shino shaakila lirima ly’Omukasya lyaasyubuluukha lwe bibyoonako byeewe biikali, nga umuyiinga Yerobowamu n’akhola, ni lwekhuuba ndi aahesa be muungo mwa Yerobowamu boosi.

Ela nga niye umuyiinga wa Isiraeli

8Mu mwiiko kwe kabili na kisesaba kwe buuwuli bwa Asa nga umuyiinga wa Yuda, Ela umwaana wa Baasha ekyela umuyiinga wa Isiraeli, nga asintsiila i Tiruza. Aryo waaba nga awula Isiraeli khuumala kimiiko kibili. 9Lwanyuma Zimuri, uwaba umuraangilisi we liiye lyeewe lye kamakaali, waakhola luwomelo lwe khumwiira. Shifukhu shitweela, Ela aaba nga ali i Tiruza, nga ali khuunywa emeesameesa, muungo mwa Aruza, umukhulu we lubili lweewe. 10Abweene awo Zimuri weetsawo khaangukho, waamukhoonya. Shino shakholekha mu mwiiko kwe kamakhumi kabili na musaafu kwe buuwuli bwa Asa, nga umuyiinga wa Yuda. Aryo Zimuri weelawo nga umuyiinga wa Isiraeli.

11Aryo nga Zimuri alikyelile umuyiinga, weeraka buli muundu yeesi uwaba uwe muungo mwa Baasha, waalekha khulekhawo umusaani yeesi namwe umwaana uwe siinde yeesi ta. Waatsya waahesa ni baalebe beewe atweela ni basaale beene. 12Aryo Zimuri waahesa be muungo mwa Baasha boosi nga ilomo y’Omukasya ni yaloma khuubirira mu muŋoosi Yehu. 13Shino shakholekhana shiryo khulwe khukhwooneka khuukali khweesi Baasha n’umusooleli weewe Ela baakhola, ni saambo isi baakila ba Isiraeli boonaka. Shino shasyubuluusa lirima ly’Omukasya, Wele wa Isiraeli, lwekhuuba besaayatsaka bifwaani. 14Bibiindu bibiindi byoosi byeesi Ela aakhola nga ali umuyiinga, ni buraambi bweewe bubuundi, byoosi byaronebwa mu Shiitabo she Bibyaamayo bye Bayiinga ba Isiraeli.

Zimuri nga ali umuyiinga wa Isiraeli

15Mu mwiiko kwe kabili na musaafu kwe buuwuli bwa Asa nga umuyiinga wa Yuda, Zimuri ekyela umuyiinga wa Isiraeli nga asintsiila i Tiruza. Ne aryo aawula Isiraeli nga umuyiinga khuumala biifukhu musaafu byonyene. Liiye lye ba Isiraeli lyaaba nga lyebuuliile shiriimba sha Gibetoni mu Firisitiya, 16baawulila bari Zimuri waakhoonyile umuyiinga Ela, abweene ni abweene awo, baarobora Omuri, uwaba umukhulu we liiye, khuuba nga niye umuyiinga waabwe. 17Aryo Omuri wenyukhilamo ni liiye lyeewe baakhuumba khukhwaama i Gibetoni, baatsya bebwakala shiriimba Tiruza. 18Ne n’amala khuubona nga shiriimba baashiwaambile, waatitukha, waatsya wenjila mu shiseenge she mukari she ntsu y’omuyiinga mu lubili, waakiwaambisakho kumulilo, n’umweene wafwiilamo. 19Shino shakholekha shiryo lwekhuuba naye aakhola bubwoonaki bukali nga amiinyaalila Umukasya, musaambo nyene nga Yerobowamu n’akhola, weloosela khukhwoneka niye umweene, ni khuyila ba Isiraeli mu khwoneka khuukali. 20Bibiindu bibiindi byoosi byeesi Zimuri nga ali umuyiinga, ni buraambi bweewe bubuundi, byaronebwa mu Shiitabo she Bibyaamayo bye Bayiinga ba Isiraeli.

Omuri nga ali umuyiinga wa Isiraeli

21Lwanyuma lwa Zimuri, babaandu ba Isiraeli beyawulamo kamatuuli kabili. Babaandu baalala bakana bari Tibini umwaana wa Ginati abe umuyiinga waabwe, ne babaandi bakana bari Omuri abe niye umuyiinga. 22Ne baloondeleli ba Omuri bafuura ba Tibini umwaana wa Ginati kamaani. Aryo Tibini waafwa, Omuri wekyela umuyiinga. 23Omuri wekyela umuyiinga wa Isiraeli mu mwiiko kwe kamakhumi kataru na mutweela kwe buwuli bwa Asa nga umuyiinga wa Yuda. Aryo waawula Isiraeli nga umuyiinga khuumala kimiiko likhumi na kibili, nga kisesaba khu nikyo aaba umuyiinga nga asintsiila i Tiruza. 24Ne lwanyuma lwayo, Omuri waatsya waakula khaakiingi Samariya khukhwaama khu Shemeri nga araambisa tsinusu tsitsoola bisiintsa bya feetsa bikana bisesaba (6,000). Aryo wombekha shiriimba khu khakiingi kheene, waashilaanga lisiina ari Samariya, nga alyaamisa khu lisiina lya Shemeri, uwakhamukulisa.

25Omuri waakhola bye bubwoonaki biikali naabi mu moni ts’Omukasya, khuufuurakho ni bayiinga boosi babaamunyoowa. 26Bino byoosi aabikhola nga aloondelela she khuubonelakho sha Yerobowamu, weloosela khuukhola bye khukhwisaaya bifwaani, aryo waareerera ba Isiraeli khukhwoneka. Lwashino naye wasyubuluusa lirima ly’Omukasya, Wele wa Isiraeli. 27Bibiindu byoosi byeesi Omuri aakhola nga ali umuyiinga, buukali bwe kamaani keewe, ni bibiindi byeesi aakhola, byaronebwa mu Shiitabo she Bibyaamayo bye Bayiinga ba Isiraeli. 28Omuri n’amala khuufwa, niye baamusiikha mu Samariya. Lwanyuma lweewe, umusooleli weewe Ahabu weela mu bikyele byeewe nga umuyiinga.

Ahabu nga niye umuyiinga wa Isiraeli

29Ahabu umwaana wa Omuri ekyela umuyiinga wa Isiraeli, mu mwiiko kwe kamakhumi kataru na shinaane kwe buwuli bwa Asa nga umuyiinga wa Yuda. Ahabu niye aawula nga umuyiinga wa Isiraeli nga asintsiila i Samariya khuumala kimiiko kamakhumi kabili na kibili. 30Ahabu naye waakhola bye bubwoonaki biikali naabi mu moni ts’Omukasya khufuurakho ni bayiinga babaandi babaamunyoowa niye. 31Niye sishamumala khuukhola bye bubwoonaki nga Yerobowamu ta, ne waalooselakho ni khuuyila umukhasi Yezebeli, umukhaana wa Etibaali, umuyiinga wa Sidoni. Naye aryo waarakikha ni khukhwisaaya Bayaali. 32Ahabu wanyoowa ni khukhwombekha mu Samariya lisaayilo ni shisheeso bye khukhwisaaya Bayaali. 33Lwanyuma waarawo ni kusiindi kwe khukhwisaayilakho Ashera, wele umukhasi. Aryo Ahabu aakhola bye bubwoonaki buukali bwaakila bwasyubuluusa lirima ly’Omukasya, Wele wa Isiraeli, khufuurakho ni bayiinga boosi babaamunyoowa mu Isiraeli. 3416.34: Yos 6.26Mu mbuka iye buwuli bweewe nga umuyiinga, Umusaani isi baalaanga bari Hiyeli khukhwaama i Beseli, eetsa khukhwombekha Yeriko luundi. Mu mbuka isi aasimamila kumusiingi, umusooleli wa Ahabu umukiboole Abiramu waafwa. Isi aamaliilisila khukhwombekha bilibwa, umusooleli weewe umukyeekhe Segubu naye waafwa. Bino byoosi byakholebwa khukhwoolelesa buurume bweesi Umukasya aaboolela Yoswa umwaana wa Nuni khuukanikha khaalekho.